Bayraq
meydanı
Şirin
söhbət edirdi
İki
uşaq bayaqdan.
Güloğlan
soruşurdu
Yaxın
dostu Budaqdan:
- Olmusanmı, a dostum,
"Bayraq meydanı"nda sən?
O göylərə ucalan
Al bayrağı görmüsən?
Yer üzünün ən uca
Bayrağıdır bu bayraq.
Baxır bütün dünyaya
Alnı açıq, üzü ağ.
Müstəqil olan gündən
Vətənimiz, yurdumuz
Göydən həsrətlə baxır
Bizə günəş, ay, ulduz.
- Haradadır bu meydan?
Olmamışam mən orda.
Xəzər sahilindədir, -
Bayıla gedən yolda.
İstəyirsən gəl səni
Aparım o meydana.
Sən də iftixar ilə,
Sevinc ilə bax ona.
Oğurluq
gül
Yazın son günləridi,
Qızışmışdı havalar.
Öz yerini verirdi
İsti yaya ilk bahar.
Vüqar gəldi küçədən
Bir dəstə qızılgüllə.
Ana dedi: - Hardasan,
Bu üst-baş nədir belə?
- Bu gülləri səninçün
Dərmişəm, - dedi Vüqar.
Götür, götür, ay ana,
Gör nə gözəl ətri var.
Girdim qonşu bağına
Dal qapıdan içəri.
Bir az şirin tut yedim
Gül dərib gəldim bəri.
- Oğruluğa girmişdin
Ay bala, qonşu bağa?
Gəl götür bu gülləri
At gözümdən uzağa.
Qəhrəman
Mübariz
Azərbaycan
xalqının Milli Qəhrəmanı Mübariz İbrahimova
Qəlbi vətən eşqi ilə
Dolu idi,
Elin cəsur, mərd Mübariz
Oğlu idi.
Qoruyurdu ermənidən
Öz yurdunu,
Qorxutmurdu nə top-tüfəng,
Ölüm onu.
Bir gün düşmən gələn
zaman
Üstümüzə,
Qəsd eyləmək istəyəndə
Yenə bizə.
Girdi qızğın döyüşlərə
Cəsur kimi,
Mehdi kimi, Gəray kimi,
Qafur kimi.
Sərdi yerə neçə-neçə
ermənini,
Öz qanına qəltan etdi
düşmənini.
O özü də el yolunda
Şəhid oldu.
Şan-şöhrəti dildə gəzən
İgid oldu.
Gəlmə, düşmən, vətənimə,
Gəmə yaxın!
Mübariz tək oğlu çoxdur
Bu torpağın!
Əmzik
itkisi
İki yaşın
İçindədir
Aybəniz,
Üstü-başı
Daim olur
Tər-təmiz.
Səhər-axşam
Əmzik əmir
O hələ
Xoşu gəlir
Bəsdir demir,
O hələ.
Əmziyini
Qız itirdi
Bir səhər,
Ana onu
Sakit etdi
Birtəhər.
Nənə gəzdi,
Ana gəzdi
Evləri,
Qızın qaçıb
Oynadığı
yerləri
Ancaq ondan
Xəbər verən
Olmadı,
filan yerdə
Gördüm deyən
Olmadı.
Uşaq isə
Hey göz yaşı
Tökürdü,
Ana onu
Qucağına
Götürdü.
Dedi: - Gülüm,
Daha böyük
Uşaqsan,
Əmzik üçün
Ağlayırsan
Nahaq sən.
Qoy bir öpüm
Sənin gözəl
Üzündən,
Axıtma gəl
Bu qədər yaş
Gözündən.
Ana gördü
Gəlir evin
Pişiyi,
Ağzında da
Aybənizin
Əmziyi.
Evdəkilər
Gülüşdülər
Bir qədər,
Pişiyə də
Belə olmaz
Dedilər.
Əmzik nədir
Bilməyir qız
O gündən.
Pişiyin də
Uzaq gəzir
Gözündən.
Nağıl
istəyən qız
Babasını görəndə
Gülür, sevinir çiçək.
Yüyürür qabağına
Babam gəldi deyərək.
Baba da qucağına
Götürür nəvəsini.
Uşaq kimi sevinir
Eşidəndə səsini.
Qız deyir: - Danış, baba,
Mənim üçün nağıl gəl.
Göydən üç alma
düşsün
Biri-birindən gözəl.
Evdə gizlətsin anam
Götürüb almaları.
Sonra gətirsin mənə,
Yeyim bir-bir onları.
- Bəs mənə pay çatmayır,
Qızım, bu almalardan?
Heç olmasa birini
Babana ver, ay şeytan.
- Yaxşı, qoy biri sənin,
İkisi olsun mənim.
Ancaq xəbər tutmasın
Bundan Murad, nə Səlim.
Yoxsa gəlib hərəsi
Birisini götürər.
Yerdə mənə pay qalmaz,
Almalar əldən gedər.
De başla, ay babacan,
Gözəl bir nağıl danış.
Qardaşlarım məktəbdən
Gəlib evə çatmamış.
Xoşu gəldi babanın
Nəvəsinin sözündən.
Öpdü nağıl istəyən
Qızın iki gözündən.
Nənəm
küsüb
babamdan
Nənəm küsüb babamdan
Qəlyan çəkmək üstündə.
Onların arasında
Söhbət olub bu gün də.
Nənəm deyir: - Ay kişi,
Daha qəlyan çəkmə sən.
Öysürürsən gecələr
Yatammıram səsindən.
Şükür olsun Allaha
Əlin çatıb hər şeyə.
Yox bir əyər-əksiyin,
Qəlyan çəkirsən niyə?
Gül kimi nəvələrin
Gəzirlər qabağında,
Hamı hörmət eyləyir
Sənə qoca çağında.
Təmiz havada hər gün
Ye-iç, özün üçün gəz.
Tulla getsin qəlyanı,
Ala bilmirsən nəfəs.
Babam isə deyir ki,
Çəkməsəm onu əgər
Günlərim bir-birindən
Daha da ağır keçər.
Barışdırdım onları,
Babamın güldü üzü.
“Gözəl balasan” oldu
Onun mənə son sözü.
Sən
də görərsən
Həyətdəki təndirdə
Çörək bişirir nənə.
Xumar durub baxırdı
Nənəsinin əlinə.
Yumurtalı, xaşxaşlı,
Gül ətirli çörəklər
Qıpqırmızı olurdu
Bişən kimi bir qədər.
Nənə alıb onları
Düzürdü tabaqlara.
Bütün bunlara baxmaq
Xoş gəlirdi Xumara.
Dərk eyləyə bilmirdi,
Anlamırdı qız ancaq,
Neçin nənənin əli
Odda bilmirdi yanmaq.
Nənə qızı
çağırıb
Dayanma bekar, - dedi,
Boş qabları götürüb
O yana apar, - dedi.
Sonra gəl dur yanımda
Yavaşca bax təndirə.
Gör çörək necə bişir,
Qızarır birdən-birə.
- Bəs niyə yanmır əlin
İsti təndirdə nənə?
- Hə, belə de, ay bala,
Eşit qoy deyim sənə.
Qoca nənən çox görüb
Belə odlar, ocaqlar.
Əllərim odda bişib,
Etmir mənə daha kar.
Böyüyəndə od, ocaq
Görəcəksən özün də.
Ucalarsan günbəgün
Hamımızın gözündə.
Simax
Şeyda
Ədəbiyyat
qəzeti.- 2013.- 7 iyun.- S.7.