Yazıçılarımızın Türkiyə səfəri

3-11 may tairixində Azərbaycan Yazıçılar Birliyinin sədri, xalq yazıçısı Anarın rəhbərliyi ilə yazıçılar Türkiyədə səfərdə olublar. Yazıçılar Əskişəhərdə Avrasiya Yazarlar Birliyinin və Türkdilli Ölkələrin Yazarlar Birliyinin birgə təşkil etdiyi Türk dünyası Yazar Məclisinin toplantısına qatılıblar. Toplantıya müxtəlif türk dövlətlərindən gəlmiş 48 tanınmış yazar qatılıb. Tədbiri giriş sözü ilə Avrasiya Yazarlar Birliyinin başqanı Yaqub Öməroğlu açıb. Daha sonra söz Türkdilli Ölkələrin Yazarlar Birliyinin başqanı, xalq yazıçısı Anara verilib. O, çıxışında bildirib ki, türkdilli ölkələrin yazarlarının birləşməyə, birgə fəliyyət göstərməyə böyük ehtiyacı vardı və bu baxımdan Türkdilli Ölkələrin Yazarlar Birliyinin yaranmasının əhəmiyyəti böyükdür. “İndi Türk dünyası yazarlarının paytaxtı Əskişəhərdir. Hörmətli valiyə də minnətdarlığımı bildirirəm ki, Əskişəhərdə TÖYB üçün ofis ayrılmasına göstəriş verib” - deyə xalq yazıçısı çıxışını yekunlaşdırıb.

Əskişəhərdə ilk dəfə olaraq

Türk Dünyası Kitab Sərgisi

təşkil edilib

Silsilə tədbirlər çərçivəsində ilk dəfə olaraq Türk Dünyası Kitab Sərgisi də keçirilib. Sərgi Avrasiya Yazarlar Birliyi tərəfindən təşkil olunub. Mayın 5-də şəhərin Vilayət meydanında açılışı baş tutan sərgidə şəhər valisi Güngör Azim Tuna, Türkiyənin təhsil naziri Nəbi Avçı, Azərbaycanın xalq yazıçısı Anar, Avrasiya Yazarlar Birliyinin sədri Yaqub Öməroğlu, "Azərbaycan Naşirlər və Poliqrafçılar" Birliyinin sədri Bəhruz Axundov, Türk dünyasının tanınmış yazıçıları və digər ziyalılar da iştirak ediblər.

Mərasimdə çıxış edən Yaqub Öməroğlu, Anar, Milli Məclisin deputatı, yazıçı-publisist Aqil Abbas, türkiyəli naşir Süleyman Koca, eləcə də sərgiyə qatılan digər türkdilli xalqların nümayəndələri tədbirin əhəmiyyətini vurğulayıblar, sərginin qardaş xalqlar arasında mədəni əlaqələrin daha da möhkəmlənməsindəki rolundan danışıblar. Bu kitab bayramının yazıçılar və naşirlərin qarşılıqlı iş birliyinə də öz töhfəsini verəcəyini bildiriblər. Yüzə yaxın stendin qurulduğu və mayın 11-dək açıq olan sərgidə kitabsevərlər türkdilli xalq və toplumları təmsil edən naşirlərin nəşrləri, tanınmış yazarların əsərləri ilə yaxından tanışlıq imkanı əldə ediblər. Bundan əlavə, sərgidə müxtəlif dərgilər, türk sənət nümunələri, elmi-publisistik məzmunlu kitablar da nümayiş etdirilib.Azərbaycan bu kitab bayramına 5 nəşriyyatla qatılıb. Naşirlərimiz tərəfindən təqdim edilən nəfis tərtibatlı kitablar iştirakçıların marağına səbəb olub. Azərbaycanı təmsil edən nümayəndə heyətinin tərkibinə daxil olan ədiblərimiz - Anar, Aqil Abbas, İradə Tuncay, Pərvin və digərlərinin imza günləri də sərgiyə qatılanlarda maraq oyadıb. Qərara alınıb ki, Türk Dünyası Kitab Sərgisi ənənəyə çevrilsin.

Rəcəb Tayyib Ərdoğanla

görüş

Tədbirlər çərçivəsində Azərbaycan nümayəndə heyətini Türkiyənin baş naziri Rəcəb Tayyib Ərdoğan da qəbul edib. Görüş Türkiyənin İstanbul şəhərində baş tutub. Qonaqları salamlayan Baş nazir Türkdilli Ölkələrin Yazarlar Birliyinin yaranmasının əhəmiyyətini vurğulayıb, xalqların yaxınlaşmasında ədəbiyyatın böyük önəm daşıdığını bildirib. Görüşdə Əskişəhər valisi Güngör Azim Tuna, təhsil naziri Nəbi Avçı, Avrasiya Yazarlar Birliyinin sədri Yaqub Öməroğlu, Türkdilli Ölkələrin Yazarlar Birliyinin başqanı, Azərbaycan Yazıçılar Birliyinin sədri, xalq yazıçısı Anar çıxış ediblər.

