Milli xəzinəmiz

Müsahibimiz Azərbaycan Milli Kitabxanasının

direktoru Kərim Tahirovdur

“Kitabxana xalq, millət, cəmiyyət üçün müqəddəs bir yer, mənəviyyat, bilik, zəka mənbəyidir”

Heydər Əliyev

Qısa arayış: Kərim Məhəmməd oğlu Tahirov 1973-1978-ci illərdə Azərbaycan Dövlət Universitetinin kitabxanaçılıq fakültəsində təhsil alıb və yüksək ixtisaslı kitabxanaşünas-biblioqraf ixtisasına yiyələnib. 1983-cü ilədək Azərbaycan Dövlət Respublika Kitabxanasında böyük kitabxanaçı, böyük redaktor, baş kitabxanaçı və başqa vəzifələrdə çalışıb. 1983-2000-ci illərdə Mədəniyyət nazirliyində idarə rəisi vəzifəsinədək yüksəlib. 2000-ci ildən M.F.Axundzadə adına Dövlət Kitabxanasında direktor müavini, 2005-ci ildən bu günədək M.F.Axundzadə adına Azərbaycan Milli Kitabxanasının direktoru vəzifəsində çalışır.

Azərbaycan Respublikasının əməkdar mədəniyyət işçisi fəxri adına layiq görülüb və tarix üzrə fəlsəfə doktorudur.

- Ötən ay Azərbaycan Respublikasının Prezidenti cənab İlham Əliyevin sərəncamı ilə Azərbaycan Milli Kitabxanasının 90 illik yubileyi keçirildi. “Ədəbiyyat qəzeti”nin yaradıcı kollektivi adından sizi və rəhbərlik etdiyiniz kollektivi yubiley münasibətilə təbrik edir və yubileylə bağlı təəssüratlarınızı eşitmək istərdik.

- Təbrikə görə mən də həm öz adımdan, həm də kollektivimizin adından sizə minnətdarlığımı bildirmək istəyirəm. Bəli, Azərbaycan Respublikasının Prezidenti cənab İlham Əliyevin 24 iyun 2013-cü il tarixində ölkədə elmi-mədəni və ədəbi irsin qorunub saxlanılmasında mühüm xidmətləri olan Azərbaycan Milli Kitabxanasının 90 illik yubileyinin keçirilməsini təmin etmək məqsədi ilə imzaladığı bu sərəncam bizim kollektivdə böyük ruh yüksəkliyi yaratmışdır. Azərbaycan Milli Kitabxanasının ötən bu 90 il ərzində qazandığı uğurlardan söz düşəndə isə heç şübhəsiz ki, bizim kollektivin əməyinin ən dəqiq qiyməti yenə də Azərbaycan Respublikasının Prezidenti cənab İlham Əliyev tərəfindən verilmişdir. Prezidentimiz demişdir ki, Azərbaycan Milli Kitabxanası ötən müddət ərzində cəmiyyətin intellektual-mənəvi potensialının artırılmasında əvəzsiz rol oynamış, elm və mədəniyyət xadimlərinin bir neçə nəslinin formalaşmasına öz töhfəsini vermişdir.

Əlbəttə, ötən 90 il heç də hamar olmayıb, enişlər də olub, yoxuşlar da olub. Problemlərimiz də olub, uğurlarımız da. Bütün bunlara baxmayaraq, Azərbaycan Milli Kitabxanası bugünkü inkişaf səviyyəsinə gəlib çatmışdır ki, bu da bizi olduqca sevindirir. Təbiidir ki, Dövlət başçısının imzaladığı sərəncama müvafiq olaraq Milli kitabxananın 90 illik yubileyinin belə təntənəli şəkildə keçirilməsi bizim üçün böyük şərəfdir. Bu yubiley tək bizim yox, bütün xalqımızın, ziyalılarımızın, ədəbi ictimaiyyətin bayramıdır. Odur ki, fürsətdən istifadə edərək kitabxanamızın bütün kollektivi, bütövlükdə isə bütün kitabxanaçılar adından Azərbaycan Respublikasının Prezidenti cənab İlham Əliyevə öz minnətdarlığımızı bildirmək istəyirik.

