Məsiağa Məhəmmədi-50

Hörmətli Məsiağa Məhəmmədi!

Sizi - tanınmış şərqşünas-alim və tərcüməçini, filologiya üzrə fəlsəfə doktorunu 50 illik yubileyiniz münasibətilə ürəkdən təbrik edirik!

Siz - Azərbaycan Dövlət Universitetinin şərqşünaslıq fakültəsini bitirdikdən sonra 1991-ci ildə dünya şöhrətli Azərbaycan şərqşünası, professor Rüstəm Əliyevin rəhbərliyi altında "Saib Təbrizinin lirikası və farsdilli poeziyada "hind üslubu" problemi" mövzusunda dissertasiya müdafiə eləmisiniz, elmi əsərləriniz, monoqrafiyalarınız təkcə Azərbaycanda deyil, Rusiya, Özbəkistan, Gürcüstan, İran və Almaniyada yaşayan mütəxəssislər tərəfindən yüksək qiymətləndirilib. Bundan əlavə, Nizami, Sədi, Xacu, Hafiz, Füzuli, Tərzi Əfşar, Kəlim Kaşani, Şəhriyar və b. kimi şairlərin yaradıcılığı haqqında elmi yeniliyi ilə seçilən araşdırmaların müəllifisiniz, elmi əsərləriniz Moskvada, Sankt-Peterburqda, Daşkənddə, Təbrizdə, Tehranda çap olunub. AMEA Ziya Bünyadov adına Şərqşünaslıq İnstitutunda direktor müavini vəzifələrində çalışmış, İran filologiyası şöbəsinə rəhbərlik eləmisiniz. Bir müddət Nizami Gəncəvi adına Milli Azərbaycan Ədəbiyyatı Muzeyində elmi işlər üzrə direktor müavini olmusunuz.

Mənbəşünas alim, eyni zamanda tərcüməçi kimi ortaya qoyduğunuz bir çox əsərlər- "Qızılbaşlar tarixi" adlı anonim mənbə, Yusif Qarabağinin geniş şərhlərlə təqdim edilən "Yeddi bağ" risaləsi fars dilindən Azərbaycan dilinə tərcümə edilərək çap olunub. Həmçinin İmam Qəzzalinin "Kimiyayi-səadət" əsərindən parçalar, Əbu Səid Əbül-Xeyr, Baba Kuhi Bakuvi, Şəms Təbrizi, Cəlaləddin Rumi, Şeyx Məhəmməd Xiyabani yaradıcılığından müəyyən nümunələri dilimizə çevirmisiniz. Müasir İran və Əfqanıstan ədəbiyyatından tərcümələr, xüsusən fars şairi Söhrab Sipehirdən elədiyiniz tərcümələr elmi-ədəbi ictimaiyyət tərəfindən maraqla qarşılanmışdır.

"Cahan", "Bakı-Təbriz" jurnallarında, "Elita" ictimai-siyasi qəzetindəki naşir kimi fəaliyyətiniz , "Hikmət" və "Şərq" toplusundakı tərtibçi kimi işiniz sizin geniş intellektual diapazona malik universal yaradıcı şəxsiyyət olduğunuzun göstəricisidir.

Bu gün siz Azərbaycan Respublikası Prezidenti yanında Strateji Araşdırmalar Mərkəzinin ekspertisiniz və eyni zamanda “Şərqşünaslıq İnstitutunda” da elmi kadrların hazırlanmasına, yetişməsinə də öz töhfələrinizi verirsiniz.

Hörmətli Məsiağa müəllim!

Sizi 50 illik yubileyiniz münasibətilə bir daha təbrik edir, sizə möhkəm cansağlığı, elmi və bədii yaradıcılığınızda peşəkar uğurlar arzulayırıq.

Azərbaycan Yazıçılar Birliyi

Ədəbiyyat qəzeti.- 2013.- 3 may.- S.7.