Teatrşünaslığımızın tarixindən
Azərbaycan dramaturgiyasının bünövrəsi
Azərbaycan teatrından əvvəl qoyulduğu
kimi, Azərbaycan
teatrşünaslığının yaşı da professional səhnə sənətinin
yaranmasından əvvəl başlanır.
Dramaturgiyamızın banisi, böyük mütəfəkkir və ədib
Mirzə Fətəli Axundzadə
teatrşünaslığın üç
qolundan biri olan dram nəzəriyyəsindən
yan keçməmiş, səhnə sənətimiz
haqqında öz fikirlərini bildirmişdir. Axundzadənin dramaturgiya haqqındakı fikirlərinin
nüvəsini bir maarifçi
kimi “Dram sənətinin
məqsədi insanların əxlaqını
yaxşılaşdırmaq, oxucu və qulaq asanları ibrətləndirməkdir”
fikirləri təşkil etdiyi kimi, onun səhnə sənəti
barədə nəzəri fikirləri 1859-cu ildə “Təmsilatı”na
ön söz kimi yazdığı “Fehristi-kitab” məqaləsindəki
aşağıdakı kəlamlarda öz
əksini tapıb: “Təəccüb yerində
- mütəəccib ol, sual
yerində - sail, xövf
yerində - xaif ol,
heyrət yerində - hayir, sükut
yerində - sakit ol, zöhk yerində - zahik, büka yerində - baki ol, qeyz yerində - qaiz, şəfqət yerində - müşfiq ol, heybət
yerində - mühib, istehza
yerində - müstəhzi ol,
çığırmaq yerində - çığır, ahəstə
mükaliməni - ahəstə oxu, qoca mühakiməsində - qocamanənd
söylə və erməni danışığında - erməni
tələffüzünü mülahizə elə, qalan zad mövqufdur
sənin öz qabiliyyətinə”. Göründüyü kimi, maarifçilik
ənənələrinə sadiq, səhnədəki
hadisələri reallığa, həyata
yaxınlaşdıran, tamaşada bu hadisələri olduğu
kimi, şübhəsiz, ümumiləşdirilmiş
şəkildə görmək istəyən M.F.Axundzadə öz dram əsərlərinin
nümunəsində Azərbaycan teatrının
gələcək inkişaf mərhələləri
ilə əlaqədar narahatçılığını bildirir, səhnə sənətimizin realist yollarla irəliləməsini
tövsiyə edir, arzulayırdı.
Görkəmli maarifçi-filosof
yuxarıdakı fikirlərini yazanda nə
professional teatrımız, nə də mətbuatımız
mövcud idi.
Şübhəsiz, teatrşünaslıq elminin
pərvazlanması üçün
bunların hər ikisi zəruri idi.
1873-cü ildə Axundovun ən
böyük arzularından biri
həyata keçdi. Onun “Sərgüzəşti-vəziri-xani-Lənkəran”
pyesinin tamaşası ilə peşəkar
səhnə sənətimiz ilk
addımlarını atmağa
başladı. Ondan cəmi iki il sonra
isə “Əkinçi” qəzeti ilə mətbuatımızın
əsası qoyuldu. “Əkinçi”nin
ayağı düşərli oldu. Bir-birinin
ardınca Bakıda və Tiflisdə Azərbaycan və rus dillərində nəşr olunan
qəzet və jurnallar işıq üzü gördü. “Kəşkül”
(Baxçasarayda çıxırdı),
“Novoye obozreniye”, “Bakinskiye izvestiye”, “Şərqi-Rus”,
“Kaspi”, “Baku”, “Həyat”,
“İrşad”, “Tərəqqi”, “Səda”,
“Yeni iqbal”, “Bəsirət”
və s. qəzet və jurnallar
işıq üzü gördü. Mətbəələrin
açılması kitabların çıxmasına rəvac
verdi. Beləliklə, ictimai-iqtisadi
şərait bir çox
sahələrdə olduğu kimi, Azərbaycan
teatrşünaslığının inkişafı üçün də şərait
yaratdı. Mətbuat istər-istəməz
teatrşünaslığımızın mühüm
qolu olan teatr tənqidindən də yan
ötə bilməzdi. O zaman əsasən
informasiya, xəbər xarakteri
daşıyan məqalələrdə “filankəs
alqışlarla qarşılandı,” “filankəs rolunun sözlərini bilmirdi”
və s. bu səpkili
fikirlərdə bəsit də olsa teatr tənqidi cücərirdi. Amma
çox keçmədi ki,
get-gedə tamaşalar, ümumiyyətlə,
teatr haqqında nisbətən geniş fikirlər söylənməyə
başladı. Bu sahədə Azərbaycan
yazıçılarının fikirləri daha
professional, daha analitik keyfiyyət kəsb edirdi.