Azərbaycan Milli Kitabxanasının 90 illik yubiley tədbirlərində ümumilikdə 60 xarici qonaq, 35-dən artıq dünya milli kitabxana direktorları, Avropa Milli Kitabxanaları Konfransının (CENL) prezidenti, üzvləri, Avrasiya Kitabxanaçılıq Assambleyasının (BAE) prezidenti və üzvləri iştirak edirdilər.

- Kərim müəllim, dövlət başçısının digər sərəncamları ilə Azərbaycan Milli Kitabxanasının bir qrup işçisi yubiley ərəfəsində müxtəlif mükafatlara layiq görüldü. Siz də Respublika Prezidentinin Sərəncamı ilə 3-cü dərəcəli “Vətənə xidmətə görə” ordeni ilə təltif edildiniz.

- Təşəkkür edirəm, təbiidir ki, bu sərəncamlar da bizim kollektivimizə, xüsusilə yubiley ərəfəsində verilən çox yüksək qiymətdir. Bütövlükdə isə mən bunu həm də ölkə kitabxanaçılarının əməyinə verilən qiymət kimi dəyərləndirirəm. Bu diqqətə və qayğıya görə də dövlət başçısına öz minnətdarlığımızı bildiririk. Burada onu da qeyd etməyi özümə borc bilirəm ki, dövlət başçısı eyni zamanda belə bir zamanda həm də vaxt tapıb bizim qonaqlarımızı da qəbul etdi. Xüsusən onun qonaqlarla, Avropanın bir sıra ölkələrinin, o cümlədən də Fransa, Estoniya, İsveçrə Milli kitabxanalarının direktorları ilə etdiyi səmimi söhbət heç bir vaxt yadımdan çıxmaz. Kitabxana sahəsində kifayət qədər təcrübəyə və səriştəyə malik olan bu insanların görüşdən sonra uzun müddət həmin görüşdən bəhs etmələri, eləcə də dövlət başçımızın kitabxana işini belə peşəkarcasına bilməsi onlarda son dərəcə təəccüb doğurmuşdu.

- Azərbaycan Milli Kitabxanası bu günədək zəngin inkişaf yolu keçmiş və böyük əhəmiyyətə malik nəşrləri mühafizə edən mədəni sərvətlər xəzinəsinə çevrilmişdir.

- Nahaq yerə deməyiblər ki, bəşəriyyətin ən böyük kəşfi kitabdır. Bu gün biz kitabxanaçıların da missiyası milli təfəkkürümüzü, milli yaddaşımızı, milli tariximizi özündə təcəssüm etdirən bu kitabları mühafizə edib saxlamaq və onları gələcək nəsillərə çatdırmaqdır. Biz də belə bir müqəddəs və şərəfli vəzifənin öhdəsindən gəlməyə çalışırıq. Bizdə hazırda kifayət qədər qədim tarixə malik olan çap kitabları vardır. Məsələn, 1568-ci ilin kitabı vardır bizdə və həmin kitablardan bu gün də oxucularımız istifadə edə bilirlər. 1922-ci ildə bu kitabxana yaradılanda onun fonduna İmperator Texniki Cəmiyyətinin Bakı şöbəsinin və Bakı İctimai Cəmiyyətinin kitabxanalarının fondlarından 5000 nüsxə kitab verilmişdi. 1923-cü ildən sürətlə inkişaf etməyə başlayan kitabxana əsas diqqəti fondun komplektləşdirilməsinə yönəltmişdir. 1925-ci ildə kitabxana öz fondunda 51000, 1928-ci ildə isə 300000 adda kitab, jurnal, qəzet kart və digər çap məhsullarını toplaya bilmişdir. Təkcə 1928-ci ildə xaricdən 50 adda dövri mətbuat alınmışdır. O vaxtlar kitabxana Azərbaycan Elmlər Akademiyasının binasında bir neçə otaqda yerləşirdi.

