Qulam Sadiq

Amansız ölüm istedadlı qələm yoldaşımız Qulam Sadiqi aramızdan apardı.

Qulam Yəhya oğlu Sadıqov 1947-ci ildə Cəlilabad rayonunun Ləki kəndində anadan olmuşdur. 1965-ci ildə Salyan şəhərində orta məktəbi bitirib Azərbaycan Dövlət Pedaqoji Universitetinin filologiya fakültəsinə daxil olmuşdur. 1969-cu ildə ali təhsilini tamamlayıb Salyan rayonunun Xıdırlı kəndində pedaqoji fəaliyyətə başlamışdır. 1970-1974-cü illərdə Salyanda çıxan «Qələbə» qəzetində ədəbi işçi, şöbə müdiri, məsul katib (1970-1974), Azərbaycan KP Salyan rayon Komitəsində şöbə müdirinin müavini, şöbə müdiri (1974-1977), 1977-1990-cı illərdə Salyan rayon İcraiyyə Komitəsində sədr müavini, 1990-1999-cu illərdə rayon təhsil şöbəsinin müdiri, 1999-2000-ci illərdə Salyan rayon icra başçısının humanitar məsələlər üzrə müavini, 2005-2009-cu illərdə Respublika Müəllimlər İnstitutunun Salyan filialında direktor müavini, 2009-cu ildən «Hakimiyyət» qəzetinin bölgə müxbiri işləmişdir.

Qulam Sadiq ədəbi yaradıcılığa ötən əsrin 70-ci illərində başlamışdır. İlk mətbu yazısı 1972-ci ildə işıq üzü görmüşdür. «Pəncərə», «İnam», «Ana Kürə bağlı ömür», «Oqtay Rza çiçəyi var söz gülşənində», «Nəslin ağsaqallı», «Kəhər atlı sədr», «Muğanın müqtədir müəllimi», «Böyük övliya Ağa Mirbağır ağa», «Şagirdlərinin mənəvi atası» kitablarının müəllifidir.

İstedadlı qələm yoldaşımız, səmimi, təvazökar insan Qulam Sadiqin işıqlı xatirəsi qələm yoldaşlarının qəlbində yaşayacaq.

Azərbaycan Yazıçılar Birliyi

Ədəbiyyat qəzeti.- 2014.- 20 mart.- S.8.