Xüsusən Azərbaycan dramaturqlarının - Nəcəf
bəy Vəzirovun, Nəriman Nərimanovun, Əbdürrəhim
bəy Haqverdiyevin, Cəlil Məmmədquluzadənin
yazılarında daha çox
professionallıq duyulurdu. Bu
sıraya böyük mütəfəkkir,
dahi bəstəkar və dramaturq
Üzeyir bəy Hacıbəylinin də
adını əlavə edə bilərik. Onlar
dram əsərləri, tamaşalar,
aktyor dostlarının
yaradıcılığı haqqında fikirlər söyləməklə
səhnə sənətinin müxtəlif sahələrinə
baş vurmuş olurdular. Beləliklə də bu
şəxsiyyətlər Azərbaycan mədəniyyəti
tarixində əsasən dramaturq kimi qalsalar da,
teatr nəzəriyyəçisi, tənqidçisi
və tarixçisi kimi
də xatırlanırlar. Bu görkəmli
simaların arasında Əbdürrəhim bəy Haqverdiyev teatrşünas kimi daha hərtərəfli
fəaliyyət göstərmişdir. Onun
teatr tarixinə dair
araşdırmaları bu gün
də öz aktuallığını
itirməyib. Görkəmli yazıçı və dramaturq bunlarla kifayətlənməyib
bədii yazılarında da teatr haqqındakı mülahizələrini bildirirdi.
1909-cu ildə Gəncədə yerli
həvəskarlar cəmiyyəti Mirzə Məhəmməd
Axundzadənin “Teatro nədir” adlı kiçik bir
kitabçasını nəşr etdilər. Bu
kitab Azərbaycanda teatra
dair ilk kitabdır. Müəllif kitabında teatrı aynaya,
güzgüyə bənzədir və bildirir
ki, necə ki, bir insan güzgüdə öz eyblərini görüb
düzəldir, öz teatrını yaradan millətlər də səhnədə
eyiblərinə, əyər-əskiklərinə baxıb
onları islah edir.
Azərbaycan Cümhuriyyəti qurulduqdan
sonra “Övraqi-nəfisə” adlı incəsənət
jurnalı çıxmağa başlayır. Cəmi bir neçə sayı dərc olunan ilk toplumuzun
səhifələrində Azərbaycan teatrına xüsusi yer
ayrılmışdı.
Azərbaycanda sovet hakimiyyətinin
qurulması yeni bir
ideologiyanı sənətə gətirdi. İş
burasında idi ki, teatrda olan əyintilər,
çatışmazlıqlar bu dövrdə
teatr tənqidində də özünü büruzə verirdi.
Rejissor sənəti, aktyor
ifaları günü-gündən püxtələşir, inkişaf edirdi. Bunu o dövrün
teatrşünaslığı da təsdiqləyir.
Tənqid bu sahədə
teatrın həm uğurlarını göstərir, həm də
çatışmazlıqları diqqətə
çatdırırdı. Amma söhbət
tamaşaların təhlilindən, mahiyyətindən
düşəndə teatrşünaslıq elmi
teatrın dadına vaxtında çata bilmir, bəzi hallarda onu çaşdırırdı.
