Sənət məbədgahının salnaməsi

2013-cü ildə təkcə respublikamızda deyil, onun hüdudlarından çox-çox uzaqlarda tanınan Azərbaycan Dövlət Mədəniyyət və İncəsənət Universitetinin 90 yaşı tamam olur. Bu unikal təhsil ocağının yubileyi xarici ölkə nümayəndələrinin də iştirakı ilə respublika miqyasında geniş şəkildə qeyd ediləcəkdir. Dünyanın 22 ölkəsinin 46 ali məktəbi ilə sıx əlaqə saxlayan ADMİU bu gün elm, təhsil və sənət sahələrində qazandığı nailiyyətlərlə beynəlxalq aləmdə məşhurdur.

Universitetin 90 il ərzində keçdiyi yolu-Azərbaycanda peşəkar teatr təhsilinin yaranması və inkişaf mərhələlərini, ekran sənətlərinin tədrisini, musiqi təhsilini, Azərbaycanda ilk ali rəssamlıq təhsilinin uğurlarını, mədəniyyət və incəsənətimizin tədrisində ictimai-humanitar elmlərin rolunu, yeni elm sahəsi olan kulturologiya üzrə yüksək səviyyəli mütəxəssislərin hazırlanmasını, habelə ADMİU-nun xarici ölkələrlə əlaqələrini elmi aspektdə, konkret fakt və dəlillərlə, yeni məlumatlarla əks etdirən “Mədəniyyət və incəsənətimizin məbədgahı. ADMİU-90” adlı fundamental, nadir fotoşəkillərlə zəngin, çox dəyərli bir kitabın işıq üzü görməsi bu yubileyə ən dəyərli töhfədir.

ADMİU-nun Nəşriyyat-poliqrafiya mərkəzində yüksək səviyyədə, nəfis şəkildə nəşr edilmiş ensiklopedik səciyyəyə malik bu əsərin müəllifi Azərbaycan Dövlət Mədəniyyət və İncəsənət Universitetinin rektoru, görkəmli alim, elm və təhsil təşkilatçısı, əməkdar incəsənət xadimi, filologiya elmləri doktoru, professor Timuçin Əfəndiyevdir.

Ömrünü bu müqəddəs təhsil ocağına həsr edən, mədəniyyət və incəsənət sahəsində gənc mütəxəssislərin hazırlanmasında misilsiz xidmətləri olan və eyni zamanda əsrin dörddə birindən də çox bir müddətdə ADMİU-ya rəhbərlik edən professor Timuçin Əfəndiyevin çoxsaylı kitabları sırasında mühüm yer tutan bu əsər müəllifin birbaşa şahidi və iştirakçısı olduğu inkişaf yolunun salnaməsidir. Səkkiz hissədən ibarət olan kitabın ön sözü “90 illik yolun uğurları” adlanır.

Müəllif yazır: “Yarandığı ilk dövrlərdən etibarən Azərbaycanda mədəniyyət və incəsənət üzrə mütəxəssis hazırlayan universitetimiz öz başlanğıcını 1923-cü ildə Azərbaycan Maarif Komissarlığının qərarı ilə yaradılmış Bakı Teatr Məktəbindən götürür. O zaman məşhur sənətkarımız, Milan və Kiyev şəhərlərində təhsil almış, opera sənətimizin ilk professional müğənnisi, SSRİ xalq artisti Şövkət Məmmədovanın təklifi və təşəbbüsü ilə yaradılmış bu sənət məktəbi böyük inkişaf yolu keçmişdir”.

Ön sözdə daha sonra Bakı Teatr Məktəbinin ilk illərindən başlayaraq burada dərs demiş, onun inkişafında xidmətləri olmuş Əbdürrəhim bəy Haqverdiyev, Cəfər Cabbarlı, Hüseyn Cavid, Abbas Mirzə Şərifzadə, Ülvi Rəcəb, Mirseyfəddin Kirmanşahlı, Aleksandr Tuqanov, Rza Sarabski kimi sənət xadimlərindən danışılır. Qeyd edilir ki, o dövrdə Bakı Teatr Məktəbi təkcə Azərbaycan üçün deyil, Özbəkistan, Türkmənistan, Dağıstan, Krım və digər regionlar üçün də aktyor və rejissorlar hazırlayırdı. Bu hissədə 1945-ci ildə Bakı Teatr Məktəbinin əsasında Teatr institutunun yaradılması, 1968-ci ildə bu ali məktəbin Azərbaycan Dövlət İncəsənət İnstitutu adlandırılması, 1987-ci ildən etibarən burada köklü islahatların həyata keçirilməsi, 1991-ci ildə instituta respublika ali məktəbləri arasında ilk dəfə olaraq Universitet statusunun verilməsi, sonralar Mədəniyyət və İncəsənət universiteti kimi şöhrət tapması maraqlı faktlarla işıqlandırılmışdır.

