Sən itərkən insanların arasında

Mən bir yolun astanasında

Bir sualın yaxasında

Asılıb qaldım.

Qaçımmı arxanca...

Bir qırmızı sandıqça

Aylarla uyuyarkən cibimdə

Açımmı ...

Yox...yox...dayansam yaxşıdır.

Bu qorxunc yuxudan

Oyansam yaxşıdır...

Məndən uzaqlaşan

Qara sevdanı

Qara daş kimi

Dalğaların qoynuna

Atsam yaxşıdır...

***

Biz tanış olsaydıq

Payız gəlməzdi.

Kimsə bilməzdi

Gizli sevgimizi,

Nura qərq edərdik

Bu qara şəhərimizi.

Üşüməzdik, gecələri

Birgə gəzərdik

Nəmli küçələri.

Biz tanış olsaydıq,

Nələr edərdik,

Nələr... nələr...

***

Bir qız vardı,

Mənə çoxlu yazardı.

Keçən ilin bu vaxtı

Havası idim, suyum idi,

Laylası idim, yuxum idi.

Çox gəzdim-dolaşdım,

Payızla rastlaşdım

Keçən ilin bu vaxtı

Ölmüsənmi,qalmısanmı

Cavab ver,səsimə səs ver,

Mənə nəfəs ver.

Hər küçədə bir parçam var

Səni axtarır.

Baxışınla nələrisə demişdin,

Demək birdəfəlik getmişdin

Keçən ilin bu vaxtı...

***

Heç kim bilməyəcək

Sənə olan hislərimi.

Qoy gizli qalsın

Bir tarix kimi

Sənin göz yaşlarından

Mənim gün daşlarımdan

Tikiləcək həsrətimiz

Otaqları tər-təmiz

Tavan, döşəmə

Bir-birinə baxacaq,

Aşiq olacaq

Ayrılıqlar mənzilində

Körpə doğlacaq

Sənin göz yaşlarından

Mənim gün daşlarımdan...

***

Çox yoruldum...

Unuduldum sənin kimi.

Göz yaşların tanış gəlir,

Yollarıma düzülür,

Yanağımdan süzülür.

Bax bu şəhərə, görürsənmi?!

Nələr çəkdiyimi bilirsənmi?!

Yazılar yazıldı, pozulmayacaq,

Görülən yuxular yozulmayacaq.

Bizdən bir də olmayacaq

Ayıl, gözəlim,

Əlini mənə ver

Heç kim bilməsin, -

Səssiz gedəlim...

***

Məni çaşdırmışdı yuxular,

İnanmışdım gördüyümə,

Peşman oldum, sıxıldım

Sizə qonaq gəldiyimə.

Gözüm axtarırdı güllərimi,

Verdiyim hədiyyələrimi.

Tapmayınca üzüldüm,

Geri çevrilən zaman

Səni gənc kapitan ilə

Sevişən gördüm.

Qarışdı duyğularım

Tutularkən səmalarım

Yatmaq istədim,

Mələk qanadlarımı

Atmaq istədim.

İnsanlığımı özlədim

Bir küçənin döngəsində

Əlimdə çiçəklərlə

Gəlişini gözlədim.

Röyal Əliyev

Ədəbiyyat qəzeti.- 2013.- 22 noyabr.- S.7.