Azərbaycan Texniki Universitetində xalq şairi

Məmməd Arazın anadan olmasının

80 illiyi qeyd edildi

Azərbaycan Texniki Universitetində xalq şairi Məmməd Arazın 80 illiyinə həsr olunmuş yubiley tədbiri keçirilmişdir.

AzərTAc xəbər verir ki, tədbiri giriş sözü ilə açan universitetin prorektoru İsa Xəlilov milli poeziyamızın görkəmli nümayəndəsi Məmməd Arazın 80 illik yubileyinin keçirilməsi haqqında Azərbaycan Respublikası Prezidentinin 2013-cü il 27 sentyabr tarixli sərəncamının əhəmiyyətindən danışmışdır. Diqqətə çatdırmışdır ki, bu sərəncam əsasında paytaxt Bakıda və bölgələrdəki bütün təhsil müəssisələrində və mədəniyyət ocaqlarında unudulmaz şairimizin silsilə yubiley tədbirləri keçirilir. Bugünkü tədbir də bunlardan biridir.

İsa Xəlilov demişdir ki, xalqın ürəyində yaşayan, şeirləri ilə hər kəsin qəlbində yenidən doğulan, illər keçdikcə milli poeziyamızda silinməyəcək izlər buraxan Məmməd Araz bu gün də bizim müasirimiz olaraq qalır. Şairin zəngin, çoxcəhətli poeziyası barədə mətbuatda xeyli yazılar çap olunmuş, onun poetik dünyasının inciləri daim ədəbi tənqidin diqqətində olmuşdur. Ədəbi araşdırmalar təsdiq etmişdir ki, Məmməd Araz XX əsr Azərbaycan poeziyasında Səməd Vurğundan sonra xalqın ruhuna, mənəviyyatına ən doğma şairlərdən biridir.

Qeyd olunmuşdur ki, Məmməd Arazın poeziyası milli-mənəvi varlığımıza ucaldılmış əbədiyyət abidəsidir. Tarix bizdən uzaqlaşdıqca, Məmməd Araz bizə daha da yaxınlaşacaq, əzəmətli görünəcəkdir. Çünki onun şeirlərinin mayası səmimiyyətdən və həqiqətdən yoğrulmuşdur.

Məmməd Arazın azərbaycançılıq məfkurəsini yaradan şairlərdən biri olduğu diqqətə çatdırılmışdır. Vurğulanmışdır ki, Azərbaycanda istiqlal təfəkkürünün formalaşmasında və təkamülündə xüsusi rolu olan Məmməd Araz poeziyası fikir dərinliyinə və sadəliyinə görə geniş oxucu kütləsinin rəğbətini qazanmışdır.

Universitetin Azərbaycan dili və pedaqogika kafedrasının müdiri Həbib Mirzəyev isə vətənpərvərlik duyğuları ilə zəngin Məmməd Araz yaradıcılığının Azərbaycan poeziyasının parlaq səhifələrindən birini təşkil etdiyini bildirmişdir. Demişdir ki, şairin dərin ictimai məzmunlu lirikası Vətən təbiətinin gözəlliklərindən, böyük tarixi keçmişimizdən və milli ədəbi fikrin tükənməz xəzinəsindən qaynaqlanmışdır.

Bildirilmişdir ki, Naxçıvan adlı gözəl bir bölgəmizdə - Şahbuz rayonunun Nurs kəndində İnfil kişinin ailəsində dünyaya göz açan Məmməd Araz Azərbaycanın şeir və söz sənətinin qüdrətini dünyaya tanıtmışdır. Şair bu gün haqq dünyasında olsa da, xalqımızın qəlbində yaşayır və yaşayacaqdır.

Tədbirdə şairin həyat yoldaşı Gülxanım Fətəliqızı Məmməd Arazlı günləri ilə bağlı xatirələrini bölüşmüş, universitetin müəllim və tələbələrinin suallarını cavablandırmışdır.

Tədbirin sonunda universitetin tələblərinin Məmməd Arazın şeirləri əsasında hazırladıqları ədəbi-bədii kompozisiya təqdim olunmuşdur.

Ədəbiyyat qəzeti.- 2013.- 27 dekabr.- S.5.