“Narahat olma, Məlahət!”

Eşələnib hansısa təxribat radio verilişində Xəlil Rzanın Anar haqqında tənqidi sözlərini oxuculara çatdırmağa tələsən müəllif özünü “karlığa”, “korluğa” qoymasaydı, Xəlilin Anar haqqında yazdığı üç tərif dolu məqaləsinə də göz yummazdı. Xəlil Rza həbs olunanda məhz Yazıçılar Birliyində onu müdafiə komitəsi yarandı, SSRİ Ali Sovetinin deputatı kimi Anar Lefortova həbsxanasında Xəlillə görüşdü, onun azad edilməsi haqqında dəfələrlə Azərbaycan və SSRİ rəhbərliyinə müraciətlər etdi. Az sonra həbsdən azad olan Xəlil xatirələrində yazıçının xidmətlərini xüsusi minnətdarlıq hissiylə xatırlayır, Anarın Lefortova türməsinə onunla görüşə gəlməsini Azadlığın gəlməsi kimi qiymətləndirir.

Küçələrə düşüb guya ki, qaçan şairlər haqqında iftiralar uydurmaqdan başı açılanda Məlahət bu yazıları tapıb oxusun, onda bəlkə aldığı tapşırığı - Fikrət Qocanı və Anarı ləkələmək tapşırığını daha səviyyəli şəkildə yerinə yetirər.

Köşə yazarının o zaman neçə yaşı olub ki, (düzdür qadından yaş soruşmazlar) F.Qocanın qaçdığının şahidi olub.

Fikrət Qocanı xalq şairi adı almaqda suçlayan Məlahət onu da unudub ki, Fikrətdən çox qabaq bu adı Anarın təqdimatıyla Xəlil Rza Ulutürk alıb.

Bu səpkidə yazılar yazan müəlliflərin tipik yaramaz üsuluna uyğun olaraq Anara və Fikrət Qocaya nifrətlərini onların övladlarının adlarını hallandırmaqla da ifadə edirlər. Məlahət Ağacanqızı yazır: “Millət onların atalarından nə yarıdı ki, balalarından da nəsə görsün?”.

Narahat olma, Məlahət! Millət kimin kim olduğunu, kimlərdən yarıdığını və kimlərin muzdlu iftiralar yazdığını çox gözəl bilir.

Məlahətin yazısına Xəlil Rza ailəsinin adından Firəngiz xanım Ulutürk də münasibət bildirib:

“Azadlıq” qəzetinin 18 yanvar 2013-cü il sayında Məlahət Ağacanqızının “Xəlil Rza Ulutürk - xalqın şairi mənim şairim” köşə yazısında həqiqəti əks etdirməyən ifadələr narazılıqla qarşılanır. Xəlil Rza Ulutürkün həyat yoldaşı olaraq bildirirəm ki, Xəlil Rza şəxsiyyətinə xələl gətirən, onun adıyla başqa mənəvi dəyərlərimizə təhqiramiz ifadələr işlədən “Azadlıq” qəzeti və onun köşə yazarı Məlahət Ağacanqızı təkzib verib səhvlərini düzəltməlidir. Xəlil Rzanın qeydlərində, çıxışlarında hər iki ədib həmişə ləyaqətlə, hörmətlə yad edilib, vətəndaş mövqeləri unudulmaz şairimiz tərəfindən dəfələrlə qiymətləndirilib.”

Azərbaycan Yazıçılar Birliyinin Mətbuat xidməti

Ədəbiyyat qəzeti.- 2013.- 25 yanvar.- S.6.