İsa Muğanna - 85

Hörmətli İsa Muğanna!

Sizi - görkəmli xalq yazıçımızı 85 illik yubileyiniz münasibətilə təbrik edirik.

Siz 1928-ci ildə Ağstafa rayonunun Muğanlı kəndində anadan olmusunuz. Orta məktəbi bitirdikdən sonra N.Nərimanov adına Tibb Universitetinə daxil olmuş (1945) təhsilinizi ADU-nun filologiya fakültəsində davam etdirmisiniz. Moskvadakı Qorki adına Ədəbiyyat İnstitutunda yaradıcılıq sirlərinə daha yaxından yiyələndikdən sonra Azərnəşrdə ədəbiyyat şöbəsinin müdiri (1952-1954), "Literaturnıy Azerbaydjan" qəzetində nəsr şöbəsinin müdiri (1960-1964), C.Cabbarlı adına "Azərbaycanfilm" kinostudiyasında baş redaktor (1964-1968), redaktor, ssenari şöbəsi üzvü, Azərbaycan Kinematoqrafiya Komitəsində baş redaktor (1979) vəzifələrində çalışmısınız.

İlk mətbu əsəriniz 1949-cu ildə nəşr olunub. "Bizim qızlar", "Dan ulduzu", "Hekayələr", "Yanar ürək", "Doğma və yad adamlar", "Tütək səsi", "Kollu Koxa", "Ömürdən izlər", "Saz", "Məşhər", "İdeal", "Ulduzlar sönmür", "İsahəq - Musahəq", "Cəhənnəm" və s. kitablarınız dərin oxucu marağı qazanıb.

Ssenariləriniz əsasında "26 Bakı komissarı", "Nəsimi", "Ulduzlar sönmür", "Tütək səsi" və s. filmlər çəkilmiş, əsərləriniz bir çox xarici ölkələrdə nəşr olunmuşdur.

Siz 1988-ci ildə Azərbaycanın xalq yazıçısı fəxri adına layiq görülmüsünüz. 1991-ci ildən Yazıçılar Birliyi Ağsaqqallar Şurasının üzvüsünüz.

Hörmətli İsa müəllim!

Sizi bir daha 85 illik yubileyiniz münasibətilə təbrik edir, sizə uzun ömür, cansağlığı və yeni yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2013.- 7 iyun.- S.6.