- 1922-ci ildə yaradılmış Azərbaycanın baş kitabxanası olan Azərbaycan Milli Kitabxanası nəinki Qafqazda, yerləşdiyimiz Avropa qitəsində, eləcə də bütün dünyada şöhrət tapan ən böyük milli kitabxanalardan və ən iri kitabsaxlayıcılardan biridir.

- Bilirsiniz, Azərbaycan Milli Kitabxanasının 90 illik yubileyi çərçivəsində dörd böyük beynəlxalq tədbirin keçirilməsinin özü də kitabxanamızın həm Avropa məkanında, həm Qafqazda, ümumiyyətlə, Şərq aləmində böyük nüfuza malik olduğunu bir daha təsdiq edir. Bunlar bir daha sübut edir ki, Azərbaycan Milli Kitabxanası dünyanın ən inkişaf etmiş kitabxanaları ilə eyni səviyyədədir və modern kitabxanalar sırasındadır. Avropanın 44 ölkəsinin milli kitabxana direktorlarının ötən ay Azərbaycana gəlib burada öz tədbirlərini keçirməsi dediklərimizi bir daha sübut edir. Bir faktı qeyd etmək istərdim ki, postsovet məkanında hələlik yalnız Azərbaycan Respublikasında belə bir tədbirin keçirilməsi mümkün olmuşdur. Bu da Avropa ölkələri tərəfindən bizim Milli kitabxanaya göstərilən böyük etimaddır. Rusiyada isə hələ gələn il belə bir tədbirin keçirilməsi nəzərdə tutulub.

Məlum olduğu kimi, ötən ayın 24-25-də paytaxtımızda Avropa Milli Kitabxanaları Konfransının (CENL) 27-ci illik görüşü keçirilmiş və 40-a yaxın ölkənin 50-dən çox nümayəndəsi iştirak etmişdir. Görüşdə Niderland, Finlandiya, Polşa, Böyük Britaniya və başqa ölkələrin nümayəndələri yeni əməkdaşlıq, yeni məqsədlər barədə çıxışlar etdilər. Tədbirin sonunda Azərbaycan Milli Kitabxanasının rəhbərliyi adından CENL-in 32-ci görüşünün 2018-ci ildə Azərbaycanda keçirilməsi təklifini irəli sürdük. Kitabxanada həmçinin B.Yeltsin adına Rusiya Prezident Kitabxanası ilə Azərbaycan Milli Kitabxanası və Qazaxıstan Milli Akademik Kitabxanası ilə Azərbaycan Milli Kitabxanası arasında ikitərəfli qarşılıqlı əməkdaşlıq barədə memorandum imzalandı. Qonaqlar Azərbaycan Milli Kitabxanasının “Nadir kitablar və kitabxananın muzeyi” şöbəsinin açılış mərasimində də iştirak etdilər. Onlar Azərbaycan Milli Kitabxanasının nəşrlərindən ibarət “90 il xalqın xidmətində”, Estoniya Milli Kitabxanasının “25+5 nəfis eston kitabları 2011-2012”, “Dünya ədəbiyyatı klassikləri”, “Qarabağ-mədəniyyətimizin beşiyi”, “Azərbaycan xarici dillərdə” adlı sərgilərlə də tanış oldular.

- 1939-cu ildən kitabxana mütəfəkkir, dramaturq və maarifçi Mirzə Fətəli Axundzadənin adını daşıyır. Kitabxana gündən-günə inkişaf etməkdədir. İllər keçdikcə kitabxananın fəaliyyət dairəsi genişlənmiş, onlarca yeni şöbə yaranmış, fondlarında ədəbiyyat sayı milyonlara çatmışdır.

