Ləyaqətli varis

Filosof Diogen günün günorta çağı əlində çıraq gəzirmiş. Bu müəmmaya sorğulu baxanlara müdrikin cavabı belə olur: "Adamlar içində insan axtarıram…"

1993-cü ilin gül nəfəsi yerinə güllə səsi gətirən müdhiş baharında - Kəlbəcərin işğal günlərində hamı Qənbər müəllimi axtarırdı. O, yeganə insan idi ki, illərdən bəri yurddaşlarına yaxşı bəlli olan inamı, etibarı, kişilik əzmini saxlamışdı…

Yaxın tariximizin bu amansız dönəmində Dədə Şəmşir ocağının ləyaqətli varisi Qənbər müəllim müdrik ağsaqqal kimi bağrı didik-didik olan didərginlərimizi bir araya gətirib onların Bakıda, Gəncəbasarda, eləcə də məmləkətimizin digər bölgələrində məskunlaşmağına maddi, mənəvi yardımını öyüd-nəsihəti ilə birgə əsirgəmədi…

Mən göz açandan Qənbər müəllimi dövlət strukturlarında məsul vəzifələr daşıyan görmüşəm. Onu da görmüşəm ki, bu sadə, təvazökar və səmimi insan sxematik məmurlardan olmayıb. Çünki qan yaddaşında mənsub olduğu qüdrətli şairlər sülaləsinin - Miskin Abdalın, Ağdabanlı şair Qurbanın, Aşıq Şəmşirin poetik dünyaduyumunu gəzdirib. Məhz bu irsi-genetik yaddaşın davamiyyətidir ki, Qənbər Şəmşiroğlunun son illərdə ardıcıl nəşr olunan müxtəlif janrlı, müxtəlif formatlı kitabları geniş oxucu auditoriyasının marağına və rəğbətinə səbəb olub.

İstər şeirlərində, istər hekayə və romanlarında, istərsə də publisistikasında Qənbər Şəmşiroğlu özünəməxsus dil-üslub xüsusiyyətləri, dərin müşahidələri, həyat həqiqətlərinə yumorlu baxışı ilə diqqəti cəlb edir. Hiss edirsən ki, onun ilham çeşməsi folklordan, xalq ədəbiyyatından qaynaqlanır.

Qənbər Şəmşiroğlu özünə həmişə müəllim deyib. İxtisasca müəllim olan bu insan həmişə "müəllim" adını daşımaqdan qürur duyub. Orta məktəb müəllimliyindən rayon rəhbərliyinə qədər yuksələn bu şəxsiyyət o yüksəklikdə olanda da həmin adı sevərək daşımaqdan doymayıb. Danışığı, davranışı, səliqə-sahmanı, daxili mədəniyyəti ilə gerçək bir müəllim obrazı yaradan Qənbər Şəmşiroğlu necə deyərlər, elin gözündən kənarda qalmayıb. Hətta bir kəlbəcərli kişi öz oğlunun adını doğum şəhadətnaməsinə belə yazdırıb: "Qənbər müəllim".

Qənbər müəllimin başqalarına örnək ola biləsi övladları, nəvələri var. Böyük oğlu - Milli Məclisin deputatı Cavid Qurbanov atasının məsləhət və tövsiyələrinə əməl etməyi hər zaman özünə şərəf bilib. Kəlbəcərlilər bu ocağı yaxşı tanıdıqları üçün millət vəkili kimi məhz C.Qurbanovu seçiblər.

Bu günlərdə Qənbər Şəmşiroğlunun 80 yaşı tamam olur. Kəlbəcərin işğalından isə 20 il keçir. Kəlbəcərsiz keçən illəri ömürdən saymayan Qənbər müəllimin əslində 60 yaşı tamam olur. El-obamızın, məmləkətimizin dəyərli və nüfuzlu ağsaqqalı, şair, publisist, ictimai xadim Qənbər Şəmşiroğlunu ürəkdən təbrik edir, ona sağlam can, uzun ömür və yaradıcılıq uğurları diləyirəm.

Adil CƏMİL

Ədəbiyyat qəzeti.- 2013.- 15 noyabr.- S.7.