Baş redaktordan

Sayğılı oxucular, həmkarlar, zəngin ənənəsi olan (el dilində desək, qədim-qayım) “Ədəbiyyat qəzeti”nin məsuliyyət yükü “altına girmək” hər oğulun işi deyil. İndiki zamanda qəzet elə bir gündədir ki, onu anlatmaq həm vaxt aparar, həm də kiminsə qəlbinə dəyə bilər. Bircə onu demək olar ki, atlant tək olmur. Ona kömək olmasa nəinki göy qübbəsini, heç qarğı kümü də (daxmanı da) saxlaya bilməz.

“Ədəbiyyat qəzeti”nin tarixində təlatümlü olaylar çox olub, amma burada çalışanlar və çap olunanların əksəriyyəti həmişə həqiqətin yanında olublar. Çalışacağıq ki, o nümunəvi ənənələri davam etdirək.

Qarşıda hər kəsin can atdığı ədəbiyyat və əbədiyyət var. O isə çalışqanları, düşünməyi bacaranları və özünə güvənənləri sevir.

Dinindən, dilindən, irqindən, dünyabaxışından, ədəbi zövqündən asılı olmayaraq, hər kəslə əməkdaşlığa hazırıq. Yetər ki, bizə maraqlı, duyğusal, düşündürücü yazılar göndərəsiniz.

Ədəbiyyatımızın əbədiləşdirilməsi hər birimizdən asılıdır.

Əl də bizimdir, ətək də.

Bir-birimizdən elə yapışaq ki, vaxtında və urvatla ayrılmağı da bacaraq.

Bir-birimizə güzgüyə baxdığımız kimi baxaq və orada özümüzü görək.

Tanrı həm onu, həm özünü, həm də başqalarını sevənləri dərgahına buraxır.

Ədəbiyyat və əbədiyyət ordadır.

Ora hamımızın ilk və son məkanımızdır.

Haydı, dostlar, yolumuz açıq olsun!..

11.04.2014

Ədəbiyyat qəzeti.- 2014.- 11 aprel.- S.1.