Tofiq Abdin

Azərbaycan ədəbi ictimaiyyətinə ağır itki üz vermişdir. İstedadlı publisist, şair və jurnalist, əməkdar mədəniyyət işçisi, Beynəlxalq Rəsul Rza Mükafatçısı Tofiq Abdin qəflətən dünyasını dəyişmişdir.

Tofiq Məhərrəm oğlu Abdinov 1941-ci il sentyabrın 1-də Salyan rayonunun Qırmızıkənd kəndində anadan olmuşdur. Orta məktəbi bitirdikdən sonra "Bolşevik" kolxozunda sıravi işçi, kənd kitabxanasının müdiri vəzifəsində çalışmışdır.

1960-cı ildən başlayaraq onun həyat və yaradıcılığı Bakı ilə bağlı olmuşdur. O, 1960-1966-cı illər Bakı Komvol fabrikində usta köməkçisi vəzifəsində çalışmış, eyni zamanda Azərbaycan Dövlət İncəsənət Universitetinin Teatrşünaslıq fakültəsində qiyabi təhsil almışdır. 1967-ci ildə qiyabi təhsilini başa vuran Tofiq Abdin Azərbaycan Sovet Ensiklopediyasında korrektor, kiçik redaktor vəzifələrində işləmişdir.

1968-ci ildən isə Tofiq Abdin "Qobustan" jurnalında çalışır. Həmin illər onun yaradıcılığının ən məhsuldar dövrü idi. Burada teatr və kino redaksiyasının müdiri vəzifəsində böyük işlər görür. Səriştəli mütəxəssislərlə yanaşı, jurnalın ətrafına istedadlı gəncləri yığır. O, istedadlı jurnalist və sair kimi nüfuz qazanır. Həmin illərdə "Etüd", "Nəğməli gecələr", "Ata sevgisi", "Bəlkə bir də görüşdük", "Sahilsiz dünya", "Bəşir Səfəroğlu", "Səhərimiz ayaq açır" və s. bu kimi ədəbi, publisist kitabları işıq üzü görür. Naxçıvan Poeziya Teatrında Rəsul Rzanın şeirləri əsasında hazırladığı “Bir gün də insan ömrüdür” kompozisiyası tamaşaya qoyulur.

Bir müddət Türkiyədə çalışan Tofiq 2001-ci ildən doğma jurnalı olan "Qobustan"a qayıdır. Burada 2005-ci ilə kimi məsul katib vəzifəsində işləyir, həmin jurnalda maraqlı yazılarla çıxış edir.

Sonrakı illər Azərbaycan Respublikasının Mədəniyyət Nazirliyində aparıcı məsləhətçi, "Mədəniyyət" qəzetində baş redaktorun müavini, "Xəzər" jurnalında baş redaktor müavini işləyir.

Bütün bu vəzifələrdə çalışmaqla yanaşı, istedadlı qələm sahibi respublika mətbuatında bir-birindən maraqlı yazılarla çıxış edir, cəmiyyətdə, ədəbi ictimaiyyətdə gedən proseslərə biganə qala bilmir. Eyni zamanda "Poeziya", "Proza" adlı kitablarını nəşr etdirir.

O, Türkiyədə çalışarkən "Orta doğu" və "Asiya" qəzetləri ilə əməkdaşlıq etmiş, son zamanlar isə "Ədalət" qəzetində Türkiyə ədəbiyyatını təbliğ edirdi.

Tofiq Abdin gözəl ailə başçısı, sədaqətli dost idi. Bütün bu keyfiyyətlərinə görə o, cəmiyyətdə böyük nüfuz qazanmışdı.

İstedadlı qələm sahibi, səmimi və təvazökar insan Tofiq Abdinin xoş xatirəsi onu tanıyanların və ədəbi ictimaiyyətin qəlbində daim yaşayacaq.

Azərbaycan Yazıçılar Birliyi

Ədəbiyyat qəzeti.- 2014.- 28 fevral.- S.8.