Ay beləsindən

Gecənin görəsən nə zamanında

O dağı keçəcək ay beləsindən.

Ağılsız mən ğözəl könlü qınardım,

O necə keçəcək ay beləsindən.

Kim deyər ki, keçən günə gün çatar,

Bəxt insanda gah oyanar, gah yatar.

Az da olsa ömrün daha da artar,

Günün ki, keçəcək ay beləsindən.

Cavab versin kimsə candan keçibsə,

Çox ariflər çox meydandan keçibsə.

Leyli sevib, Məcnun ondan keçibsə,

Məhəmməd keçəcək ay beləsindən.

Bir gün

Başa çəkib özün başa düşməyən,

Başında dumanlar olacaq bir gün.

Sən demə ki, bu gün dövran mənimdi,

Səni də birinə qatacaq bir gün.

Varsa bu dünyada axıra qalan,

Dastan olub dildə bəxtiyar olan.

Sultan Süleymana əlini çalan,

Sənə də əlini çalacaq bir gün.

Yola düzəl, könül uyma hər yana,

Görmədim dünyada bir halalzada.

Ay Məhəmməd, hörmət qazan dünyada,

Əzrayıl canını alacaq bir gün.

Çardağımız yatır daha

Bir-birimizi çox istərdik,

Dünya bizi atır daha.

Çəfa çəkdik çan saxladıq,

Ömür başa çatır daha.

Dünya baxmır ağlamağa

Ana deyil, nə də ata.

Gücü çatmır saxlamağa,

Əzrayıla satır daha.

Dünya nələr daşıyacaq,

Çoxları baş qaşıyacaq.

Ağ otaqlar yaşıyacaq,

Çardağımız yatır daha.

Qaralmazmı axan qanın,

Ağrıyanda cismi canın.

Kənd koxanın, kef dünyanın,

Torpağına qatır daha.

Heyif çox əziyyət, heyif zəhmət,

Kimdir bilən qədir-qiymət.

Deyən varmı, ay Məhəmməd,

Adın itib batır daha.

Ay niyə-niyə...

Qul olan könlüm ki, sənə bağlanıb,

Sən onu açmırsan, ay niyə-niyə.

Həsrətindən neçə-neçə yaram var,

Arayıb seçmirsən ay niyə-niyə.

Qış dolanıb bahar çağı gələcək,

Kiminə xoş, kimə yağı gələcək.

Gözəlliyin bir solmağı gələcək,

Heç ölçüb-biçmirsən ay niyə-niyə.

Şirin bir bəndəsən əsli zatın var,

Məhəmməd yanında çox qiymətin var.

Adamı yandıran bir xəsyətin var,

Heç ondan keçmirsən ay niyə-niyə.

Aşıq Dərya Məhəmməd

Ədəbiyyat qəzeti.- 2014.- 7 mart.- S.5.