Alman şairəsi Brigitte Bretşnayder Sumqayıt şəhərində yaşayırdı. Bakıda Dillər İnstitutunda alman dilindən dərs deyirdi. Brigitte xanım azərbaycanlı bir müəllimlə ailə həyatı qurub. Poeziya vurğunudur, neçə kitabın müəllifidir. Sonralar ailəsilə Almaniyaya - vətəninə köçüb. Brigitte Azərbaycan xalqının sevincinə-kədərinə şərik olub. 1990-cı il qanlı 20 Yanvar hadisəsinə bir şeir həsr edib. Həmin şeiri oxucularımıza təqdim edirik.

Bakı. 20 Yanvar 1990

Günəş qəmli-qəmli Şərqdən boylanır,

Qızıl şüaları batıb al qana;

Mayaktək közərir, güntək sovuşur,

Şölələr paylanır acı ehsana!

Ey qəddar, amansız qırmızı yaylıq,

Buna nə ad verdin, de günahını!

Əsən yel cəllada lənət aparır, -

Güclə eşidilən ölüm ahını.

Gün doğub, işıqdan sanki xəbər yox,

Hər yanda qurğuşun, ölüm, qəm, kədər…

Qara ümidsizlik tutub dünyanı,

Ümidsiz açılıb titrək bir səhər.

Əzilmiş cəsədlər uzanıb orda,

Küçələr bomboşdu, bu nə həyatdı;

Bax, təkcə uzanan oğullar deyil,

Qanlı ulduzlar da dənizdə batdı…

Brigitte Bretşnayder

1993

Almancadan çevirəni:

Əlihəsən Şirvanlı

Ədəbiyyat qəzeti.- 2013.- 18 yanvar.- S.1.