Teymur Bünyadov – 85

Hörmətli Teymur müəllim!

Sizi - görkəmli alim və istedadlı yazıçını 85 illik yubileyiniz münasibətilə təbrik edirik.

Siz ölkəmizin tanınmış tarixçi alimlərindənsiniz. Xalqımızın çoxəsrlik tarixi ilə bağlı neçə-neçə sanballı əsərin müəllifisiniz. Maraqlıdır ki, elmi fəaliyyətlə yanaşı, siz bədii yaradıcılıqla da məşğulsunuz. İlk mətbu əsəriniz - "Narahat ürək" hekayəniz 1974-cü ildə "Elm və həyat" jurnalında dərc olunmuşdur. 1991-ci ildə "Yazıçı" nəşriyyatında yüksək tirajla nəşr edilmiş "Göz yaşları" romanınızda bir nəslin timsalında xalqımızın repressiya illərində, müharibə və mübarizədən sonrakı dövrdə başına gələn müsibətlər qələmə alınmışdır. "Bir qız bir oğlanındır" adlı povest və hekayələr kitabınızda adət-ənənələrimiz, vətənpərvərlik, düzlük, etibar məsələləri əksini tapır.

Siz qələminizi poeziyada da sınamısınız. "Öpərdim gözlərindən", "Bilsəydim ayrılıqdır", "Gül açılır, yaz olur" kimi kitablarınıza daxil edilən bayatılarınız təbiiliyi, oxunaqlığı, dərin məzmunu ilə yadda qalır.

Əsasən tarixi mövzuda yazırsınız. Əsərlərinizin dəyəri həm də ondadır ki, bu əsərlər etnoqrafiyamızı, tariximizi öyrənmək üçün dəyərli vəsaitdir.

Siz 1951-ci ildə indiki Bakı Dövlət Universitetinin tarix fakültəsini bitirib, həmin il Moskvada SSRİ EA Maddi-Mədəniyyət İnstitutunun aspiranturasına daxil olmusunuz. 1955-ci ildə namizədlik dissertasiyası müdafiə edərək Vətənə qayıtmısınız. Həmin vaxtdan Azərbaycan MEA Tarix İnstitutunda çalışırsınız. Tarix elmləri doktoru, AMEA-nın akademikisiniz. 1991-ci ildə Azərbaycan Respublikası Milli Məclisinin deputatı, bir il sonra Milli Məclisin Elm, təhsil məsələləri daimi komissiyasının sədri seçilmisiniz.

Hörmətli Teymur müəllim!

Sizi bir daha yubileyiniz münasibətilə təbrik edir, sizə uzun ömür, cansağlığı, yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2013.- 1 fevral.- S.5.