- Sevindirici haldır ki, bu gün Milli kitabxanamız memarlıq baxımından tarixi abidə kimi qiymətləndirilən belə bir əzəmətli binada yerləşir və onu da qeyd etmək istərdim ki, kitabxanamız 1961-ci ildə indiki binaya köçmüşdür. Binanın yerinin seçilməsində və tikilməsində görkəmli xalq yazıçısı Süleyman Rəhimovun böyük xidməti olmuş, binanın layihəsini hazırlamaq isə akademik Mikayıl Hüseynova məxsusdur. Azərbaycan Milli Kitabxanasının böyük mütəfəkkir, ədəbiyyatımızda realizmin banisi Mirzə Fətəli Axundzadənin adını daşıması da bizdə qürur hissi doğurur. Qeyd edim ki, M.F. Axunzadə Azərbaycan xalqının fəxr edə biləcəyi mütəfəkkirlərindən biridir. Bu gün biz də haqlı olaraq bununla fəxr edir və öz fəaliyyətimizlə öhdəmizə düşən müqəddəs missiyanı yerinə yetirməyə çalışırıq.

Hazırda Milli kitabxanada 26 şöbə, 47 bölmə vardır və 13 oxucu zalı oxucuların ixtiyarına verilib. Bizim əsas vəzifəmiz oxuculara xidmət göstərməkdir. Biz oxucu ilə işləyirik. Oxucu olmasa, heç kitabxanaya da ehtiyac qalmaz. Kitab da canlı bir orqanizmdir, o da hava almalıdır, ona da insan nəfəsi dəyməlidir. Şükürlər olsun ki, bu gün kitabxanamıza gələn oxucuların sayı artıq 38000-i keçmişdir. Kitabxanamızın virtual oxucuları da vardır ki, bu gün onların sayı 500 mini ötüb keçmişdir. Fərəhləndirici haldır ki, həmin virtual oxucuların bir hissəsi isə xarici oxucularımızdır. Kitabxana fondumuzda olan kitabların isə hardasa 40 faizinin elektron versiyası mövcuddur. Hazırda Azərbaycan Milli Kitabxanasında 4 milyon 513 min çap məhsulu saxlanılır. Milli kitabxana artıq kitabxanaşünaslıq, biblioqrafiyaşünaslıq və kitabşünaslıq sahəsində aparıcı müəssisə, ölkənin bütün kitabxanaları üçün elmi-metodiki mərkəz, oxuculara kompleks kitabxana - biblioqrafiya, informasiya xidməti göstərmək, kitabxanalararası abonement, milli və tövsiyə biblioqrafiyası, beynəlxalq və ölkədaxili depozitar mərkəz funksiyalarını yerinə yetirir.

- Heç təsadüfi deyildir ki, elm və mədəniyyətə yüksək qiymət verən ulu öndərimiz Heydər Əliyev 4 dəfə (1995 - 3 iyun; 1996 - 4 mart; 1997 - 5, 20 noyabr) Milli Kitabxanaya gəlmiş və öz şəxsi kitabxanasından yüzlərlə kitabı kitabxanaya hədiyyə etmişdir. Bu barədə nələri qeyd etmək istərdiniz?

- Ulu öndərimiz Heydər Əliyev kitaba, kitabxanaya həmişə yüksək qiymət verirdi və onun bu kitabxanaya dörd dəfə gəlməsi də dediklərimizi bir daha təsdiq edir. Onun hər dəfə kitabxanamızda keçirilən kitab sərgilərində, yeni kitabların təqdimatında iştirak etməsi bu mədəniyyət ocağına yeni ab-hava gətirirdi. Həmin görüşlər həmişə maraqla keçirdi və kitabxanamızın həyatında özünü büruzə verən yeniliklərlə, dəyişikliklərlə yadda qalırdı. Yadımdadır, 1995-ci ildə Heydər Əliyev Kitabxanamıza gələndə öz şəxsi kitabxanasından bizim kitabxanaya 300-ə yaxın kitab bağışladı. Həmin kitablara baxanda valeh olmaya bilmirsən. Açığını qeyd etmək istərdim ki, ulu öndərimizin kolleksiyasındakı kitablara diqqətlə nəzər yetirdikdə bir daha bu insanın kitabı nə qədər çox sevdiyini müşahidə edirsən. Maraqlı cəhətlərdən biri budur ki, həmin kitablarda, yəni kitabların ayrı-ayrı səhifələrinin kənarında ulu öndərimizin qeydləri də yer almışdır. H.Əliyev mütaliə etməyi çox sevirdi və həm də oxuduğu hər bir kitaba yaradıcı şəkildə yanaşırdı. Ulu öndərimiz məhz həmin vaxt ziyalılarımıza müraciət edərək onları bu təşəbbüsə qoşulmağa çağırdı. Ziyalılarımız, alimlərimiz də onun bu çağırışına qoşularaq şəxsi kitabxanalarından kifayət qədər kitabları Milli kitabxanamıza bağışladılar.