Əgər fikrimizi ümumiləşdirməli
olsaq, deyə bilərik ki,
bu zaman hələ özü belə püxtələşməyən,
kövrək addımlarını atan
teatrşünaslıq elmimizdə üç
müxtəlif dünyagörüşü
qarşı-qarşıya dayanmışdı. Bunlardan biri teatrın ənənəvi
yolunu qoruyan, fikirlərində
ona söykənən tənqid idi. Digər iki dünyagörüş bir
kökdən qayələnsələr də, iki
zidd dünyagörüşü
kimi diqqəti çəkirdilər. Belə ki, cəmiyyətdə “yeni dünya” qurmaq istəyən bəzi qələm sahibləri
teatrşünaslığı, teatrı həddindən ziyadə
siyasiləşdirir, sənətə düz
yol göstərmək əvəzinə onu sola doğru
əyir, hətta dram əsərlərinin
mövzusunu belə dəyişməyə
təhrik edirdilər. Bu dövrdə - ötən əsrin 20-ci illərinin sonu, 30-cu illərinin əvvəllərində
Məhəmməd Sadiq Əfəndiyev, Mustafa Quliyev, Əsəd Tahir, İbrahim Xəlil,
eləcə də Cəfər Cabbarlı kimi
qələm sahibləri səhnə sənəti haqqında
söylədikləri fikirlər bəzən bir-birinə
zidd olurdu. Amma çox keçmədi
ki, Azərbaycan
teatrşünaslığında bir sabitlik yarandı.
Azərbaycan yazıçıları və ədəbiyyatşünasları
səhnə sənətinə biganə qalmadılar, öz fikir və
mülahizələrini bildirməyə başladılar. Dünya, xüsusən də rus
səhnə sənəti və teatrşünaslıq ənənələri
ilə tanışlıq onların tənqidi fikirlərini
müəyyən professional məcraya
yönəltməkdə mühüm rol oynayırdı.
Ötən əsrin 30-cu illərinin sonunda və 40-cı illərində Azərbaycan
teatrşünaslığı ilə artıq təkcə
jurnalistlər, mətbuat işçiləri deyil
ədəbiyyatşünaslar da məşğul
olmağa başladılar.
Onların sırasında Əziz Şərif,
Mikayıl Rəfili, Məmməd Arif, Abbas Zamanov, Hüseyn Mehdi, Əli
Sultanlı kimi qələm sahibləri var idi. Bu
da təsadüfi deyildi.
Azərbaycan ədəbiyyatşünaslığı
teatrşünaslığımızdan daha
tez formalaşmış, bir
çox hallarda bu sahədəki vaakuma tərəf
axırdı. Onların yazıları, tənqidi məqalələri
təkcə informatik xarakter
daşımırdı. Bu yazılar üçün analitik
araşdırma, dünya teatrı
haqqında məlumat, rejissor və aktyor sənətinin təhlilinə cəhd duyulurdu. Bu qələm
sahibləri özlərini teatrşünas
adlandırmasalar da, bu
iddiada olmasalar da, fundamental Azərbaycan
teatrşünaslığının bünövrə
daşlarını qoyur, ya
da ən azından onun
vaxtının çatdığını yada
salırdılar.
Fundamental Azərbaycan
teatrşünaslığının bünövrəsinin
qoyulması, akademizm səviyyəsinə
çatdırılması bütün
yaradıcılığını bu sahəyə
həsr etmiş, görkəmli alim Cəfər Cəfərovun adı ilə
bağlıdır. Məhz onun
səyi nəticəsində ilk dəfə
olaraq indiki Akademik Milli Dram Teatrının nümunəsində teatr tariximiz hərtərəfli
araşdırılmağa başlandı. Cəfər müəllimin
Azərbaycan dramaturgiyasının, teatr sənətinin
müxtəlif sahələrinə aid
araşdırmaları, nəzəri-estetik fikirləri
çoxşaxəlidir. Amma onun Azərbaycan Dövlət Akademik
Milli Dram
Teatrının tarixinə dair
araşdırmaları və Azərbaycanda professional
teatrşünaslarını yetişdirməsi sahəsindəki
xidmətləri əvəzsizdir.
