Ədəbiyyat İnstitutunda

Azərbaycan Milli Elmlər Akademiyasının (AMEA) Nizami adına Ədəbiyyat İnstitutunun Elmi Şurasının növbəti iclası keçirilmişdir.

İclası giriş sözü ilə institutun direktoru, akademik İsa Həbibbəyli açaraq gündəlikdə duran məsələlər barədə məlumat vermişdir. Akademik İsa Həbibbəyli elmi-tədqiqat müəssisəsində hazırlanan “Mirzə Fətəli Axundzadə ensiklopediyası” üzrə nəzərdə tutulan materialların işlənilməsi, nəşrə hazırlıq vəziyyəti barədə ətraflı danışmışdır. Azərbaycan Prezidenti, cənab İlham Əliyevin “Mirzə Fətəli Axundzadənin 200 illik yubileyinin keçirilməsi haqqında” sərəncamının böyük əhəmiyyətindən, dahi mütəfəkkirin yubileyinin müvəffəqiyyətlə keçirildiyini xüsusi vurğulayan akademik bildirmişdir ki, ölkə rəhbərliyi tərəfindən Azərbaycan elm və mədəniyyətinə həmişə diqqət və qayğı göstərilir. Görkəmli elm və mədəniyyət xadimləri ilə yanaşı, klassik irsə doğma münasibət, Azərbaycan mədəniyyəti tarixində misilsiz xidmətlər göstərmiş ədəbi simaların möhtəşəm yubiley tədbirlərinin keçirilməsi də bu qəbildəndir. Böyük mütəfəkkir M.F. Axundzadənin yubileyi ilə bağlı AMEA Rəyasət heyətinin də qərar qəbul etdiyini və qərara əsasən müxtəlif tədbirlərin həyata keçirildiyini xatırlayan institut rəhbəri Ədəbiyyat İnstitutunda hazırlanan “Mirzə Fətəli Axundzadə ensiklopediyası”nın böyük əhəmiyyət kəsb etdiyini bildirmişdir. Akademik İsa Həbibbəyli dahi mütəfəkkiri Azərbaycan ədəbiyyatının nadir simalarından biri kimi səciyyələndirərək nəşri nəzərdə tutulan ensiklopediyanın də onun adına layiq olacağını diqqətə çatdırmışdır.

Müzakirədə filologiya üzrə elmlər doktorları Zaman Əsgərli, Vaqif Arzumanlı, Tahirə Məmməd çıxış edərək ensiklopediya ilə bağlı fikir və mülahizələrini bildirmişlər.

Məsələ ilə əlaqədar yekun sözü ilə çıxış edən akademik İsa Həbibbəyli adıçəkilən ensiklopediyanın hazırlanması işində əldə olan qaynaqlardan yalnız mənbə kimi istifadə edilərək yenidən yazılmasını, ölkəmizdəki mövcud sənədlərlə bərabər Gürcüstan və Rusiya arxivlərində də bu məqsədlə aparılacaq işin vacibliyini bildirmiş, beləliklə, dünya praktikası əsas götürülərək tamamilə yeni və fərqli bir nəşrin işıq üzü görməsinin əhəmiyyətini vurğulamış, bununla bağlı yaradılan işçi qrupuna lazımi göstəriş, tapşırıq və tövsiyələrini vermiş, tapşırıqların icra müddətini müəyyənləşdirmişdir.

Sonra gündəlikdə duran cari məsələlərə baxılmışdır.

Ağahüseyn Şükürov

AMEA Nizami adına Ədəbiyyat

İnstitutunun Mətbuat xidmətinin rəhbəri

Ədəbiyyat qəzeti.- 2014.- 7 mart.- S.8.