Teymur Kərimli - 60

Hörmətli Teymur müəllim!

Sizi - tanınmış ədəbiyyatşünas alimi 60 illik yubileyiniz münasibətilə təbrik edirik.

Siz 1970-ci ildə orta məktəbi qızıl medalla bitirib Bakı Dövlət Universitetinin filologiya fakültəsinə qəbul olunmusunuz. 1975-ci ildə Ali təhsilinizi başa vurub müəllim kimi əmək fəaliyyətinə başlamısınız. AMEA-nın Nizami adına Ədəbiyyat İnstitutunun aspiranturasında təhsil almısınız. 1983-cü ildə «Nizamidə tarixin romantik qavrayışı («Yeddi gözəl» poeması üzrə) mövzusunda namizədlik dissertasiyası, 2003-cü ildə «Nizami yaradıcılığında tarixi şəxsiyyət və tarixi hadisə ideya-estetik qayənin konteksi və yardımçısı kimi» mövzusunda doktorluq dissertasiyası müdafiə etmisiniz.

«Nizami və tarix» (2002), «Görünməyən Füzuli» (2003), «Akademik Akif Əlizadə: istedadla enerjinin harmoniyası» (2004), «Şərqin qapısından dünyaya» (2009), «Gözəllərin axıra qalmışı» (2010), «Hicran ömrü», «Akademik Əhməd Mahmudov» kitablarının müəllifi, ümumtəhsil məktəblərinin X sinifləri üçün «Ədəbiyyat» dərsliyinin (2004, 2007), Azərbaycan Ensiklopediyasının xüsusi («Azərbaycan») cildindəki «Azərbaycan ədəbiyyatı» və «Ədəbiyyatşünaslıq» oçerklərinin, «Heydər Əliyev və Azərbaycan ədəbiyyatı» (2009) toplusundakı «Heydər Əliyev və klassik ədəbiyyat» bölməsinin həm müəllifi (professor Vilayət Quliyevlə birgə), Moskvanın « Xudojestvennaya literatura» nəşriyyatında rus dilində çap olunan «Azərbaycan ədəbiyyatı klassikası» seriyasından I və II, III, IV cildlərin ön sözlərinin həmmüəllifisiniz (akademik Bəkir Nəbiyevlə birgə), Budapeştdə (Macarıstan) macar dilində nəşr olunmuş Füzulinin «Hədiqətüs-süəda» əsərinin ön sözü də sizə aiddir. Altıcildlik «Azərbaycan ədəbiyyatı tarixi»nin baş redaktorunun müavinisiniz. «Füyuzat» və «Mola Nəsrəddin» (8 cilddə) dərgilərinin latın əlifbası ilə nəşrinin redaktorusunuz. 100-dən artıq elmi əsərin müəllifisiniz. 2007-ci ildə AMEA-nın müxbir üzvü seçilmisiniz. Professor elmi rütbəsi almısınız (2010-cu ildə). Azərbaycan Respulikası Prezidentinin 26 may 2010-cu il tarixli sərəncamı ilə «Heydər Əliyev və Azərbaycan ədəbiyyatı» kitabına görə Azərbaycan Respublikasının Dövlət mükafatına layiq görülmüsünüz (B.Nəbiyev, M.Qasımlı, V.Quliyev, N.Cabbarlı və N.Şəmsizadə ilə birlikdə).

2005-ci ildə Hüseyn Cavid külliyyatının Turan Cavid tərəfindən tərtib edilmiş və Azərbaycan Respublikası Prezidentinin fərmanı ilə 25 min tirajla nəşr edilmiş beşcildliyinin redaktoru və lüğətin həmmüəllifisiniz. Beşcildliyin 2007-ci ildə işıq üzü görmüş yeni nəşrində redaktor və ön sözün həmmüəllifisiniz. «Hüseyn Cavid yaradıcılığında Qərb və Şərq» (Aida İmanquliyevanın xatirəsinə həsr edilmiş Beynəlxalq konfransın materialları. Bakı, 2006) məqaləsinin müəllifi, «Cavid hikməti. Seçmə aforizmlər» (Bakı, 2007) kitabının redaktoru və ön sözün həmmüəllifisiniz. On cildi çapdan çıxmış «Cavidşünaslıq» seriyasının, 6 cildlik füzuli külliyyatının, 2 cildlik Nəsimi külliyyatının, 12 cildlik, «Azərbaycan qeyri-maddi mədəniyyət abidələri və Ərtoğrol Cavid» nəşrinin və bir çox başqa klassik sənətkarların əsərlərinin redaktorusunuz.

AMEA Nizami adına Ədəbiyyat İnstitutunun elmi işlər üzrə direktor müavini vəzifəsində işləyirsiniz. AMEA Humanitar və ictimai elmlər bölməsinin büro üzvüsünüz.

Bakı, Kazan, Dərbənd,Ankara, Təbriz,Tehran, Bağdad, Mağara, Urmiya, Hələb, Dəməşq, Daşkənd, Budapeşt, İstanbul, Milan, Dehli şəhərlərində keçirilən müxtəlif mövzulu Beynəlxalq konfranslarda klassik Azərbaycan ədəbiyyatının aktual problemləri barədə maraqlı məruzələrlə iştirak etmisiniz.

Beş ildən bəri Azərbaycan Dövlət Televiziyasında müntəzəm fəaliyyət göstərən və Azərbaycan ədəbiyyatının bütün dünyada təbliğ edilməsində mühüm rol oynayan «Məclisi-üns» verilişinin daimi üzvüsünüz.

Hörmətli Teymur müəllim!

Sizi bir daha yubileyiniz münasibətilə təbrik edir, sizə uzun ömür, cansağlığı və yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2013.- 4 oktyabr.- S.5.