Məlum olduğu kimi, 1945-ci ildə
Azərbaycanda ilk ali səhnə
təhsili ocağı - Azərbaycan Dövlət Teatr İnstitutu
yaradıldı. İnstitutda aktyorluq və rejissorluq sənəti
ilə yanaşı, bir neçə il teatrşünaslıq fakültəsi də
fəaliyyət göstərirdi. 1950-ci ildən başlayaraq ilk dəfə
olaraq teatrşünaslar ali təhsil diplomu
aldılar. Onlardan bəziləri bu ixtisas üzrə
işləmədi. Bəziləri isə ədəbi
yaradıcılıqla məşğul oldular.
Bu sırada Hüseyn
Abbaszadənin, İsaq İbrahimovun,
Əli Kərimin və s. adlarını
çəkə bilərik. Bir qismi isə bədii yaradıcılıqla
yanaşı, teatrşünaslığın müxtəlif
sahələrində fəaliyyət göstərməyə
başladılar. Məsələn, Adil Babayev həm şair, həm
dramaturq, həm də teatrşünas
kimi tanındı. Yaxud
Əli Səmədli uşaqlar üçün dram əsərləri
yazmaqla yanaşı,
teatrşünaslıq fəaliyyətini də davam
etdirirdi. Bir qism isə sırf teatrşünaslıq fəaliyyəti
ilə məşğul olurdu. Onların sırasında Cabir Səfərov,
Adilə İsmayılova, Turan Cavid, İnqilab Kərimov,
Adilə İsgəndərova, Rahib Hüseynov və digərləri də
vardı. Sonrakı illərdə aktyorluq
fakültəsini bitirmiş Mahmud Allahverdiyev və
Bakı Dövlət Universitetinin məzunu
Ədilə Əliyeva da teatrşünas
kimi fəaliyyət göstərməyə
başladı. Veta Nadirova
isə ən çox rusdilli
mətbuatda çıxış edirdi. Azərbaycan MEA-nın Memarlıq və İncəsənət
İnstitutunda teatr
şöbəsinin yaradılması və ona
rəhbərliyin Cəfər Cəfərova
tapşırılması ötən əsrin 50-ci illərindən
sonra Azərbaycan
teatrşünaslığının formalaşmasında mühüm əhəmiyyət kəsb etdi. Dram və teatr nəzəriyyəsini
dərindən bilən, teatr tarixi ilə bağlı sanballı, ciddi araşdırmalar aparan
Cəfər Cəfərov öz ətrafına
istedadlı teatrşünasları, bu sahəyə
həvəsi olanları yığır, onları elmi işlərə cəlb edir,
teatrşünaslıq sahəsindəki boşluqları doldurmaq üçün onlara müxtəlif elmi mövzular verirdi. Onun
şöbəsi ilə əlaqə saxlayanlar,
əməkdaşlıq edənlər görkəmli alimin məsləhəti, çox
zaman rəhbərliyi ilə həm Azərbaycan
teatr tarixinin müxtəlif
dövrlərini araşdırır, həm də
ayrı-ayrı sənətkarların, səhnə ustalarının
yaradıcılığına nəzər yetirir, onların sənət və ömür yolları haqqında sanballı kitablar hazırlayırdılar. “Axundov və teatr”, “Əbdürrəhim
bəy Haqverdiyev və teatr”,
“Nəriman Nərimanov və teatr”, daha sonrakı dövrlərdə “Cəlil Məmmədquluzadə
və teatr” və s. bu səpkili mövzularının işlənməsi
məhz Cəfər Cəfərovun təşəbbüsü,
onun teatrşünaslıq elmimizin
inkişafı naminə uzunmüddətli planı əsasında
baş tutmuşdu. Azərbaycan
teatrşünasları bu elmin
müxtəlif sahələri üzrə araşdırmalar aparmağa, həmin sahənin mütəxəssisi
kimi tanınmağa başladılar. Mahmud Allahverdiyev Azərbaycan xalq
teatrının tarixini, İlqilab
Kərimov professional teatrın tarixini, Tamilla Yusifbəyli
Şekspirin əsərlərinin, Ədilə
Əliyeva rus klassiklərinin Azərbaycan
teatrında səhnə təcəssümünü araşdırırdı.
