Müseyib Zəyəm

Qarşımda bir kitab var. Şair və tarixən alim dostum Nizaməddin Onkun tərtib etdiyi "Böyük şair Müseyib Zəyəm" kitabı. Nizaməddin Onkun əsli-soyu İrəvan məkanındandır. XIX əsrdə məlum məsələlərlə bağlı İqdıra köçüblər. Nizaməddin bəy oradan da Almaniyanın Bielefeld şəhərinə köçüb. Azərbaycanda çoxlu dostları var. Mən Almaniyada olanda Müseyib Zəyəmin kitabını mənə hədiyyə etdi. Müseyib Zəyəm 1900-cü ildə Şəmkir mahalının Bayramlı kəndində dünyaya göz açıb. Məşəqqətli ömür yolu Bayramlı kəndindən, Şəmkir mahalından, Gəncədən, Batumdan, Trabzondan keçib, İqdır torpağında qərar tutub. 57 il ömür sürən Müseyib Zəyəm 1957-ci ildə İqdırda Asrı məzarlığında torpağa tapşırılıb.

"Məkanım Kür üstü, əslim Şəmkirdir" - deyən şair doğma Vətənini çox böyük məhəbbətlə tərənnüm edir. Onun əsərlərinin baş qəhrəmanı Azərbaycandı, Azərbaycanın uca dağları, qarlı zirvələri, qaynar bulaqları, sıx meşələri, havalı çayları Müseyib Zəyəmin ilham mənbəyidir. Doğulduğu Zəyəm elini, Tərtər çayını, Arazı, Kürü, Xəzəri dilə, qələmə gətirir, "Durnalar" adlı 15 bəndlik şerində Vətənin varlığını natiq bir dillə oxucuya çatdırır:

Vətən diyarından gələn durnalar,

Söyləyiniz bizim ellər dururmu?

Çəmənli, çiçəkli şirin obalar,

Bülbüllü bağçadan güllər dururmu?

"Bayrağım" şeri əsl vətənpərvərlik nümunəsidir.

Nədən üç rəngin qırmızı oldu,

Səni kim boyadı qana bayrağım.

Açıb qollarını qucaydım səni,

Öpəm səni dönə-dönə bayrağım.

- deyən şair Vətənini, millətini, bayrağını, torpağını iki gözü kimi sevib ona gözəl şeirlər həsr etmişdir.

Müxtəlif vaxtlarda Müseyib Zəyəmin şeirlərini məşhur türk alimi Fəxrəddin Kırzıoğlu və Nizaməddin Onk İqdırda müxtəlif dərgilərdə nəşr etdirmişlər. Şairin şeirlərindən bəzi nümunələri təqdim edirik.

Zəlimxan Yaqub

xalq şairi

Ədəbiyyat qəzeti.- 2013.- 25 oktyabr.- S.6.