Daş yuxuları

Ə.Əkrəmin son hərəkətlərindən təsirlənərək qələmə aldım

Tezliklə Qarabağ azad oluna,

Çin ola xalqımın kaş yuxuları.

Sapı özümüzdən olan "balta"lar,

Atır yaddaşıma "Daş yuxular"ı

Məəttəl qalmışam özüm-özümə,

Ruhuma inanım, yoxsa gözümə?

Düşmən tənə ilə vurur üzümə

Özümünkü yazan boş yuxuları.

Kökü bilinməyən mənşəyə yazaq,

Şöhrətə yamayaq, mənsəbə yazaq.

Hansı dinə yazaq, məzhəbə yazaq -

Bəziləri görən çaş yuxuları?

Gözə dura bilər xalqın əməyi,

Haqdır məzəmməti, haqdır gileyi.

Uşaq ağlı ilə ölçür hər şeyi,

Qocalıq adlanan yaş yuxuları.

Millətin haqqını ayaqlatdırır,

Ürək bulandırır, qan qaraltdırır.

Deyən kimlərisə sayıqlatdırır,

Çillə yuxuları, qış yuxuları.

Qara quraq qalıb, ağa qar yağır,

Dövrana qar yağır, çağa qar yağır.

Dünən güvəndiyin dağa qar yağır,

Quru yuyub sərir yaş yuxuları.

Dədəmiz, babamız namərd olmamış,

Xalqa arxalanan darda qalmamış.

Yuxudan tez durur çimir almamış,

Bəzisi görəndə quş yuxuları.

Göyçə, Dərələyəz, Gorus, Zəngəzur,

Şirin yuxuları gözlərdən qovur.

Niyə həqiqəti yalana yozur?

Ağıllı, ağılsız baş, yuxuları.

Bu sözə tamarzı ağız, dil, dodaq:

Görək azad olub Şuşa, Qarabağ.

Tezliklə qələbə seivnci dadaq,

Çin olsun bu xalqın xoş yuxuları!..

İlham İnam,

Şəmkir rayonunun Y.Seyfəli

kənd orta məktəbinin dil-ədəbiyyat müəllimi

Ədəbiyyat qəzeti.- 2013.- 15 fevral.- S.4.