Azərbaycan Dövlət Mədəniyyət və İncəsənət Universiteti bu gün Avropa İncəsənət Universitetləri liqasının tamhüquqlu üzvüdür. Hazırda burada 7 fakültə, 31 kafedra fəaliyyət göstərir, 40-dan artıq ixtisas və ixtisaslaşmalar üzrə kadrlar hazırlanır. Artıq ADMİU-nun diplomları beynəlxalq aləmdə tanınır. Universitetdə bir çox xarici ölkələrdən, xüsusən Türkiyədən gəlmiş çoxlu sayda tələbə təhsil almış və almaqda davam edir.

Universitetin elmi potensialı da yüksək səviyyədədir. Bu gün burada elm, maarif, mədəniyyət və incəsənət sahələrində böyük uğurlara imza atmış görkəmli pedaqoqlar fəaliyyət göstərir, tədrislə yanaşı qələmə aldıqları sanballı elmi əsərləri ilə də təhsil sisteminə xidmət edirlər. Təkcə bu faktı göstərmək kifayətdir ki, son beş ildə ADMİU-da 49 monoqrafiya, 53 dərslik, 70 dərs vəsaiti, 260 proqram və metodiki göstəriş nəşr edilmişdir.

Müstəqillik illərində təhsil sahəsində dövlət siyasəti prinsiplərinin həyata keçirilməsi, milli ideologiyanın tətbiqi, boloniya təhsil sisteminə keçid və başqa bu kimi amillər ali təhsilin inkişafı üçün geniş perspektivlər açmışdır.

Kitabın birinci hissəsi “Azərbaycanda peşəkar teatr təhsilinin yaranması və inkişaf mərhələləri”nə həsr olunmuşdur. Professor Timuçin Əfəndiyev bu sahənin keçdiyi yola professional teatrşünaslıq prizmasından nəzər salaraq yazır: “XIX əsrin sonu XX əsrin əvvəlləri Azərbaycanda dünyəvi peşəkar teatrın təşəkkül mərhələsidir. Bu dövrdə Azərbaycan maarifçilərinin səyi yalnız bir istiqamətə yönəlmişdi: dünyəvi peşəkar teatrı maarifçilik ideyalarının təcəssümü kimi milli mədəniyyətə qovuşdurmaq!”

Birinci hissə həcm etibarilə daha geniş və əhatəlidir. Bu da təbiidir. Çünki 90 illik tarixə malik teatr təhsili böyük bir inkişaf yolu keçmiş, hər şeydən əvvəl qüdrətli sənətkar-pedaqoqları ilə məşhur olmuşdur. Bu sənət xadimlərinin sadəcə adlarını sadalasaq, respublikamızda teatr təhsilinin ümumi mənzərəsi göz önündə canlanar.

Müəllif qeyd edir ki, Şərqdə ilk teatr təhsili ocağından - Bakı Teatr Məktəbindən başlayaraq yuxarıda adlarını çəkdiyimiz korifeylərdən başqa, sonrakı mərhələlərdə burada görkəmli Azərbaycan rejissorları Adil İsgəndərov, Rza Təhmasib, Mehdi Məmmədov, Məhərrəm Haşımov, Tofiq Kazımov, dramaturq Sabit Rəhman, məşhur filoloq-alimlər Əli Sultanlı, Mikayıl Rəfili, Məmməd Cəfər Cəfərov, səhnə danışığının ustadı Kazım Ziya, məşhur teatrşünas Cəfər Cəfərov kimi sənət və elm adamları dərs demiş, gənc aktyor və rejissor kadrlarının yetişdirilməsində əllərindən gələni əsirgəməmişlər.