Cabir Səfərov teatr
tənqidçisi kimi mətbuatda
çıxış edirdi. Rahib Hüseynov Cəfər
Cabbarlı və Azərbaycan teatrı, Tamilla
Təhmasib Hüseyn Cavidin
pyeslərinin təcəssümü ilə məşğul idi.
Adilə İsmayılova respublikada
xarici ölkələr üzrə teatr mütəxəssisi kimi
tanınmışdı. Onun antik və Avropa
teatrlarının tarixindən bəhs edən kitabları bu gün də dərslik kimi istifadə olunur.
XX əsrin II yarısında Azərbaycan ədəbiyyatşünasları
da teatrşünaslıq sahəsində fəaliyyətlərini
davam etdirirdilər. Məmməd Arif, Məmməd Cəfər, Xalid
Əlimirzəyev, Qulu Xəlilov, Əkbər
Ağayev, İslam İbrahimov və b. teatr və dramaturgiyanın müxtəlif
problemləri barədə resenziyalarla mətbuat
səhifələrində çıxışlar edirdilər.
Onların sırasında görkəmli alim
Yaşar Qarayevin
resenziyaları xüsusilə diqqəti çəkir, öz professionallığı ilə nəinki
teatrşünasların diqqətindən kənar qalmır, çox zaman onları
üstələyirdi.
Yazılarının
professionallığı, dərin fəlsəfi-estetik təfəkkürü
ilə teatrşünaslarımızı üstələyən
sənətkarlardan biri də səhnə
sənətinin və dramaturgiyanın incəliklərini bilən,
dərin fəlsəfi-estetik təfəkkürə malik görkəmli rejissor
Mehdi Məmmədov idi. Hələ gənc
yaşlarından mətbuatda resenziyaları ilə diqqəti
çəkən Mehdi Məmmədov mətbuatda
resenziyalarla müntəzəm
çıxış edirdi. 60-cı illərdə
sanballı işi olan,
bu günə kimi də
əhəmiyyətini itirməyən, “Həyat və sənət
yollarında”, “Azəri dramaturgiyasının estetik
problemləri” kitabları uzun illərin
araşdırmalarının nəticəsi idi.
1965-ci ildən başlayaraq keçmiş
teatr, həmin illərdə M.A.Əliyev
adına İncəsənət İnstitutu,
indiki Azərbaycan Dövlət Mədəniyyət
Universitetində teatrşünaslıq fakültəsi yenidən
fəaliyyətə başladı. Bu
fakültədə ixtisas dərslərini
Cəfər Cəfərov, Mehdi Məmmədov, İslam
İbrahimov, Turan Cavid, Cabir Səfərov
aparırdılar. Sonralar onların
sırasına İnqilab Kərimov, Mahmud Allahverdiyev də qoşuldu. Onların əksəriyyəti təkcə
pedaqoji fəaliyyət göstərmirdilər.
Eyni zamanda mətbuatda
resenziyalarla, teatrın müxtəlif
problemlərinə dair məqalələrlə
çıxış edir, Azərbaycan teatr tarixinə dair kitablar yazırdılar. Onların zəhməti
sayəsində şərti olaraq ikinci nəsil adlanan teatrşünaslar yetişdi.
