Tutulan qarışqa

Siçanlar anbarları

Taladılar, uddular,

Bir buğdanı aparan

Qarışqanı tutdular.

Fəxri ad alan tutuquşu

Tutuquşu Bülbülü

Yamsıladı bir dəfə,

Tezcə fəxri ad aldı,

İndi baxırdı kefə.

Rəhbər keçi

Keçi başçı olandan

Sürüdə qoyunlara,

Onları cəlb elədi

Siyasi oyunlara.

Yeriməyən qanun

Elə ki, meşə rüşvət

Libasına büründü,

Qanunlar yerimədi,

İlan kimi süründü.

Nəslindən xəbəri olmayan

Camış potası daim

Danışırdı əslindən,

Ancaq xəbəri yoxdu

Özünün öz nəslindən.

Eşşək südü

Südüm mənim dərmandır -

Eşşək hey söyləyirdi.

O, bu məqsədlə aptek

Açmaq da istəyirdi.

Pişik qayğısı

Məktub yazmışdı Pişik

Siçanlara sayğıyla:

- Sizlərə yanaşıram

Çox şirin bir qayğıyla.

Tacın satan şir

Ümidi qalmışdı tək

Başındakı bir taca,

Şir axır ki, onu da

Çıxarmışdı hərraca.

Artıq yeyən pişik

İgidlikdən dəm vurub

Sinəsinə döyürdü,

Ancaq həmişə İtin

Artığını yeyirdi.

Xama çəkilən süd

Gətirə bilmirdilər

Südü dada - təama,

Çünki çəkmiş idilər

Ondan on dəfə xama.

İlanın məqsədi

İlan dedi vurğunam

Zirvənin havasına.

Məqsədi girmək idi

Qartalın yuvasına.

Mərkəz Qacar

Ədəbiyyat qəzeti.- 2013.- 15 fevral.- S.7.