Bu hissədə maraqlı faktlardan biri də Teatr institutunun ilk məzunları ilə əlaqədardır. Məzunlardan Turan Cavid, Adil Babayev, Hüseyn Abbaszadə, İshaq İbrahimov və başqaları sonralar qələmə aldıqları xatirələrində təhsil illərini, sevimli, unudulmaz müəllimlərini, tələbə dostlarını şükranlıqla xatırlayırdılar. Məzunlardan biri, bu gün də pedaqoji fəaliyyətini davam etdirən, Bakı Musiqi Akademiyasının professoru Gülcahan Güləhmədova - Martınovadır. Müəllif haqqında söz açdığımız kitabda Gülcahan xanımın universitetin 90 illiyi ilə əlaqədar aşağıdakı ürək sözlərini və təbriklərini vermişdir:

“Mən bu təhsil ocağının nailiyyətlərinə həmişə sevinirəm. Hər dəfə universitetin müəllim və tələbələrinin təkcə Azərbaycanda deyil, xarici ölkələrdə də keçirilən teatr və musiqi festivallarında, rəssamlıq sərgilərində qazandıqları uğurlarını eşidəndə böyük qürur hissi duyuram.

Bu gün Azərbaycan Dövlət Mədəniyyət və İncəsənət Universitetinin 90 yaşı var. Bu tarixi gün münasibəti ilə mən universitet rəhbərliyini, professor-müəllim heyətini, tələbələrini, bu unikal təhsil ocağının məzunlarını ürəkdən təbrik edir, onlara yeni-yeni uğurlar arzulayıram”.

Kitabda teatr təhsilinin bu günü aktyor sənəti, rejissor sənəti, sənətşünaslıq fakültələrinin fəaliyyəti əsasında işıqlandırılmışdır. Hazırda kinorejissorlardan Eldar Quliyev, Oqtay Mirqasım, Tofiq İsmayılov, Yalçın Əfəndiyev, Cəmil Quliyev, teatr rejissorlarından Ağakişi Kazımov, Azər Paşa Nemət, Cənnət Səlimova, aktyorlardan Ramiz Əzizbəyli, İlham Namiq Kamal, Firəngiz Mütəllimova, Bəsti Cəfərova, Zemfira Nərimanova, təcrübəli pedaqoqlardan Fikrət Sultanov, Gülşad Baxşıyeva, Əzizağa Quliyev, teatrşünaslardan İlham Rəhimli, Məryəm Əlizadə, Rafiq Sadıqov, Ədalət Vəliyev, Aydın Talıbzadə, İsrafil İsrafilov kimi respublika miqyasında tanınmış görkəmli elm və sənət xadimlərinin adı çəkilən fakültələrdə çalışması təqdirəlayiq hadisə olmaqla bərabər, həm də təhsilin bu sahədəki parlaq göstəricisidir. “Aktyor sənəti” fakültəsinin “Vokal” kafedrasına populyar opera müğənnisi Azər Zeynalovun rəhbərlik etməsi, “Xoreoqrafiya sənəti və səhnə plastikası” kafedrasının nailiyyətləri də sevindiricidir.

Kitabda adlarını çəkdiyimiz və çəkmədiyimiz bütün müəllimlərin xidmətləri qədirşünaslıqla qeyd olunur. Yeri gəlmişkən deyək ki, ümumiyyətlə, bu əsərdə ADMİU-nun 90 il ərzindəki fəaliyyətində xidməti olmuş müəllimlərdən geniş söz açılmış, heç kəs və heç nə unudulmamışdır.

Kitabın təkcə tear təhsili hissəsində deyil, kinoşünaslıq, musiqi, rəssamlıq, kulturologiya, ictimai-humanitar elmlər, habelə idman bölmələrində də tələbələrin beynəlxalq miqyasda müxtəlif festival, müsabiqə və yarışlarda qazandıqları qələbələr geniş şəkildə əks olunmuşdur.

Azərbaycanda ekran sənətlərinin tədrisi də Mədəniyyət və İncəsənət Universitetinin adı ilə bağlıdır. Vaxtilə kino sahəsində ali təhsil almaq istəyənlər Moskva, Leninqrad (Sankt-Peterburq) və digər şəhərlərə üz tuturdular. Artıq xeyli müddətdir ki, ADMİU respublikamız üçün yüksək ixtisaslı kinorejissor, kinoşünas, ssenarist kadrları hazırlayır. Bu sahəyə dövlətimizin böyük qayğı və diqqət göstərməsi kitabda xüsusi vurğulanır.

