Ürəyimdə

O çağlayan gur bulaqlar

Çağlar mənim ürəyimdə.

Neçə şirin xatirəni

Saxlar mənim ürəyimdə.

Lalə, nərgiz ləçəkləyər,

Üstünə şeh çiçəkləyər,

Qış günü də çiçəkləyər,

Dağlar mənim ürəyimdə.

Orda neçə şirin dastan,

Varaqlanan zaman-zaman,

Leyli, Məcnun əhdi-peyman

Bağlar mənim ürəyimdə.

Min qüssəli, min təlaşlı,

Baxar Xumar gözüyaşlı,

Yazıq Sənan boynu xaçlı

Ağlar mənim ürəyimdə.

Loğmanımsan, gözəl məkan,

Sənsən verən Məmmədə can.

Səndən əziz, Azərbaycan,

Nə var mənim ürəyimdə?!

Məmməd Aslan

Ədəbiyyat qəzeti.- 2014.- 4 aprel.- S.3.