Xavər xanım yad edildi

Martın 13-də unudulmaz xalq şairimiz Səməd Vurğunun vəfalı ömür-gün yoldaşı Xavər xanım Vəkilovanın 95 illik anım günüylə bağlı mərasim keçirildi. Bütün həyatı boyu olub-keçənləri vəfalı bir fədakarlıq nümunəsi kimi yaşayan Xavər xanımın məzarı üstünə gələnlər Səməd Vurğun ocağının xalqımızın mənəviyyat çırağının şölələnməsindəki xidmətlərindən dərin qədirbilənlik hissilə söz açdılar.

Səməd Vurğunun ev muzeyinin direktoru Aygün xanım Vəkilova unudulmaz Xavər xanımdan böyük dost, sirdaş, vəfalı şəxsiyyət kimi danışdı, ötüb-keçənləri xatırladı: "Mənə münasibətdə Xavər xanımla anam arasında yaxşı mənada, çox əziz və doğma olan bir qısqanclıq hissi yaşanırdı. Nənəmin dəfn günündə heç cür özümü ələ ala bilmirdim, ən səmimi duyğularımı onun nəfəssiz cisminə söyləyirdim ki, məni tək, kimsəsiz qoydun, sən mənim ən böyük həmdərdim, anam qədər əzizim idin… Gördüm ki, Aybəniz xanım az qala incimiş, qınaqlı baxışlarla mənə baxır. Cəld özümü yığışdırdım, zarafata saldım ki, düzdü, Aybəniz xanım da mənim anamdı… Bu xatirələr bitib-tükənən deyil… Xavər xanım gözəllərin sona qalmışlarından idi, ürək dostu olmağın, həmdərd olmağın canlı simvoluydu, xatirə boxçası kimiydi. Əlbəttə ki, bu müstəvidə unudulmaz Səməd Vurğunun, Yusif Səmədoğlunun yeri bir başqa aləm idi…"

Ədəbiyyatşünas alimlərdən Aslan Salmansoy, Sara Osmanlı, Səməd Vurğun ailəsinin yaxınlarından Nəzakət Qafqazlı, Zemfira Eminova, Həqiqət xanım, Elşad İbrahimov və başqaları anım mərasimində Səməd Vurğun ocağının əbədi haq-sayından, bu ocağa mənsub olan şəxsiyyətlərin milli-mənəvi dəyərlərimizin irəli aparılması yolundakı xidmətlərindən söz açdılar. Xavər xanımın unikal, bənzərsiz şəxsiyyəti haqqında təəssüratlarını bölüşdülər: "Onun uyuduğu bu məkan vaxtilə baxımsız bir sahə idi. Böyük şəxsiyyətlərin məzarı belə qazıldığı yerə xüsusi ab-hava, dəyər, vüqar gətirir. Xavər xanım kimi insanların məzarı da həmişə ziyarət yeri olaraq insana fəxarət gətirir. Səməd Vurğun nahaq yerə ona xitabən "Demə saçlarıma düşübdü ağ dən, ürək qocalmayıb, ürəyim sənsən!" yazmırdı".

S.Hüseynoğlu

Ədəbiyyat qəzeti.- 2013.- 15 mart.- S.8.