Azərbaycan Dövlət
Mədəniyyət və İncəsənət Universitetində
prorektor vəzifəsində
çalışan, teatr tənqidinin tədqiqi
ilə məşğul olan Rafiq Sadıqov, Azərbaycan
teatrşünaslığında rejissor sənətinin
araşdırıcısı Novruz Təhməzov,
teatrşünaslar Əliağa Sədirov,
Atababa İsmayıloğlu (Hacıbabayev), sənətşünaslıq
elmləri doktoru üzrə müdafiə
etmiş, professor İlham Rəhimli hələ tələbəlik
illərindən mətbuatda çıxış etməyə
başladılar. Onların məqalələri o dövrün ən nüfuzlu qəzeti olan “Kommunist”, “Ədəbiyyat və incəsənət”,
“Azərbaycan gəncləri” qəzetlərinin səhifələrində
işıq üzü görməyə
başladı. Sonradan həmin “İkinci nəsil” teatrşünaslardan
olan Məryəm Əlizadə də əvvəl
filologiya üzrə namizədlik, sonra sənətşünaslıq üzrə
doktorluq işi
müdafiə etdi. Mədəniyyət və
İncəsənət Universitetində professor
vəzifəsinə yüksəldi, “Seyr və
sehr”, “Dördüncü
ölçünün rəngi ilə”
kitablarını ərsəyə gətirdi. Teatrşünaslıq
ixtisasına yiyələnməsə də, amma
teatr həyatını dərindən bilən
Məmmədşah Atayev də teatr tarixi sahəsində
müəyyən axtarışlar apardı. “Cəlil Məmmədquluzadə
və teatr” mövzusunda
namizədlik işi müdafiə etdi, bir neçə kitab yazdı. Əlbəttə, bütün bu insanların ötən əsrin 60-cı illərinin
sonundan başlayaraq Azərbaycan
teatrşünaslığının inkişafında müəyyən
əməyi var. Amma bir
qədər kənardan çəkilib Azərbaycan
teatrşünaslığının mənzərəsinə
yüksəkdən baxsaq, sonrakı dövrün teatrşünaslığına
nəzər yetirsək, orada üç nəfərin bu
sahədəki yaradıcılığının bir mərhələ təşkil etdiyinin şahidi
olarıq. Cəfər Cəfərovun, Qulam
Məmmədlinin və İlham Rəhimlinin.
Ola bilsin ki, bu fikirlərimizlə
kimlərsə razılaşmasın. Amma bizim də əlimizdə müəyyən
arqumentlər var. Çünki
bu teatrşünasların hər biri Azərbaycan
teatrşünaslığının inkişafına müəyyən
yenilik gətirmişlər. Elə bir yenilik ki,
bu yeniliyi təkrarlamaq
çətindir. Onların yaradıcılığı bir-birini təkrarlamasa da,
Azərbaycan teatrşünaslığı adlanan
qobelini, xalını tamamlayırlar.
Görkəmli teatrşünas
Cəfər Cəfərovun Azərbaycan
teatrşünaslığına gətirdiyi yenilik
nədən ibarət idi? Cəfər Cəfərov
ilk növbədə Azərbaycan
teatrşünaslığını elmiləşdirdi. Onun resenziyalarında, məqalələrində
və kitablarında teatrın bütün
komponentlərindən bəhs olunurdu. Artıq
o “tamaşaçı” - tənqidçi,
teatrşünas deyildi.
