Mələklər
ötdüyü yerdə…
Firuzə Məmmədli:
"Seçilmiş əsərləri".
VI cild. "Nurlan"
"Firuzə Məmmədli Azərbaycan
poeziyasının zəngin ədəbi ənənələrini
davam və inkişaf
etdirən şairlərimizdəndir. Onun
şeirləri də özünə bənzəyir; bir az kövrək, bir az həzindi, yeri gələndə bir az da sərtdi. Hisslərin,
emosiyaların bədii ifadəsində nə qədər səmimidirsə,
gerçəklikdəki və insanların
qarşılaşdığı müxtəlif problemlərin
mənalandırılmasında da bir o qədər təbiidir.
Olduğundan artıq görünməməyə
çalışması onun şeirlərinə
cəlbedicilik verir. Sözə
həssaslıqla və məsuliyyətlə yanaşması, dilinin sadəliyi, gündəlik həyatın
ən adi və ən müxtəlif
faktlarında, hətta dərddə, ölümdə şeiriyyət
tapmaq cəhdi də Firuzə Məmmədli
imzasını imzalar içində fərqləndirir.
Ən azı bütün bunlara
görə onun mənəvi
haqqı var ki, desin: "Mən şairəm…"
Firuzə
Məmmədlinin "Seçilmiş
şeirləri"nin VI cildi xalq yazıçısı Anarın bu dəyərli sözlərilə
açılır. Sonra gəlir xalq şairi Fikrət Qocanın və filologiya elmləri doktoru,
tənqidçi Arif Əmrahoğlunun dəfələrlə
dilə gətirdikləri, qələmə aldıqları
fikirlərdən seçmələr. Hər iki
sənət dostu doğru
olaraq vurğulayırlar ki,
bir qələm əhli, şair
kimi Firuzə
Məmmədli üçün
başlıca olan şey
təriflərdən xumarlanmayan ilham və ürəkdir! Firuzə xanım üçün söz fikrin, hissin, həyəcanın
laylası, eyni zamanda da fəryadıdı, sahilsiz
fəryadı. Onun üçün:
Söz
hasardı, söz divardı,
Dünyanın
iç qapısıdı.
Açmadınsa,
düz divardı,
Açdınsa,
keç, qapısıdı.
Firuzə
xanım heç nəyin onun
yaddaşını söz qədər ələyə
bilmədiyinin fərqindədi, dəqiq əmindi ki, söz döyüşsüz
qələbədir və həmişə, hər yerdə ona sığınmaq, tapınmaq olar. Eyni zamanda
yaxşı bilir ki:
Görmədiyim
günlərin
Gördüyüm əzabı
var.
Tanrının
dəftərində
Hər
kəsin hesabı var.
F.Məmmədlinin
poetik dünyası ənənəvi qoşma, gəraylı ovqatından
qaynaqlanır, eyni zamanda
da çağdaş poetik texnologiyalarının gəlişmələri
də ona yad deyil. Ənənə və müasirliyin
novatorluğu onun
şeirlərinin iç
dünyasından, deyim, ifadə,
münasibət tərzindən bütöv,
boyaboy keçir. İnamla yazır ki:
Çiynimdəki
söz yükü -
Öz
sınağım, öz yüküm.
Hərdən
ağır duz yükü,
Hərdən
həyandır mənə.
Büküldümsə
əmrinə,
Yazılacaq
ömrümə.
Fərmanı
nə, əmri nə, -
Haqdan əyandır
mənə.
Firuzə
xanım əslində hər bir şeirində,
misrasında ona haqdan əyan
olanları yazır, ona verilən şeir, söz
butasının şəklini çəkir. Fikri dəqiq,
münasibəti aydındı:
Hər
gün əlimdən alınan
İçimdəncə
qan çəkirəm.
Məni
talayan sevinir,
Cəzasını
mən çəkirəm.
"Seçilmiş əsərləri"n hər
səhifəsi bu cür
isti, səmimi duyğularla
süslənib. Yetər ki, oxuyaq, yetər ki, onun kimi əmin-arxayınlıqla
deyə bilək:
Mələklər
ötdüyü yerdən
Yenə
yol düşər yollara…
Sərvaz Hüseynoğlu
Ədəbiyyat qəzeti.- 2013.- 15
fevral.- S.7.