Anar çıxışında deyib: - Sayın Başbakan, gərgin çalışma gündəminizə rəğmən vaxt tapıb bizlərlə görüşdüyünüz üçün şəxsən öz adımdan və yazar arkadaşlarım adından sizə təşəkkür edirəm. Bildiyiniz kimi, bu ilin fevral ayında Avrasiya Yazarlar Birliyinin, Azərbaycan, Qazaxıstan və Qırğızıstan Yazıçılar birliklərinin təşəbbüsüylə, TÜRKSOY-un yardımıyla, Əskişəhər valiliyinin dəstəyi və zati-alinizin himayəsilə Türkdilli Ölkələrin Yazarlar Birliyini yaratdıq və mən bu birliyin başqanı seçilməklə şərəfləndirildim.

Məqsədimiz türkdilli xalqların ədəbiyyatlarını bir-birinə daha yaxşı tanıtmaqla xalqlarımızı bir-birlərinə daha da yaxınlaşdırmaqdır. Xalqlarımızın öz ana dillərinin özəlliklərini qoruyub-saxlamaqla Türkiyə türkcəsinin aramızda ünsiyyət və rabitə dili kimi təsdiq olunması təklif və qəbul edilib.

Sayın Başbakan, bu günlərdə Praqada Türkiyənin iştirak etmədiyi bir toplantıda Türkiyəyə böhtan atılanda hörmətli Prezidentimiz İlham Əliyev “Mən burdayam” - deyib və böhtançıya layiqli cavab verib. Prezidentimizin bu hərəkətindən və çıxışından qürur duyuruq. «Mən burdayam» artıq bir şüar kimi səslənir. İnanıram ki, bundan sonra da hər hansı səbəbdən Türkiyənin iştirak etmədiyi bir toplantıda Azərbaycan “Mən burdayam” - deyib Türkiyəmizin haqqını müdafiə edəcək və hər hansı səbəbdən Azərbaycanın qatılmadığı bir toplantıda Türkiyə “Mən burdayam” deyib bizim haqq işimizi müdafiə edəcək. Və bu qardaşlıq, bir-birinə arxa durmaq sonsuza qədər davam edəcək.

Sayın Başbakan, böyük şairimiz Nazim Hikmətin Sovetlər Birliyində ən yaxın dostlarından biri atam Rəsul Rza idi. Mən də ilk gənclik yaşlarımdan Nazimi şəxsən tanımış, söhbətlərini eşitmiş, şeirlərini öz dilindən, öz səsilə dinləmişəm. Nazim haqqında anılarım və düşüncələrim əsasında «Kərəm kimi» adlı kitab yazdım və bu kitab Azərbaycandan öncə Türkiyədə nəşr olundu. Bu kitabda Nazim Hikmətin haqqını qaytardığınız, Türkiyə vətəndaşlığını bərpa etdiyiniz üçün Sizə yazdığım məktub - şəxsən sizə və başçılıq etdiyiniz hökumətə minnətdarlığımı ifadə edən məktub da çap olunub. Böyük məmnuniyyətlə həmin kitabı Sizə təqdim edirəm.

Sonra xalq yazıçısı Anar «Kərəm kimi» kitabını Baş nazir R.T.Ərdoğana təqdim edib.

Daha sonra Qazaxıstan, Qırğızıstan, Özbəkistan, Tatarıstan, Başqırdıstan, Çuvaşıstan, Dağıstan, Qaraçay, Kərkük türkmanları ədəbiyyatlarını təmsil edən yazıçılar da çıxış ediblər.

Azərbaycan Milli Məclisinin deputatı, yazıçı Aqil Abbas Ərdoğanı onun lideri olduğu partiyanın bələdiyyə seçkilərində qələbəsi münasibətilə təbrik edib və prezident seçkilərində ona uğurlar arzulayıb.

Sonda Ərdoğan yazıçılarla xatirə şəkli çəkdirib.

"XIV Ankara Hekayə Günləri"

Mayın 7-də ənənəvi "XIV Ankara Hekayə Günləri" çərçivəsində Ankara Universitetində Azərbaycan hekayəsi ilə bağlı ayrıca panel keçirilib. Panelin moderatoru Ərciyəs Universitetinin doktoru Sevinc Üçgül Azərbaycan ədəbiyyatı, nəsri barəsində ətraflı söz açıb. Sonra professor Hamlet İsaxanlı hekayə barədə məruzə ilə çıxış edib. Alim məruzədə Çexovun hekayələri ilə müqayisəli təhlil aparıb. Türk yazarı, Azərbaycan ədəbiyyatından çoxsaylı tərcümələr eləmiş İmdat Avşar tərcümə işinin çətinlikləri, üstünlükləri, problemlər və perspektivlərdən danışıb.

Xalq yazıçısı Anar ədəbiyyatımızda hekayə janrı ilə bağlı fikir və mülahizələrini bölüşüb. Tədbirdə iştirak edənlərin Azərbaycan ədəbiyyatı ilə bağlı sualları cavablandırılıb.

AYB Mətbuat Xidməti

Ədəbiyyat qəzeti.- 2014.- 16 may.- S.2.