Onun qələmindən
çıxan yazılar təkcə dramaturqun,
rejissorun və aktyorun
oyununa işıq salmırdı, eyni zamanda tamaşanın
tərtibatından, musiqisindən və səhnə sənətinin
digər nüanslarının, komponentlərinin əhəmiyyətindən
söhbət açırdı. Əgər ümumiləşdirilmiş
şəkildə desək, teatrşünaslığımızın
poetikasının və estetikasının bünövrəsi
məhz Cəfər Cəfərov tərəfindən qoyulmuşdur. Görkəmli teatrşünas eyni zamanda fundamental Azərbaycan
teatrşünaslığının əsasını qoydu. İlk dəfə olaraq o, Azərbaycan Dram Teatrının yaranması və
inkişafı mərhələləri ilə məşğul
olmağa başladı. Azərbaycan Dram Teatrının tarixini
yazmağa başladı. Bu
araşdırma Azərbaycan Dram
Teatrının nümunəsində teatr tariximizin araşdırılması demək idi. Azərbaycan rejissorları və
aktyorları barədə ilk fundamental elmi
araşdırmalar da məhz Cəfər Cəfərova
məxsus idi. Bu səpkili
araşdırmalar ondan sonra
gələn teatrşünasların
yaradıcılığı üçün
bir örnək, nümunə idi. Onun bu
silsilədən olan yazıları
neçə dəfə işlənmiş şəkildə
nəşr olunmuşdur. Azərbaycan
Dram Teatrı kitabı, Cahangir
Zeynalovun, Hüseyn Ərəblinskinin,
İsmayıl Hidayətzadənin və digər sənətkarlarımızın
yaradıcılığına həsr etdiyi
monoqrafiyaları təkcə Azərbaycan səhnə sənətinin
tarixdə qalmış səhifələrini bərpa edib, işıq salmırdı. Eyni zamanda öz
elmiliyi, professionallığı,
yazılış diliylə seçilirdi.
Bu yazılarda axıcı, səlis dilin arxasında elmi
mühakimələr, düşüncələr oxucunun beyninə hopurdu. Teatrşünas alim elmi fikirlərini çatdırmaqla
yanaşı, oxucularını yormurdu. Bu da onun
yazılarını kütləviləşdirirdi.
Cəfər müəllimin Azərbaycan
teatrşünaslığının qarşısında ən
böyük xidmətlərindən biri də bu sahədə milli kadrları yetişdirməsi idi. Azərbaycan Milli Elmlər
Akademiyasının Memarlıq və İncəsənət İnstitutunun teatr və kino şöbəsinə
başçılıq edən tanınmış alim onlarla mütəxəssisin
yetişməsi üçün əlindən
gələni əsirgəmədi. Onun və
o dövrdə onun kimi alimlərin təmənnasız
qayğıları, diqqətləri onlarla
mütəxəssis kadrların yetişməsinə təkan oldu. Bu əməl bu gün çoxlarına
görk, ibrət ola
bilər. Cəfər müəllimin vəfatından
sonra Memarlıq və İncəsənət
İnstitutunun Teatr və
kino şöbəsinə
başçılıq etmiş Ədilə
Əliyeva, İnqilab Kərimov, eləcə
də teatrşünaslıq elmi sahəsində
ciddi araşdırmalar aparmış Mahmud Allahverdiyev, Tamilla Yusifbəyli, Adilə Səfərova, Ədilə
İsgəndərova və başqaları məhz Cəfər
Cəfərovun diqqət və qayğısı sayəsində
elmi dərəcələr almış,
kitablarını dərc etdirmişlər. Cəfər müəllimin
və onun yetişdirdiyi
kadrların çalışmaları sahəsində filoloqlar, ədəbiyyatşünaslar
teatrşünaslıq elmi ilə ədəbiyyatşünaslıq
elmi arasındakı fərqi hiss etdilər. Beləliklə,
teatrşünaslıq elmimiz özünü təsdiq etdi.
Getdikcə, filoloqlar öz
sahələri ilə məşğul olmağa
daha çox üstünlük verdilər. Teatr
tarixi olduğu kimi, teatr tənqidi və
nəzəriyyəsi, onun estetik
prinsipləri ilə də teatrşünaslar
məşğul olmağa
başladılar. Bütün bunlara görə Azərbaycan
teatrşünaslıq elmi Cəfər Cəfərova
minnətdardır.
Atababa İsmayıloğlu
Ədəbiyyat qəzeti.-
2013.- 1 fevral.- S.7-8.