Amandı

Düşmən girəvədə kəsib bərəni,

Ayıq ol, arxayın yatma, amandı!

Özünə dost bilmə üzə güləni,

Dostunu düşmənə satma, amandı!

Xəzinə yığan harınları yer yemiş,

Arif olan qarşıdadır qar demiş,

"Halal üzülməzdi" - atalar demiş,

Halalı harama qatma, amandı!

Bağla tamahını, dilini saxla,

Səninlə haqq olar, sən olsan haqla!

Eşitdiyin sözün kökünü yoxla,

Şərin dəryasına batma, amandı!

Dəmirçi sənətdə olmadı yatan,

Oldu axırı da söz alıb-satan,

Anan qarı olsa, qocalsa atan,

Ahı tutar səni, atma, amandı!

Dəmirçi Abbas

Ədəbiyyat qəzeti.- 2014.- 4 aprel.- S.3.