Professor Timuçin Əfəndiyev yazır: “Ölkə başçısının “Azərbaycan kino sənətinin inkişaf etdirilməsi haqqında” (23 fevral 2007-ci il) və “Azərbaycan kinosunun 2008-2018-ci illər üzrə inkişafına dair Dövlət Proqramının təsdiq edilməsi haqqında” (4 avqust 2008-ci il) sərəncamları kino təhsilinin inkişafı üçün yeni imkanlar açdı. Bu sərəncamlarda kinematoqrafiya üzrə yüksək peşəkarlığa malik yerli kadrların hazırlanmasına xüsusi diqqət yetirilmiş və bu məsələ Təhsil Nazirliyi, idarə və təşkilatların qarşısında bir vəzifə kimi qoyulmuşdur. Şübhəsiz ki, kino sənəti üzrə yerli kadrların hazırlanması işi əsasən Azərbaycan Dövlət Mədəniyyət və İncəsənət Universitetinə aiddir”.

Kitabın ekran sənədlərinin tədrisi hissəsini müəlllif haqlı olaraq “Dövrün ictimai sifarişi” adlandırmışdır. Bu hissədə ADMİU-da 1988-ci ildə “Kino və televiziya” kafedrasının yaradılması, 2000-ci ildə “Kinoşünaslıq” kafedrasının açılması və tanınmış mütəxəssislərin - Aydın Dadaşovun, Həmidə Ömərovanın, Aydın Kazımzadənin, Ayaz Salayevin, İlham Qazızadənin, Tural Əfəndiyevin universitetin tədris prosesinə cəlb olunması qeyd edilmişdir.

Kitabda ADMİU-nu bu sahə üzrə bitirən, hazırda “Azərbaycanfilm” kinostudiyasında, müxtəlif telekanallarda, mədəniyyət ocaqlarında çalışan məzunlardan da söz açılır.

Professor Timuçin Əfəndiyevin ADMİU-nun 90 illiyinə həsr etdiyi kitabın böyük bir qismi müsiqi təhsilinin keçdiyi yolu əhatə edir. Müəllif bu hissədə Bakı Teatr Məktəbinin ilk direktoru olmuş Şövkət Məmmədovadan başlayaraq günümüzə qədər bu sahədə fəaliyyət göstərən məşhur bəstəkar, dirijor və musiqiçilərin tədris prosesindəki fəaliyyətindən söz açır. Burada biz Niyazi, Cahangir Cahangirov, Hacı Xanməmmədov, Şəfiqə Axundova, Qulu Əsgərov, Lütfiyar İmanov, Gülarə Əliyeva, Rəhilə Cabbarova kimi sənətkarların ADMİU-dakı pedaqoji fəaliyyəti ilə tanış oluruq. Sələflərinin ənənəsini davam etdirən, bu gün universitetin “Musiqi sənəti” fakültəsində gələcəyin muğam ifaçılarını yetişdirən Canəli Əkbərov, Ağaxan Abdullayev, Səkinə İsmayılova, Mələkxanım Əyyubova, Qəndab Quliyeva, Nuriyyə Hüseynova və başqalarının da bir müəllim kimi zəhməti layiqincə qiymətləndirilmişdir. Fərəhli haldır ki, Azərbaycan estrada-musiqi ifaçılığının inkişafında böyük xidmətləri olmuş Yalçın Rzazadə, Vaqif Gərayzadə, mahir qarmonçalan Zakir Mirzəyev, tarzən Vamiq Məmmədəliyev ADMİU-nun təcrübəli müəllimləridirlər.

Musiqi sənətinin nəzəri problemləri ilə məşğul olan, qiymətli tədqiqat əsərlərinin müəllifi Nailə Kərimova, Ellada Hüseynova, Kamilə Dadaşzadə, unudulmaz piano ifaçısı, uzun illər musiqi fənləri və dirijorluq kafedrasına rəhbərlik etmiş mərhum Aytəkin Həsənova haqqında verilən məlumatlar da maraqla qarşılanır.

