Ön söz

Dmitri Aleksandroviç Mizqulin 1961-ci ildə Murmanskda doğulub. 1990-cı ildə Moskvada M.Qorki adına Ədəbiyyat İnstitutunu bitirib. Hərbi xidməti Azərbaycanda keçib. Bir sıra şeirləri də ilk dəfə Azərbaycanda "Literaturnıy Azerbaydjan" jurnalında işıq üzü görüb. Azərbaycanla əlaqələrini, ünsiyyətlərini yaşatması isə onunla sonuclanıb ki, 2000-ci ildən etibarən şeirləri Azərbaycan dilinə tərcümə edilib və "Azərbaycan", "Ulduz" jurnallarında, "Ədəbiyyat qəzeti"ndə çap olunub. "Şam" şairin Azərbaycan oxucusu ilə ilk sanballı görüşüdür. D.Mizqulin təbiətdən çox yazır. Amma onu əsla təbiət şairi kimi qələmə vermək olmaz. Onun demək olar ki, bütün şeirlərinin alt qatında insanla üzləşirsən. Çağdaş insanın acılarına şahid olursan. Azərbaycanla bağlı şeirləri də elə bu çevrədə maraqlıdır. D.Mizqulinin 2006-cı ildə "Xudojestvennaya literatura" nəşriyyatında çap olunmuş "Seçilmiş əsərləri"ndən götürülən bu şeirlərdən görünür ki, o, ən çox vətənin və vətən oğlunun taleyindən narahatdır. Bu təəssübkeşlik hissi onun bütün poeziyasına hakimdir.

O ki, qaldı şeirlərinin Azərbaycan dilinə tərcüməsinə (yeri gəlmişkən, D.Mizqulin bunu poeziyasının türk dünyasına açılan ilk pəncərəsi kimi dəyərləndirir) tərcüməçilər rus şerinə məxsus ölçülərdən zaman-zaman yayınsalar da, məğzə, mənaya son dərəcə sadiq qalıblar. Əlbəttə, son söz oxucunundur.

Ümidvarıq ki, "Şam" diqqət çəkəcək və bu şamın şöləsində yeni nəşrlər meydana gələcək.

"Şam" Rusiya-Azərbaycan ədəbi əlaqələrinin yeni mərhələsində barmaqla sayılan ədəbi hadisələrdən biri kimi sevindiricidir. Sındırılmış körpüləri bərpa etməyin zamanı çatıb.

D.Mizqulinin 1992-ci ildən başlayaraq onlarca kitabı çap olunub. Altı dəfə Ümumrusiya ədəbi mükafatlarına layiq görülüb. 2004-də "D.Mamin-Sibiryak", 2005-də "Petropol" mükafatları və s. Amma onun ən böyük mükafatı yaşadığı və çalışdığı Xantı-Mansiyski vilayətində qazandığı hörmətdir. Onun ictimai-siyasi fəaliyyəti, azərbaycanlıların sıx yaşadığı bu bölgədə vilayət duması ilə bağlıdır. "Şam"ın araya-ərsəyə gəlməsinə də bu azərbaycanlılardan biri -Tümendə yaşayıb-yaradan soydaşımız Knyaz Qoçaq dəstək olub.

Çingiz Abdullayev

Azərbaycanın xalq yazıçısı

Ədəbiyyat qəzeti.- 2013.- 25 oktyabr.- S.6.