Bu dalanda

Ağzını iyləyirlər,

nəbada “sevirəm” deyəsən,

ürəyini iyləyirlər.

Qəribə dövrandır, sevgilim,

sevgiyə şlaqbaumun yanında

şallaq vururlar.

Sevgini evin anbarında gizlətmək gərək.

Soyuğun bu əyri-üyrü dalanında odu

nəğmə və şerin yanacağı ilə

alışdırırlar.

Düşünüb də risk eləmə.

Qəribə dövrandır, sevgilim,

axşam-axşam qapını döyən kəs,

çırağı söndürməyə gəlib.

İşığı evin anbarında gizlətmək gərək.

Odur, qəssablar

keçidlərdə dayanıblar

qanlı dəhrə-bıçaqlarıyla.

Qəribə dövrandır, sevgilim,

təbəssümü dodaqlardan kəsib götürürlər,

nəğməni ağızdan.

Şövqü evin anbarında gizlətmək gərək.

Süsən-yasəmən közündə

sarıbülbül kababı.

Qəribə dövrandır, sevgilim,

qələbədən sərxoş İblis

matəm süfrəmizin başında oturub.

Allahı evin anbarında gizlətmək gərək.

Əhməd Şamlu

Ədəbiyyat qəzeti.- 2013.- 3 may.- S.7.