Asif Rüstəmli - 60

Azərbaycan Milli Elmlər Akademiyasının (AMEA) Nizami adına Ədəbiyyat İnstitutunda filologiya üzrə elmlər doktoru, professor Asif Rüstəmlinin 60 illik yubileyinə həsr olunmuş tədbir keçirilmişdir.

Tədbiri giriş sözü ilə açan AMEA-nın vitse-prezidenti, Ədəbiyyat İnstitutunun direktoru, akademik İsa Həbibbəyli yubilyarın yaradıcılığı barədə əhatəli məlumat vermişdir. Akademik qeyd etmişdir ki, professor Asif Rüstəmli Azərbaycan ədəbiyyatında əsasən cabbarlışünas kimi tanınmışdır. Alimin görkəmli dramaturq C.Cabbarlının yaradıcılığı ilə bağlı apardığı sanballı elmi tədqiqatlar mükəmməl bir monoqrafiyada toplanmışdır ki, bu da ədəbiyyatşünaslıq tariximizdə özünə layiqli yer tuta bilmişdir. Akademik İsa Həbibbəyli professor Asif Rüstəmlini klassik dövrün mətbu nəşrlərini diqqətlə araşdırıb mükəmməl tədqiqat işləri aparan, müntəzəm olaraq nəinki ölkəmizin, eləcə də qonşu dövlətlərin arxivlərində daima axtarışlar aparıb yeni faktlar üzə çıxaran, bununla da qiymətli məqalələr yazıb çap etdirən yorulmaz bir tədqiqatçı alim kimi səciyyələndirərək onun əməksevərliyini, qabiliyyətini, daima zəhmətə qatlaşdığını yüksək dəyərləndirmişdir. Akademik cabbarlışünas alimin araşdırmalarını özünəməxsus təqdimetmə sistemini və şəxsi dəst-xəttini önə çəkərək onun mövzuya özünəxas yanaşmaları ilə müdaxiləsi nəticəsində dəyərli elmi tədqiqat əsərlərinin ortaya qoyduğunu, C.Cabbarlı yaradıcılığından başqa “Molla Nəsrəddin” xəttinə də sadiq olduğunu, bu istiqamətə diqqət və maraq göstərərək bir sıra əsərlər yazdığını diqqətə çatdırmışdır.

Akademik İsa Həbibbəyli rəhbərlik etdiyi elmi-tədqiqat müəssisəsinin kollektivi adından professor Asif Rüstəmlini yubileyi münasibətilə təbrik edərək ona gül dəstəsi təqdim etmişdir.

Milli Məclisin deputatı Elmira Axundova, filologiya üzrə elmlər doktorları Qəzənfər Paşayev, Vaqif Arzumanlı, Məhərrəm Qasımlı, Vaqif Yusifli, Qurban Bayramov, Aslan Salmansoy, filologiya üzrə fəlsəfə doktorları Elnarə Akimova, Xalidə Xalid, həmçinin AMEA Azad Həmkarlar İttifaqının sədri Adil Mirabdullayev çıxış edərək institutun həmkarlar təşkilatının sədri, professor Asif Rüstəmlinin elmi-pedaqoji fəaliyyətindən, yaradıcılıq məziyyətlərindən danışmış, onu görkəmli ədəbiyyatşünas, mətnşünas, çalışqan iş yoldaşı, mehriban yol yoldaşı kimi səciyyələndirmişlər.

İnstitutun Elmi informasiya şöbəsinin müdiri Zakirə Əliyeva alimin ünvanına göndərilən təbrik məktublarını oxumuşdur. Azərbaycan Respublikası Baş nazirinin müavini, xalq yazıçısı Elçinin professor Asif Rüstəmliyə ünvanladığı təbrik teleqramında deyilir:

“Hörmətli Asif Rüstəmli!

Sizi - Azərbaycan ədəbiyyatşünaslığının görkəmli nümayəndələrindən birini anadan olmağınızın 60 illiyi münasibətilə ürəkdən təbrik edirəm. Siz bu şərəfli yubileyi, milli ədəbiyyatımızın istedadlı və zəhmətkeş tədqiqatçısı, yüksək elmi səviyyəli monoqrafiyaların, məqalələrin müəllifi olan nüfuzlu alim, eyni zamanda tanınmış publisist, ədib kimi ləyaqətlə qarşılayırsınız. Sizin Cəfər Cabbarlıya həsr olunmuş elmi əsərləriniz yalnız cabbarlışünaslığın deyil, öz elmi siqləti ilə ümumiyyətlə, müasir ədəbiyyatşünaslığımızın uğurlarıdır. Siz bu gün də bir gənclik həvəsi ilə axtarır, tapır və tədqiqatlarınızın yeni-yeni ədəbi nəticələrini ədəbiyyatşünaslığımızın faktına çevirirsiniz.

Hörmətli alimimiz!

Sizi bir daha təbrik edir, sizə uzun ömür, cansağlığı, xoşbəxtlik və həmişəki yaradıcılıq uğurları arzulayıram.”

Tədbir boyu yubilyarın həyat və yaradıcılığının müxtəlif məqamlarını əks etdirən slaydlar göstərilmiş, əsərlərinin sərgisi nümayiş etdirilmişdir.

Ağahüseyn ŞÜKÜROV

AMEA Nizami adına Ədəbiyyat

İnstitutunun mətbuat xidmətinin rəhbəri

Ədəbiyyat qəzeti.- 2014.- 28 fevral.- S.8.