Olum, ölüm haqq işidir,

O da gözəl, bu da gözəl.

Yarın yara can borcu var,

Yar bağrımı, buda, gözəl.

Sığmır səbətə hər çiçək,

Tər çiçəyin özü gerçək.

Söz də zamanında göyçək,

Aynasında buta, gözəl.

Əsgəroğlu, eşqimdi şah,

Şahələnib budaq-budaq.

Qüdrətdən çəkilib bu dağ,

Könlümcədir bu dağ, gözəl.

***

Mən gedirəm, Allah bilir,

Bir də nə vaxt qayıdacam.

Susmaz könlüm bu eşq ilə,

Demə, nahaq qayıdacam.

Umud gəlir axın-axın,

Sinəm güldü, yarın baxın.

Bəlkə sabahdan da yaxın,

Bəlkə sabah qayıdacam.

Əsgəroğlu, gəz bu halnan,

Öl-ölənnən, qal-qalannan,

Qoy sözünü kəsim balnan,

Nəymiş günah, qayıdacam.

***

Sözün özü güldü, balam!

Ruzigar əssə, solmaz ki…

Bu ömür beş gündü, balam!

Beşi də qara olmaz ki…

Umudlar sabaha uyar,

Barsız şair qəm budayar.

Bağrı tıncıxan quyular,

Su tökmək ilə dolmaz ki…

Durdum üz-üzə fələknən

Mən qələmnən, o lələknən.

Bəyaz donlu bir mələknən

Gəlib canımı almaz ki…

Əsgəroğlu, olur nələr?

Yazılar qanlı namələr.

Binası küskün xanələr,

Düzlənər, izi qalmaz ki…

***

Ötər ruzgar acı-acı,

Özündən ötürmə məni.

Karvan-karvan yüküm bəlli,

Körpülər götürməz məni.

Şahə qalxar and-amanlar,

Silkələnər xanimanlar.

Sinəmi didər aslanar,

Tülkülər bitirməz məni.

Köçündən yayınan quşun

Köksündə dayanar qurşun.

Çinar kimi şah duruşum

Diz üstə gətirməz məni.

Əsgəroğlu, ölüm yalan,

Bu söz ki, çürüməz, balam!

Dan yerində sevdalanan,

Sabahlar itirməz məni.

***

Yaxına, uzağa can deyən dostam,

Canımdan vurulsam, qəm yeyən

dostam.

Çox gəzib-arama, sən deyən dostam

Ömür təşnəsidir bu yol - bu yolaq.

Oğlum, gəl dost olaq!

fələyin can üzən səksəkəsindən,

Düşdüm bəlaların lap yekəsindən.

Tanrı qismətinin bir tikəsindən,

Sevgi daşımışam mən qucaq-qucaq,

Oğlum, gəl dost olaq!

Səngərdir, qaladır düşmən çəpərin,

Daşı dəlib keçər zorun, təpərin.

Baldan şirin olur barın, bəhərin,

Müqəddəs türbədir bu ana torpaq,

Oğlum, gəl dost olaq!

Bir inam körpüsü yarada bilsən,

Görərsən mininə imansan, pirsən.

Düz olsan əyrini haqnan kəsərsən,

Haqqın dərgahıdır son dayanacaq

Oğlum, gəl dost olaq!

İlahi yazıdır, sultandır qələm,

Yananı ürəkdir, amanı kərəm.

Kişilik dediyin başqa bir aləm,

Şükranə deyilmi bu od, bu ocaq?

Oğlum, gəl dost olaq!

Birinə könül ver, göz üstə saxla,

Günün arzuları ötür sabahla.

Baş-başa dayanıb bu səcdəgahla,

İnsanlıq eşqinə mayak ol, mayak,

Oğlum, gəl dost olaq!

Dedilər, kişi ağlamaz…

İblisindən xeyir görüb,

Şeytana bel bağlamadım.

Dostdan bəla gəldi, gülüm,

Öpdüm, qonaq saxlamadım.

Dərd əritdi gələn dərdi,

Yaxın baxdı, qardaş güldü.

Yad mənə sevgi göndərdi,

Azdı, çoxdu, yoxlamadım.

Vurdu könlümü qara yaz,

Tutdu sözüm, inlədi saz.

Dedilər, kişi ağlamaz,

Kişi olub ağlamadım.

Ədalət Əsgəroğlu

Ədəbiyyat qəzeti.- 2013.- 27 dekabr.- S.8.