İndiki toylar

O gözəl adətlər qalıbdi harda?

Toylar da adama maraqsız gəlir.

Sinəsi, kürəyi açıq paltarda

Gəlinlər məclisə duvaqsız gəlir.

Elçilik günündən açılır “bazar”,

Əsas götürülür vəzifə,imkan.

Cehiz də aparmır indiki qızlar,

Axtarır özünə cehizli oğlan.

Gəlinlər bahalı maşında gəlir,

Bəs niyə əlində toy şamı yanmır?

Sağdışlar, soldışlar yox olub bir-bir,

Nədənsə, bəylər də ta “oğurlanmır”.

Danışan ağsaqqal ata əvəzi,

Niyə qaşlarını çatır gəlinlər?

Bəy gül bağışlayır - məhəbbət rəmzi,

Onu başqasına atır gəlinlər.

Nə sağlıq deyən var, nə təbrik edən,

Heyrətdə qalırlar qonaq gələnlər.

Kimdir hamıdan çox toyda rəqs edən?

Əlbəttə, indiki bəylər, gəlinlər.

Gələndə səsini hazır gətirir,

Diskə əvvəlcədən yazır gətirir.

Əldə boş durmaqdan sıxılır hərdən,

Mikrafon “utanır” müğənnilərdən.

Yabançı fikirlər gəzir beyində,

Milli adətlərmi qalmayıb yadda?

Sınmır bəy evinin girəcəyində

Boşqablar gəlinin ayağı altda.

“Vağzalı” olmasa bizim toyları

Əcnəbi toylardan seçə bilmərik.

Anlasaq “Segah”ı, “Şur”u, “Qatar”ı

Milli adətlərdən keçə bilmərik.

…O gözəl adətlər qalıbdı harda?

Toylar da adama maraqsız gəlir.

Sinəsi,kürəyi açıq paltarda

Gəlinlər məclisə duvaqsız gəlir.

Gözlərimin

qarasında, ağında

Ürəyimin sevincidi, qəmidi,

Qaranlıqla sökülən dan kimidi,

Məhəbbətin vüsal,hicran dəmidi

Gözlərimin qarasında, ağında.

Zülmət gecə tuş gəlibdi gündüzə,

İlk sevdadı, son umuddu üz-üzə.

Qara bulud, ağ buluddu üz-üzə

Gözlərimin qarasında, ağında.

Yagış olub yağa bilər istisə,

Günəş olub doğa bilər istəsən.

Həmişəlik təki qalmaq istə sən

Gözlərimin qarasında, ağında.

Həm səadət, həm də giley doludur,

Sevgilərin qəlbə gedən yoludur.

Yad əllərdə qalan Vətən yoludur

Gözlərimin qarasında, ağında.

Ağı - zülmət, qarası - nur, alışar,

Kirpik çalsam bir-birinə qarışar,

Bu dünyanın təzadları barışar

Gözlərimin qarasında, ağında.

Bu ocaq odsuz qalıb

Bir isti nəfəs idi,

El-obaya bəs idi,

Nədən sönüb bəs indi

Bu ocaq odsuz qalıb?

Üstünün sacı hanı,

Doyurmur acı,hanı?

Yoxmudur qalayanı?

Bu ocaq odsuz qalıb.

Bir kimsə maraqlanmır,

Aranıb, soraqlanmır.

Neçə vaxtı ki, yanmır,

Bu ocaq odsuz qalıb.

Hanı isti fətiri?

Gəlmir yuxa ətiri.

Kibrit, odun gətirin,

Bu ocaq odsuz qalıb.

Çoxdan bilmir isti nə,

Gələn yoxdu üstünə .

Kimlər durdu qəsdinə,

Bu ocaq odsuz qalıb.

Gəlin mərhəmi olaq,

Yaxın həmdəmi olaq.

Alışdıraq, od salaq,

Bu ocaq odsuz qalıb.

Əbülfəz Naxçıvanlı

Ədəbiyyat qəzeti.- 2013.- 3 may.- S.7.