Yusif Seyidov

Azərbaycanın ədəbi ictimaiyyətinə ağır itki üz vermişdir. Tanınmış alim, əməkdar elm xadimi, Azərbaycan Dövlət mükafatı laureatı Yusif Seyidov vəfat etmişdir.

Yusif Mirəhməd oğlu Seyidov 1929-cu il mayın 3-də Şərur rayonunun Yengicə kəndində anadan olmuşdur. 1944-cü ildə orada orta məktəbi bitirib ikiillik Naxçıvan müəllimlər İnstitutunda təhsilini davam etdirmiş, 1947-1952-ci illərdə indiki Bakı Dövlət Universitetinin filologiya fakültəsində təhsil almış, dilçilik ixtisası üzrə aspiranturaya qəbul edilmiş, 1955-ci ildə «Müasir Azərbaycan dilində feli bağlama tərkibləri» mövzusunda namizədlik dissertasiyası müdafiə etmişdir. 1955 -ci ildə həmin universitetdə dərs deməyə başlamışdır. 1965-ci ildə «Müasir Azərbaycan dilində söz birləşmələri» mövzusunda doktorluq dissertasiyası müdafiə etmişdir. Universitetdə Azərbaycan dili və onun tədrisi metodikası kafedrasının əsası qoyulduğu gündən o kafedraya rəhbər təyin edilmişdir. Elmi-pedaqoji fəaliyyəti ilə yanaşı ədəbiyyatşünas kimi vaxtaşırı mətbuatda çıxış etmiş, ilk məqaləsi 1952-ci ildə «Azərbaycan müəllimi» qəzetində dərc edilmişdir. 1966-cı ildə «Azərbaycan ədəbi dilində söz birləşmələri» kitabı işıq üzü görmüşdür. «Müasir Azərbaycan dili. Sintaksis», «Klassik Azərbaycan şairləri söz haqqında», «Yazıçı və dil (XIX-XX əsrlər)», «Sözün şöhrəti», «Şairin fikir dünyası», «Ədəbi tənqid və bədii dil», «Sözün hikməti», «Nəsiminin dili», «Demokratiyanın uzun yolu», «Azərbaycan dilinin qrammatikası. Morfologiya», «Azərbaycan və rus dillərinin müqayisəli qrammatikası. fonetika», «Azərbaycan dilinin qrammatikası problemləri» (15 cilddə) əsərləri nəşr edilmişdir.

Yusif Seyidovun xalqımız qarşısındakı xidmətləri yüksək qiymətləndirilmiş, ona «Əməkdar elm xadimi» fəxri adı verilmiş, 1974-cü ildə Azərbaycan Dövlət mükafatına layiq görülmüşdür.

Görkəmli elm xadimi, dəyərli alim, səmimi, təvazökar insan Yusif Seyidovun işıqlı xatirəsi xalqımızın qəlbində yaşayacaq.

Allah rəhmət eləsin.

Azərbaycan Yazıçılar Birliyi

Ədəbiyyat qəzeti.- 2013.- 22 noyabr.- S.8.