Qarabağı və onun

folklorunu unutmayaq

Müasir dövrümüzdə Qərb ölkələrinin ali təhsil müəssisələrində oxuyan gənclərimizin sayı ilbəil artır. Avropaya inteqrasiya kimi mühüm bir ərəfədə yeniyetmələrin xalqımızın qəhrəmanlıq salnaməsini, möhtəşəm tarixi keçmişini, dilini, adət-ənənələrini özündə yaşadan folklor örnəklərini daim xatırlayaraq “qloballaşma” adı altında aparılan beyinlərin təmizlənməsi, eyni zamanda yad dəyərlərlə “zənginləşdirilməsi əməliyyatı”nın qurbanı olmamaları, milli kimliklərini unutmamaları olduqca vacib amildir. Eyni zamanda, Qarabağ kimi dərdi, ağrı-acısı olan bir xalqın gəncliyi qəhrəmanlıq tariximizi, keçmişimizi, Qarabağı, onun zəngin folklorunu bir an belə unutmamalıdır.

Folklorçular İctimai Birliyi yeniyetmələr arasında milli vətənpərvərlik hisslərinin gücləndirilməsi məqsədi ilə Azərbaycanın qəhrəmanlıq obrazlarından bəhs edən folklor nümunələrinin təbliğinin artırılması, gənc nəslin öz folklor nümunələri ilə daha yaxından tanış olması və onların təbliği yollarının öyrənilməsi ilə bağlı “Yeniyetmələr arasında vətənpərvərlik ruhunun yüksəlməsində folklorun rolu” mövzusunda layihə həyata keçirməyə başlayıb. Layihə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə həyata keçirilir.

Folklorçular İctimai Birliyi və AMEA Folklor İnstitutunun “Gənc alim və mütəxəssislər şurası” ilk tədbirini 8 aprel 2014-cü ildə Xocavənd rayonunun Salatın kənd orta məktəbində keçirmişdir. Tədbirdə Xocavənd rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri Əfsanə Quliyeva, Salatın kənd orta məktəbinin direktoru Rəmziyyə Aslanova, “Xocavənd” ictimai-siyasi qəzetinin baş redaktoru Gültəkin Ağayeva, məktəbin müəllim və şagird kollektivi iştirak etmişdir.

Tədbir zamanı təşkilatın təmsilçisi Vəfa Saleh iştirakçılara tədbir haqqında, Azərbaycan folkloru, onun xüsusiyyətləri haqqında geniş məlumat vermişdir. AMEA Folklor İnstitutunun “Gənc alim və mütəxəssislər şurası”nın üzvü, fil.ü.f.d. Ləman Süleymanova çıxış edərək iştirakçılara müasir zamanda bütün xalqların, eyni zamanda Azərbaycan xalqının öz milli-mənəvi mədəniyyətlərinə sahib çıxmasının, onu qoruyub, təbliğ edib gələcək nəsillərə ötürməsi işinin nə qədər vacib olduğunu bildirmişdir. Sonra isə şagirdlərə inşa müsabiqəsinin mövzusu təqdim edilmişdir. Növbəti gündə inşalar yazılmış və onlar məktəbin müəllim kollektivi ilə birgə yoxlanılmağa başlanmışdır. 3-cü gün inşa müsabiqəsinin qalibləri mükafatlandırılmışlar. Qeyd edək ki, müsabiqənin şərtlərinə görə 1-ci yerdə olan qalibə 100 manat, 2-ci yerdə olan qalibə 70 manat, 3-cü yerdə olan qalibə 50 manat pul mükafatı verilmişdir. İnşa müsabiqəsində Xocavənd rayonunun Salatın kənd orta məktəbinin şagirdləri Qədimli Çinarə 1-ci, Günay Aslanova 2-ci, Leyla Mustafayeva 3-cü yerə çıxmışdır. Aygün Abdullayeva, Əfsanə Rüstəmova, Səmayə Vəlizadə isə həvəsləndirici mükafatlar almışlar. Bundan başqa, müsabiqədə iştirak edən digər şagirdləri həvəsləndirmək məqsədi ilə daha 3 yaxşı inşa müəlliflərinə də həvəsləndirici mükafat kimi AMEA Folklor İnstitutunun nəşr etdiyi “Qarabağ: folklor da bir tarixdir” kitabları təqdim olunmuşdur.

Tədbirin sonunda çıxış edən Xocavənd rayonu Salatın kənd orta məktəbin direktoru Rəmziyyə Aslanova təşkilat nümayəndələrinə öz minnətdarlığını bildirərək, gələcəkdə də belə tədbirlərin keçirilməsi vacibliyini bildirmişdir.

A.Savalan

Ədəbiyyat qəzeti.- 2014.- 18 aprel.- S.16.