Sabir Poeziya günündə

Vaxtın-zamanın, dünyanın çoxçeşidli üzü daha aydın müstəvidə öz nədənliyini büruzə verdikcə 1500 illik oğuz poeziyamızda ayna abidəsi kimi ucalan, özümüzü özümüzə göstərən böyük satirik M.Ə.Sabirin doğum günü mayın 31-də Azərbaycan Mədəniyyət və Turizm Nazirliyinin, Yazıçılar Birliyinin və Şamaxı rayon İcra Hakimiyyətinin birgə təşkilatçılığı ilə ustadın doğma yurdunda qeyd edildi.

Tədbirin iştirakçıları əvvəlcə ulu öndər Heydər Əliyevin heykəli önünə gül dəstələri qoyaraq xatirəsini dərin hörmətlə yad etdilər.

Böyük şairin qəbirüstü abidə-kompleksi də eyni sayğı və qədirbilənlik hissilə ziyarət edildi.

Mərasim ustadın ev muzeyi qarşısında davam etdirildi.

Tanınmış şair, Sabir Poeziya günlərinin rəhbəri Əjdər Ol tədbiri açaraq M.Ə.Sabirin çoxəsrlik zəngin poeziya tariximizdəki xüsusi yerindən danışdı. Qeyd etdi ki, yüzillər keçir, ancaq azadlıq aşiqi, istiqlal şairi Sabir yaradıcılığına maraq azalmır. Doğru söz söyləməyin hünər olduğu bir zamanın şairi olaraq Sabir bu gün də çağdaşdı və gələcək zamanlarda da belə olacağı şəksizdir.

Sonra xalq şairi, AYB-nin birinci katibi Fikrət Qoca, filologiya elmləri doktoru Vaqif Yusifli, əməkdar müəllim, beynəlxalq Rəsul Rza mükafatçısı Oqtay Rza, yazıçılardan Əli Əmirli, Mustafa Çəmənli, əməkdar mədəniyyət xadimi, şair Məmməd Aslan, əməkdar artist Ağalar Bayramov, şairlərdən Qardaşxan, Elman Səmədoğlu, Məlahət Yusifqızı, Narıngül, Şəfəq Sahibli, jurnalist Tahir Abbaslı çıxış edərək ölməz şairin yaradıcılığıyla bağlı fikirlərini səsləndirdilər, şeirlər oxudular, şairin yaradıcılığıyla bağlı müsabiqənin qalibi olan şagirdlər çıxış etdilər, Aşıq Ağamuradın ifaları alqışlarla qarşılandı.

Tədbir çərçivəsində böyük satirikin müəllimi S.Ə.Şirvaninin qəbri, ölkə başçısının göstərişilə əsaslı şəkildə təmir edilmiş IX əsrə aid "Cümə" məscidi ziyarət edildi, Mədəniyyət və Turizm Nazirliyinin çap etdirdiyi "Sabir" poeziya almanaxı, Sabir döş nişanları iştirakçılara hədiyyə edildi.

Bir daha vurğuladı ki, poeziya sənətimizin dəryada belə dayana bilən qocaman bir dağıdı, ötüb-keçən zaman onu bizə daha çox yaxınlaşdırır, Sabir günümüzün şairi, ən böyük müasirimizdir.

S.Əsgərli

Ədəbiyyat qəzeti.- 2013.- 7 iyun.- S.3.