Kamran Əliyev - 60

Hörmətli Kamran müəllim! Sizi - istedadlı ədəbiyyatşünas alimi 60 yaşınızın tamam olması münasibətilə təbrik edirik. Siz 1969-1974-cü illərdə Azərbaycan Dövlət Universitetinin filologiya fakültəsində təhsil almış və universiteti fərqlənmə diplomu ilə bitirmisiniz. 1980-ci ildə "XX əsr Azərbaycan romantiklərinin ədəbi-nəzəri görüşləri" mövzusunda namizədlik, 1990-cı ildə "XX əsr Azərbaycan romantizminin obrazlar sistemi" mövzusunda doktorluq dissertasiyası müdafiə etmisiniz.

1993-2001-ci illərdə "Naxçıvan" universitetində Azərbaycan dili və ədəbiyyatı kafedrasının müdiri, eyni zamanda universitetin tədris işləri üzrə prorektoru vəzifələrində işləmisiniz. 2002-ci ildə Azərbaycan MEA Folklor İnstitutunda aparıcı elmi işçi olmusunuz. 2012-ci ildən isə folklor və yazılı ədəbiyyat şöbəsinin müdirisiniz. Müəllimlər və abuturiyentlər üçün nəzərdə tutulmuş "Ədəbiyyat" (2010), "Azərbaycan dili" (2011) adlı dərs vəsaitlərinin, 20 kitabın, 250-yə qədər elmi və elmi-publisistik məqalənin müəllifisiz. Siz ədəbiyyat tarixçisi kimi ədəbiyyatımızın ayrı-ayrı nümayəndələrinin həyat və yaradıcılığı ilə bağlı tədqiqatlar aparmış və onlar "Mirzə Fətəlidən Hüseyn Cavidə qədər" (1998), "Ədəbiyyat tarixinə bir baxış" (2013) kitablarında toplanmışdır. Romantizmin problemlərinə marağınız davamlıdır. "Azərbaycan romantizminin poetikası" (2002), Azərbaycan və rus dillərində çap edilən "Azərbaycan romantizminin nəzəriyyəsi" (2006), "Romantizm və folklor" (2006) monoqrafiyalarınız ədəbiyyatşünaslığımızda romantizmin aktual məsələlərinə həsr edilmişdir. "Hüseyn Cavidin şəxsiyyəti və poetikası" (1997), "Cavid möcüzəsi" (2002), "Hüseyn Cavid: həyat və yaradıcılığı" adlı monoqrafiyalarınız sizi həm də cavidşünas kimi tanıdır. Elmi fəaliyyətinizdə əsas yerlərdən birini də folklorşünaslıq, xüsusən epos yaradıcılığı məsələləri tutur. Bunun əyani təsdiqi "Romantizm və folklor", "Eposun poetikası: "Dədə Qorqud" və "Koroğlu" adlı monoqrafiyalarınızdır. Siz Azərbaycan tənqidinin və ədəbiyyatşünaslığının öyrənilməsi ilə ardıcıl məşğul olursunuz. "Abbas Zamanov olmasaydı", "Tənqidin poetikası", "Ədəbiyyatşünaslıq və ədəbiyyatşünaslar" kimi monoqrafiyalarınız elmi ictimaiyyətdə maraqla qarşılanmışdır. Siz bədii və publisistik yaradıcılıqda da qələminizi sınamısınız. Kamran İmranoğlu imzası ilə "Yalquzaq", "Vağzal" və "Zəli" povestləri, "Sədərək döyüşləri" kitabınız oxuculara çatdırılmışdır. Sizin elmi rəhbərliyinizlə 6 nəfər filologiya elmləri namizədi (fəlsəfə doktoru) alimlik dərəcəsi almışdır. Rəsmi opponentliyinizlə 13 nəfər elmlər doktoru, 44 nəfər isə elmlər namizədi (fəlsəfə doktoru) alimlik dərəcəsi almaq üçün müdafiə etmişdir. Hörmətli Kamran müəllim! Sizi bir daha yubileyiniz münasibətilə təbrik edir, sizə uzun ömür, cansağlığı, yeni yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2013.- 1 mart.- S.7.