Yadıma düşdü

O dağlarsız bağrım şan-şan olubdu,

Çəmən-çiçək, çöl yadıma düşübdü.

Qərvənd yurdu, Məmmədölən, Söyüdlü,

Novruzdüşən göl yadıma düşübdü.

Pay aparım çantasını doldurum,

Xançobana bir bayatı çaldırım.

Axşamüstü qəzəblənən ildırım,

Şaqqıldayan sel yadıma düşübdü.

İncə beldə parıldayan ağ sənək,

Yaşıllıqda yüz rəng çalan kəpənək,

Buzlu quzey, çiyələkli biçənək,

Göbələkli yal yadıma düşübdü.

Ay vurulmuş, ayaqyalın, qocalıq,

O dərədə nə gəzirsən, belə çıx?! -

Anam məni çağırdığı alaçıx,

Şillələyən əl yadıma düşübdü.

Ay Sücaət, gec anmazdı yar anan,

İlahidən gözəl-göyçək yaranan,

Səhər-səhər bulaq üstə daranan

Bir ətirli tel yadıma düşübdü.

Sücaət

Ədəbiyyat qəzeti.- 2014.- 4 aprel.- S.3.