- Bilirik ki, kitabxananın nadir kitablar bölməsində qədim tariximizin müxtəlif dövrlərini əks etdirən nadir və qiymətli nəşrlər, miniatür kitablar kolleksiyası saxlanılır.

- Məlum olduğu kimi, əvvəllər Milli kitabxanamızda nadir kitablar fondu var idi və bu fond binanın alt mərtəbəsində və həm də xırda bir otaqda yerləşirdi. Biz yubiley ərəfəsində nadir kitablar fondunu ikinci mərtəbəyə köçürdük və burada fond üçün kifayət qədər böyük yer ayrılmışdır. Bundan əlavə, fondun ayrıca bir otağında isə Azərbaycan Milli Kitabxanasının Muzeyini yaratdıq. Onu da demək istəyirəm ki, burada kitabxanamıza hədiyyə verilən kitablar, kitabxanamızın tarixinə aid olan materiallar və s. kitablar saxlanılır ki, biz onları eksponat kimi nümayiş etdiririk.

Fürsətdən istifadə edərək qeyd etmək istərdim ki, bu günədək biz qiymətli kitablarımızı oxucularımıza göstərə bilmirdik. İndi isə müraciət edərək deyirəm ki, bizim nadir kitablar fondunda olan qiymətli kitabları görmək arzusunda olan hər bir kəs Milli kitabxanamıza gəlib onlarla tanış ola bilər. Milli kitabxanamızda olan ən qədim və nadir kitablar indi açıq şəkildə, xüsusi rəflərdə və şüşələrin altında nümayiş etdirilir.

- 2004-cü ildə kitabxanaya Nazirlər Kabinetinin qərarı ilə “Milli kitabxana” statusu verilmişdir ki, bu da kitabxananın fəaliyyətinə verilən ən yüksək qiymətdir.

- Bəli, hər bir dövlətin əsas atributlarından biri də məhz milli kitabxananın mövcudluğudur və milli kitabxana bir ölkənin, dövlətin və xalqın tarixi yaddaşını mühafizə edərək gələcək nəsillərə çatdıran, ölkənin Milli arxiv fondunu yaradan və yaşadan elm məbədidir. Kitabxanamıza belə bir statusun verilməsi kollektiv üçün təbii ki, böyük bir fəxrdir, şərəfdir. Eyni zamanda bu ad bizim üçün böyük məsuliyyət deməkdir və biz öhdəmizə düşən vəzifələrin layiqincə yerinə yetirilməsinə çalışırıq.

- Bu gün elə bir sahə tapılmaz ki, orada kompyüterlərdən, digər informasiya texnologiyalarından istifadə olunmasın. M.F. Axundzadə adına Azərbaycan Milli Kitabxanasında bu istiqamətdə nə kimi işlər görülmüşdür?