“Musiqi sənəti” fakültəsində “Aşıq sənəti” kafedrasının açılması təkcə ADMİU-da deyil, ümumiyyətlə, respublikamızın həyatında əlamətdar bir hadisə oldu. Bununla əlaqədar kitabda oxuyuruq:

“Azərbaycan Dövlət Mədəniyyət və İncəsənət Universiteti ölkəmizdə aşıq sənətini tədris edən ilk ali təhsil ocağıdır. Aşıq sənətinin YUNESKO-nun qeyri-maddi mədəni irs siyahısına daxil edilməsi onun ümumbəşəri əhəmiyyətindən xəbər verir. Bu qədim el sənətini tələbələrə aşıq ifaçılığının istedadlı nümayəndələri öyrədir”. Kitabda məşhur folklorşünas alim Məhərrəm Qasımlının aşıq sənətinə dair tədqiqat işlərinin tədris prosesində əhəmiyyətindən də danışılır.

Respublikamızda ilk ali rəssamlıq təhsilinin təşəkkülü Azərbaycan Dövlət Mədəniyyət və İncəsənət Universitetinin adı ilə bağlıdır. Yarım əsrlik tarixə malik rəssamlıq fakültəsində Tahir Salahov, Mikayıl Abdullayev, Ömər Eldarov, Toğrul Nərimanbəyov, Lətif Kərimov və başqa nəhəng sənətkar-pedaqoqlar dərs demişlər. Bu fakültə həm də təsviri sənət təhsili üçün baza rolunu da oynamışdır. Təkcə bunu göstərmək kifayətdir ki, respublikamızda Rəssamlıq Akademiyası məhz bu fakültənin potensial imkanları əsasında yaradılmışdır.

Bu gün də ADMİU-da adlı-sanlı rəssamlar, heykəltəraşlar, sənətşünaslar pedaqoji fəaliyyət göstərirlər. Ağaəli İbrahimov, Sevda Sadıqbəyova, Arif Əziz, Xanlar Əhmədov, Fəxriyyə Xələfova və başqa sənət adamlarının əməyi sayəsində rəssam tələbələrimiz də böyük uğurlara imza atmışlar. Müəllim və tələbələrin yaradıcılıq sərgilərinin bir qismi də ADMİU-nun 90 illiyinə həsr olunmuşdur.

Müəllif yazır: “2012-ci ildə ADMİU-nun 90 illiyinə həsr olunmuş silsilə sərgilərdə rəssamlıq fakültəsinin professor-müəllim heyətinin və tələbələrin əsərləri göstərilmişdir. Bu sərgilərdə universitetin keçdiyi şərəfli yol əks etdirilmiş, burada çalışmış görkəmli sənət xadimlərinin portretləri, həmçinin maraqlı dizayn layihələri, müxtəlif eskizlər, moda nümunələri nümayiş etdirilmişdir”.

Professor Timuçin Əfəndiyev bu kitabda icimai-hümanitar elmlərin tədrisi məsələlərinə də xüsusi diqqət yetirmişdir. Yuxarıda qeyd etdiyimiz kimi, ADMİU-nun təməl daşı hesab olunan Bakı Teatr Məktəbindən başlayaraq buraya görkəmli ədəbiyyatşünas-alimlər, xarici dil mütəxəssisləri, sosioloqlar pedaqoji fəaliyyətə cəlb olunmuşlar. Həmin ənənə bu gün də davam etdirilir.

Bu alimlərin təhsil sahəsindəki xidmətlərindən söz açan müəllif 90 ilin uğurları fonunda ictimai-humanitar elmlərin tədrisinin bu günü haqqında aydın təsəvvür yaradır. Müəllif qeyd edir ki, hazırda ADMİU-da bu sahədə görkəmli mütəxəssislər çalışırlar. Filoloq-alimlər Nizaməddin Şəmsizadə, Gülşən Əliyeva-Kəngərli, Vəfa Əliyev, Aydın Abıyev, Əli Əmirli kimi zəngin təcrübəyə malik pedaqoqların, habelə xarici dillər kafedrasının müəllimləri Aygün Əliyeva, Esmiralda Bağırlı, Leyla Əfəndiyeva kimi xarici dil mütəxəssislərinin fəaliyyəti əsərdə yüksək qiymətləndirilir.

Kitabın bu hissəsində “Sosial-siyasi elmlər” və “İqtisadiyyat və informatika” kafedralarının işi də geniş işıqlandırılır, Əlikram Tağıyev, Niyazi Mehdi, Mübariz Qurbanlı kimi alimlərin əməyinə yüksək qiymət verilir.

