Son zəng

Uşaqlar cəmiyyətin gülüdür, çiçəyidir; uşaqlar hamımızın həm bu günü, həm də gələcəyidir

Heydər Əliyev

Mayın 31-də Səbail rayonu 190 saylı orta məktəbdə bayram əsl əhval-ruhiyyəsi yaşanırdı. Əllərində gül-çiçəklə məktəbə son gəlişlərini qeyd etməyə hazırlaşan onbirincilərin üzündə həm sevinc, həm də həyəcan hiss olunurdu… Bu bayram ovqatı həm də məktəb direktoru Afət Bakıxanovanın, onbirincilərin sinif rəhbərlərinin, eyni zamanda valideynlərin simasında aşkar duyulurdu.

Bəli, bu gün onlar məktəbə son qədəmlərini qoyur, gələcək həyatın həyəcanını yaşayırdılar.

Əvvəlcə Azərbaycan Dövlət himni səsləndi. Tədbiri məktəbin direktoru Afət Bakıxanova açdı, onbirinciləri, tədbirdə iştirak edən qonaqları, müəllim heyətini və valideynləri salamladı. Afət xanım sonra məktəbin qonaqlarını təqdim etdi və sözü onlara verdi. Səbail rayon icra hakimi Asif Əsgərov, vaxtilə məktəbin məzunları olmuş xalq artistləri bəstəkar Eldar Mansurov və skripkaçı Natiq Nuriyev, Bakı şəhəri üzrə Təhsil İdarəsinin metodisti Roza Rüstəmova, Bakı Slavyan Universitetinin dosenti, məktəbdə fəaliyyət göstərən ali və orta təhsilin koordinasiyası kafedrasının müdiri dosent Nuridə Novruzova onbirinciləri səmimi qəlbdən təbrik etdilər.

Tədbir məktəblilərin maraqlı çıxışları ilə davam etdi. 11d sinfinin rəhbəri Təranə Əzizova da şagirdləri bu bayrama xüsusi hazırlamışdı. Onbirincilərdən Pəri Hacızadə, Ləman İsmayılzadə və Səidə Qədimova maraqlı musiqi nömrələri ilə çıxış etdilər. Skripkaçı Natiq Nuriyevin şirin musiqi təbrikinə "Təbəssüm" rəqs kollektivi də qoşuldu.

Sülh rəmzi olan ağ göyərçinləri səmaya uçuran onbirincilər son zəngin sədaları altında tədbiri rəqslə davam etdirdilər.

X. Məcidova

Ədəbiyyat qəzeti.- 2013.- 7 iyun.- S.7.