Əmin Əfəndiyev

Amansız ölüm tanınmış ədəbiyyatşünas, biblioqraf və tərcüməçi Əmin Əfəndiyevi aramızdan apardı.

Əmin Tahir oğlu Əfəndiyev 1933-cü il may ayının 19-da Qax rayonunun İlisu kəndində anadan olmuşdur. Orta təhsilini burada almışdır. 1957-ci ildə Bakı Dövlət Universitetinin filologiya fakültəsini bitirmişdir. Əmək fəaliyyətinə həmin universitetin kitabxanasında başlamış, sonra M.F.Axundzadə adına Milli Kitabxanada baş biblioqraf, şöbə müdiri, direktor müavini vəzifələrində işləmişdir. 1967-1971-ci illərdə Nizami adına Ədəbiyyat İnstitutunun aspiranturasında qiyabi təhsil almışdır. «Azərbaycan-latış» ədəbi əlaqələri tarixindən mövzusunda namizədlik dissertasiyası müdafiə etmişdir. 1976-1978-ci illərdə Azərbaycan Sovet Ensiklopediyası baş redaksiyasında mətbuat, xalq maarifi və pedaqogika elmi redaksiyasının müdiri vəzifəsində işləmişdir. Azərbaycan Dövlət Mədəniyyət və İncəsənət Universitetində baş müəllim, kafedra müdiri, dekan müavini, Azərbaycan MEA-nın Mərkəzi Elmi Kitabxanasının direktor müavini, Azərbaycan Sovet Ensiklopediyası baş redaksiyasında redaksiya müdiri, MEA-nın Milli Münasibətlər İnstitutunda elmi işçi, MEA Mərkəzi Elmi Kitabxanasında direktor vəzifəsində çalışmışdır.

2003-cü ildən Nizami adına Ədəbiyyat İnstitutunda informasiya və biblioqrafiya şöbəsinin müdiri idi. Elmi- ədəbi fəaliyyətə keçən əsrin 50-ci illərində başlamışdır. «Amerika ədəbiyyatı Azərbaycan dilində» adlı ilk mətbu əsəri «Ədəbiyyat və incəsənət» qəzetində dərc olunmuşdur. «M.Əzizbəyov adına Bakı şəhər Kitabxanasının iş təcrübəsindən», «İmadəddin Nəsimi», «SSRİ xalqları ədəbiyyatı Azərbaycan dilində», «Azərbaycanın laureat yazıçıları», «Gəncliyin tərənnümü», «İlyas Əfəndiyev», «Orucov qardaşlarının mətbəəsi», «İlyas Əfəndiyevin yaradıcılığı», «Kamal Talıbzadə», «Ağamusa Axundov», «Yaşar Qarayev», «Həmid Araslı» kitablarının müəllifidir. 200-dən artıq elmi-publisistik məqaləsi dərc edilmişdir. İ.S.Turgenevin «Seçilmiş əsərləri»ni tərtib edib izahlar və qeydlərlə nəşr etdirmişdir.

İstedadlı qələm yoldaşımız, səmimi, təvazökar insan Əmin Əfəndiyevin işıqlı xatirəsi qəlbimizdə yaşayacaq.

Azərbaycan Yazıçılar Birliyi

Ədəbiyyat qəzeti.- 2014.- 20 mart.- S.8.