Ədalət Əsgəroğlu

Amansız ölüm istedadlı şair və publisist Ədalət Əsgəroğlunu aramıızdan apardı.

Ədalət Əsgər oğlu Məmmədov 1957-ci il yanvarın 7-də Göyçayda anadan olmuşdur. Burada 1 saylı şəhər orta məktəbini bitirdikdən sonra 1975-ci ildə Bakı Dövlət Universitetinin filologiya fakültəsinə qəbul olunmuşdur. Təhsildən ayrılmadan Sumqayıt Neft-qaz-kimya zavodunda işləmişdir. 1979-cu ildə «Qızıl Şərq» mətbəəsində, daha sonra Səttərxan adına Maşınqayırma zavodunda, «Maarif» nəşriyyatında, Qarabağ Xalq Yardım Komitəsində müxtəlif vəzifələrdə işləmişdir.

Bədii yaradıcılığa erkən başlamışdır. «Zirvələr» adlı ilk mətbu şeri 1969-cu ildə «Azərbaycan pioneri» qəzetində dərc edilmişdir. Ötən əsrin 80-ci illərində dövri mətbuatda şeir, tərcümə və publisistik yazılarıyla müntəzəm çıxış etmişdir. «Yaz ilə gələn sevda» adlı ilk kitabı ədəbi ictimaiyyət tərəfindən maraqla qarşılanmışdır. «Mən sənə aşiqəm, dünya», «Göyçaydan başlayan ömür yolu», «Özüm qürbətdə, gözüm vətəndə», «Alim və pedaqoq ömrü», «Sabahını itirməyən adamlar», «Məmləkətim - canım mənim», «Dərdimizin qan rəngi» kitablarının da taleyi uğurlu olmuşdur. Cəlaləddin Ruminin 800 illik yubileyi münasibətilə keçirilən müsabiqənin ali mükafatını almışdır. Ölkəmizin hüdudlarından kənarda da şeirləri işıq üzü görmüşdür.

Ədalət Əsgəroğlu 2003-cü ildən ömrünün sonuna kimi Azərbaycan Yazıçılar Birliyi Mətbuat xidmətinin rəhbəri vəzifəsində səmərəli fəaliyyət göstərmişdir.

İstedadlı qələm yoldaşımız, səmimi, təvazökar insan Ədalət Əsgəroğlunun işıqlı xatirəsi qəlbimizdə yaşayacaq.

Allah rəhmət eləsin.

Azərbaycan Yazıçılar Birliyi

Ədəbiyyat qəzeti.- 2013.- 4 oktyabr.- S.8.