Sözə loğman idin

İslam Səfərlinin xatirəsinə

Şirin nəğmə idi hər kəlmə sözün,

Həmişə gülərdi o nurlu üzün.

Döndün bir nəğməyə həyatda özün,

Halal insan idin, İslam Səfərli.

Mənasız ötmədi ömrünün anı,

Şam kimi əritdin sən şirin canı.

Ürəkdən sevirdin Azərbaycanı,

Bir qəhrəman idin, İslam Səfərli.

Ürəklər fəth etdin söz-söhbətinlə,

Zirvəyə ucaldın öz qeyrətinlə.

Vətən torpağında məhəbbətinlə,

Uğur yazan idin, İslam Səfərli.

Çiçəklər açırdı odlu sinəndə,

Saçın daranırdı bir meh əsəndə.

Hikmət bağçasında, söz çəmənində

Gözəl bağban idin, İslam Səfərli.

Sən sözdən al-əlvan çələng toxudun,

Sən gülə-çiçəyə nəğmə oxudun.

Sönməz qaladığın ocağın, odun,

Çox mehriban idin, İslam Səfərli.

Yazdığın nəğmələr gəlməz hesaba,

Ümidlə baxırdın gələn sabaha.

Səndən söz açırdı bütün el-oba,

Canlı dastan idin, İslam Səfərli.

Ürəklə görürdün gördüyün işi,

Vüqarlı dağ idin, qeyrətli kişi.

Unutmaq olarmı o xoş gülüşü,

Sözə loğman idin, İslam Səfərli.

Əziz Musa

Ədəbiyyat qəzeti.- 2013.- 27 sentyabr.- S.8.