Elə bil

Kimsəyə qıymayıb tək yüklənmisən:

Təpəni elə bil, dağı elə bil.

Göyə ki, dağlarda dönüb baxırsan:

Çiynində dayanıb tağı, elə bil.

Murova boylanıb, çatdın qaşları;

Üzündə seyr etdim qarlı qışları;

Alnında dağların qəm qırışları -

Tək sənə dağ çəkib yağı elə bil.

Dəlidağ hayanda, Çilgəz hayanda?!

Çəkilmir dərdimiz bir Haqq divanda.

Bir şux Qənbəriydin sən Ağdabanda;

Dəyişmisən qaş-qabağı elə bil.

Yola salmaqdasan yetmiş beşi də;

"Kəlbəcər qayıdıb!" - aləm eşidə!..

Əlçimlə bu dərdi əyir teşidə,

Qopub səbrimizin bağı elə bil...

Durulmur bu dünya lillənib qalıb;

Sönmüş ocağımız küllənib qalıb;

"Yeddiqardaş dağı"na zillənib qalıb -

Gözünün qarası, ağı elə bil…

Məmməd Aslan

Ədəbiyyat qəzeti.- 2013.- 15 noyabr.- S.7.