Yubiley kitabının maraqlı hissələrindən biri də “Kulturologiya yeni elm və tədris sahəsi kimi” adlanır. Müstəqilliyimizin ilk illərindən başlayaraq ADMİU-da dövrün tələblərindən irəli gələn islahatlar həyata keçirilməyə başlandı. Bu islahatlardan biri də universitetdə mədəni-maarif fakültəsinin ləğvi və onun bazası əsasında kulturologiya fakültəsinin yaradılması oldu. Ötən illər ərzində universitetdə fəaliyyət göstərən, sanballı elmi əsərləri, dərslik, dərs vəsaitləri, proqram və metodiki göstərişləri ilə bu sahənin tədris prosesinə ləyaqətlə xidmət edən alimlərimizdən Maral Manafova, Apdin Əlizadə, Sədaqət Əliyeva, Çingiz Bağırov, İlqar Hüseynov, Yeganə Əliyeva və başqaları kulturologiya elminin inkişafında böyük əmək sərf etmiş, gənc kadrların yetişdirilməsində əllərindən gələni əsirgəməmişlər. Kitabda kulturologiya sahəsində açılmış yeni ixtisaslardan da söz açan müəllif müstəqillik illərində “Mədəniyyət menecmenti”, “ Tətbiqi incəsənət”, “Bədii yaradıcılıq”, “Beynəlxalq mədəni əlaqələr”, “Turizm və mədəni sosial servis xidməti” kimi fənlərin əhəmiyyətini xüsusi qeyd edir.

Professor Timuçin Əfəndiyev yubiley kitabında tədris prosesinə, elmi fəaliyyətə və yaradıcılığa xidmət edən qurumlardan da geniş söz açır. Bu qurumlar elmi Şura, elm və yaradıcılıq sahəsi, elmi nəşrlər, Nəşriyyat-poliqrafiya mərkəzi, müdafiə şurası, tədris şöbəsi, kompüter mərkəzi, “Səda” tədris teatrı, səsyazma studiyası, kino və televiziya pavilyonu, muzey, kitabxana, arxiv, Həmkarlar İttifaqı Komitəsi, mətbuat xidməti və inzibati-təsərrüfat şöbəsidir. ADMİU-nun idman həyatı, müəllim və tələbə idmançılarımızın həm respublikamızda, həm də xarici ölkələrdə qazandıqları uğurlar haqqında da bu hissədə geniş məlumat verilir. Adlarını sadəcə sadaladığımız bu xidmət sahələri 90 yaşlı ali təhsil ocağını bütün əzəməti ilə göz önündə canlandırır.

Kitabın son hissəsi ADMİU-nun xarici əlaqələrinə həsr olunmuşdur. “Universitetimiz dünya meridianlarında” adlanan bu hissədə ADMİU-da təhsil alan əcnəbi tələbələrdən və eyni zamanda ali təhsil ocağının Beynəlxalq layihə və proqramlarda fəal iştirakından, xarici ölkələrin ali məktəbləri ilə bağlanmış müqavilələrdən bəhs olunur. Müəllif qeyd edir ki, universitetimizin Nyu-York, Çikaqo, Paris, London, Drezden, Moskva, Sankt-Peterburq, Kiyev, Belqrad, Qahirə və başqa xarici ölkə şəhərlərinin ali məktəbləri ilə sıx əlaqələri mövcuddur, bu əlaqələr ildən-ilə genişlənir və möhkəmlənir. Bu hissədə əcnəbi tələbələrin təhsili üzrə dekanlığın və hazırlıq şöbəsinin fəaliyyətindən də bəhs olunur.

ADMİU-nun rektoru, professor Timuçin Əfəndiyevin 2013-cü ilin ilk günlərində işıq üzü görmüş “Mədəniyyət və incəsənətimizin məbədgahı. ADMİU-90” adlı dəyərli əsəri aydın şəkildə göstərir ki, universitetin bütün kollektivi, fəaliyyəti beynəlxalq aləmdə örnək olan bu sənət məbədgahının 90 illik yubileyini təhsil, elm və yaradıcılıq sahələrində əldə etdiyi təqdirəlayiq nailiyyətlərlə və böyük uğurlarla qarşılayır.

Aqşin Babayev,

filologiya elmləri doktoru,

professor

Ədəbiyyat qəzeti.- 2013.- 11 yanvar.- S.2-5.