- M.F.Axundzadə adına Milli Kitabxanada bu işə 1999-cu ildən başlanmış və 2000-ci ildə kitabxanada İnternet zalı istifadəyə verilmişdir. 2001-ci ildə isə kitabxanada Tədris Mərkəzi yaradılmışdır. 2003-cü ildən kitabxanada avtomatlaşdırılmış idarəetmə sisteminin tətbiqinə başlanmışdır. Sistemin proqram təminatı ABŞ-ın VTLS-kitabxanalar üçün xüsusi avtomatlaşdırılmış proqramlar işləyən təşkilatlar tərəfindən həyata keçirilmişdir. Buraya elektron kataloqun tərtibi, elektron kitabxananın təşkili, oxucuların qeydiyyatı, kitab verilişi, kitab fondunun komplektləşdirilməsi, Milli biblioqrafiyanın və respublikanın bütün iri kitabxanalarının toplu kataloqunun yaradılması, yəni bütün kitabxana proseslərinin avtomatlaşdırılması modulları daxildir. Artıq avtomatlaşdırma işinə kitabxananın ən vacib sahəsi olan elektron kataloqunun tərtibindən başlanmışdır və bu günə kimi milli ədəbiyyata dair təsvir məlumat bazasına daxil edilir. Elektron kataloqla yanaşı, Milli kitabxanada kitab fondlarının elektron versiyasının, yəni kitabların mətninin kompyüter yaddaşına köçürülməsi işinə də başlanmışdır. 2006-cı ildə informasiya-kommunikasiya texnologiyalarının kitabxana işinə tətbiqi ilə əlaqədar olaraq Milli kitabxanada aşağıdakı yeni şöbələr açılmışdır: kitabxana işinin avtomatlaşdırılması və informasiya texnologiyaları, elektron informasiya xidməti, elektron resurslarının yaradılması, kitabxana işçilərinin təlim və tədris mərkəzi. 2005-ci ildə Milli kitabxanamız Avropa Milli Kitabxanalar Konfransı Beynəlxalq Təşkilatına üzvlüyə qəbul edilib. Postsovet məkanında Rusiyadan sonra bu təşkilata üzv olan ikinci dövlət Azərbaycan oldu. Bu da kitabxanamızın beynəlxalq əməkdaşlıq üfüqlərinin genişlənməsinə, ümumavropa və ümümdünya layihələrində iştirakına real imkanlar yaradacaq. Bu təşkilat özündə 54 Avropa ölkəsinin kitabxanalarını birləşdirir. Avropa kitabxanalarının vahid bir sistemdə birləşdirilməsi ümumavropa elektron kitabxanasının yaranmasına imkan verəcəkdir.

- Azərbaycan Milli Kitabxanasının beynəlxalq əlaqələri barədə nə deyə bilərsiniz?

- Azərbaycan Milli Kitabxanasının beynəlxalq əlaqələrindən söz açarkən ilk növbədə qeyd etmək istərdim ki, bu gün dünyaya inteqrasiya etmədən inkişaf etmək qeyri-mümkündür. Bir qədər əvvəl söylədiyim məsələlər də bilavasitə kitabxanamızın xarici aləmlə mövcud əlaqələrini bir daha təsdiq edir. Biz bu məsələyə xüsusi diqqət yetiririk, çünki bu, dövrün, zamanın tələbidir. 90 yaşı tamam olan Azərbaycan Milli Kitabxanası 1965-ci ildən bu günə kimi dünyanın 60-dan artıq kitabxanası ilə beynəlxalq kitab mübadiləsini həyata keçirir. 30-dan artıq ölkənin milli kitabxanası ilə ikitərəfli qarşılıqlı əməkdaşlıq haqqında Memorandum imzalamış Azərbaycan Milli Kitabxanası ötən ayın 4-də növbəti Memorandumu Almaniyanın Humboldt Universiteti ilə imzalamışdır.

Memorandum Azərbaycan Milli Kitabxanasının direktoru və Almaniyanın Humboldt Universitetinin Azərbaycan tarixi kafedrasının müdiri xanım Eva-Maria Aux tərəfindən imzalanmışdır. Görüş zamanı xanım Eva-Maria Aux Humboldt Universitet kitabxanasının Qafqaz kataloqunda erməni ədəbiyyatının üstünlük təşkil etdiyindən, sanki Qafqazın yalnız onlardan ibarət olduğundan yanğı ilə danışmışdır. Xanım Eva-Maria Humboldt Universitet kitabxanasını Zaqafqaziya Respublikası olaraq Azərbaycanın xüsusilə tarixini, mədəniyyətini, irsini əhatə edən yeni ədəbiyyatla zənginləşdirməyi xahiş etmişdir. O, həmçinin Almaniya kitabxanalarını Azərbaycanda çıxan yeni nəşrlərlə tanış etmək, onların fondlarını komplektləşdirmək üçün ədəbiyyat siyahısı da istəmişdir.

Mən özüm Avstriya Milli Kitabxanasında olmuşam və oradan Milli kitabxanamızda olmayan və xüsusi əhəmiyyət kəsb edən 12 nüsxə kitabın surətini çıxararaq ölkəmizə gətirmişəm. Həmin kitablar Azərbaycanla bağlı, amma fransız dilində yazılmış dəyərli kitablardır və onların içərisində hətta 1741-ci ildə çap olunmuş kitablar da vardır. Onu da qeyd edim ki, Milli kitabxanamızla Avstriya Milli Kitabxanası arasında da Memorandum imzalanmışdır. Bu sənədin maddələrindən biri isə elektron kataloqlarda axtarış aparılmasıdır və məhz bu maddə bizə digər ölkələrin milli kitabxanalarında ölkəmiz üçün gərəkli olan kitabların axtarılıb tapılmasına imkan verir. Çexiyadan Nizami Gəncəvinin bizə məlum olmayan və XVII əsrə məxsus əlyazmasını əldə edib gətirdim. Əlbəttə, bu, olduqca gərəkli bir məsələdir və biz bu istiqamətdə fəaliyyətimizi davam etdiririk. Uzun müddət bizə bu məsələlərlə maraqlanmağa imkan verilmirdi. İndi biz müstəqil ölkəyik və fürsətdən istifadə edərək xarici ölkələrdə olan mənəvi sərvətlərimizi axtarıb tapıb ölkəmizə gətirməliyik. Bu işin çox yaxşı nəticələri olacağına əminəm.

- Kitabxanada həmçinin kütləvi tədbirlər, sərgilər, seminar və konfranslar, kitab təqdimatları, yazıçı və elm adamları ilə görüşlər keçirilir ki, bu da ədəbiyyatımızın, bütövlükdə mədəniyyətimizin təbliğində mühüm rol oynayır.

- Milli kitabxananın əsas vəzifəsi bir qədər əvvəl qeyd etdiyim kimi, xalqın tarixi yaddaşını mühafizə edib saxlamaq və onu gələcək nəsillərə çatdırmaqdır. Amma iş bununla da bitmir və Milli kitabxana həm də mövcud dəyərləri təbliğ etməlidir. Bilirsiniz, bu gün Azərbaycan tarixinin, ədəbiyyatının, bütövlükdə Azərbaycan reallıqlarının təbliğinə həmişəkindən daha çox ehtiyac vardır. Təbiidir ki, bu da qeyd etdiyiniz tədbirlər vasitəsilə reallaşdırıla bilər. Həm ölkə daxilində, həm də ölkədən kənarda keçirilən tədbirlərdə iştirak etməklə tariximizi və ədəbiyyatımızı bir daha təbliğ edir, milli mənəvi dəyərlərimizi digər xalqlara nümayiş etdirə bilirik. Biz içimizə qapılmırıq və çalışırıq ki, təbliğat işləri ilə məşğul olaq. Bu gün Azərbaycan Milli Kitabxanası dünya ölkələrinə kitablar göndərir. Qeyd etmək istərdim ki, kitabxanamızı ən çox Azərbaycan Respublikasının Mədəniyyət və Turizm Nazirliyi və Heydər Əliyev Fondu kitablarla təmin edir. Son beş-altı il ərzində dünya ölkələrinə 42000 nüsxə kitab göndərmişik. Bu da təbiidir ki, Azərbaycanın təbliği deməkdir.

Söhbətləşdi:

Ələsgər BEHBUDLU

Ədəbiyyat qəzeti.- 2013.- 11 oktyabr.- S.6.