Xalq şairi ilə görüş

"Aytam" uşaqların mədəni maarifləndirilməsi ictimai birliyi 20 ildən çoxdur ki, fəaliyyət göstərir. Birliyimizin məqsədi hərtərəfli dünyagörüşünə malik, mədəni-milli dəyərlərlə zəngin, sözün əsl mənasında vətəndaş yetişdirilməsinə nail olmaqdır.

Biz belə hesab edirik ki, hər bir vətəndaş özünün bugünkü, keçmiş mədəni-milli dəyərlərini, tarixini doğru-dürüst bilməli, gələcəkdə bu dəyərləri qoruyub saxlamaqla yanaşı, onları daha da inkişaf etdirməlidir.

Bu baxımdan biz öz fəaliyyətimizdə muzey-məktəb əlaqələrinə böyük önəm veririk. Uşaq və gəncləri muzeylərə cəlb edərək, onlara öz keçmişimizi, tariximizi əyani vəsaitlər əsasında öyrədirik.

Birliyimiz fəaliyyəti müddətində paytaxtımızdakı muzeylərin demək olar ki, əksəriyyətində çoxlu sayda tədbirlər keçirib. Belə ki, Nizami adına Azərbaycan Ədəbiyyatı muzeyində, Bülbülün ev muzeyində, Şirvanşahlar qoruq muzeyində, Təhsil muzeyində, Almaniya mədəniyyət mərkəzi və s. mədəniyyət ocaqlarındakı tədbirlərimiz böyük maraqla keçib.

"Aytam" muzey-məktəb əlaqələri işində paytaxtımızda olan xarici ölkə mədəniyyət mərkəzləri ilə də sıx əməkdaşlıq edir. Bu baxımdan Misir Mədəniyyət Mərkəzi ilə əməkdaşlığımızı ayrıca qeyd etmək olar.

Xarici ölkə mədəniyyət mərkəzləri ilə əməkdaşlıq həm uşaqları həmin ölkənin tarixi, mədəniyyəti ilə tanış edir, həm də həmin ölkə vətəndaşlarının bizim mədəni irsimizə, muzeylərimizə marağını artırır. Gələcək işlərimizdə bu əlaqələrin ölkə hüdudlarından kənara çıxmasına çalışacağıq.

Muzey-məktəb əlaqələrində tarix, ədəbiyyat və coğrafiya dərslərinin tədrisində uşaqların muzeylərə cəlb edilməsi böyük fayda verir. Atalar yaxşı deyib: "Yüz eşitməkdənsə, bir görmək yaxşıdır". Tədris olunan materiala aid əyani muzey eksponatlarından istifadə görmə yaddaşının köməyi sayəsində, öyrənilən materialın daha yaxşı yadda qalmasına, dərk edilməsinə səbəb olur.

"Aytam"ın çoxlu sayda istedadlı uşaq üzvləri vardır. Onlar keçirilən tədbirlərdə yaxından iştirak edir, birliyimizə öz töhfələrini verirlər. Bu uşaqları biz öz birliyimiz daxilində "Gənc Heydərçilər" də adlandırırıq. Çünki həmin uşaqlar ulu öndərimiz Heydər Əliyev ideyalarından bəhrələnirlər. Biz bu ideyaları öz fəaliyyət yolumuzun mayakı hesab edirik. Ulu öndər "Dünya Azərbaycanlılarının Həmrəyliyi" gününü təsis edərək bütün Azərbaycanı həmrəyliyə səsləyirdi. Bizim birliyimiz də öz fəaliyyəti daxilində bu böyük həmrəyliyi məktəblilərimiz arasında imkanı çatdığı qədər yaymağa, qüvvətləndirməyə çalışır.

Bu günlərdə Anadolu Türk liseyində AYB-nin birinci katibi xalq şairi Fikrət Qoca ilə keçirdiyimiz görüş də ümumi planımızın tərkib hissəsi idi.

Tədbiri bu sətirlərin müəllifi açdı. Görüşdə tələbələr Fikrət Qoca şerindən parçalar söylədilər.

Sonra “Ədəbiyyat qəzeti”nin baş redaktoru Ayaz Vəfalı çıxış edərək Fikrət Qoca yaradıcılığı barədə fikirlərini məclis iştirakçıları ilə bölüşdü:

- Doğrusu, Fikrət poeziyasından nümunələri tələbələrin ifasında dinlədikcə məndə xüsusilə xoş təəssürat yaranırdı. Mənə əvvəldən yaxşı tanış olan, dəfələrlə oxuduğum, dəfələrlə dinlədiyim çox səmimi poetik sətirlər bu yeni nəslin təqdimində sanki yeni bir təravətlə səslənirdi.

Fikrət cavanlığından özünə "Qoca" ləqəbi götürməklə əslində sənətin qocalığa meydan oxuduğuna əminliyini bildirmişdi.

Fikrət Qoca poeziyasında həm həyat fəlsəfəsi, həm də musiqi dolu lirik duyğular xüsusi əhəmiyyət kəsb edir.

Birinci məqamla bağlı cəmi bir neçə sətirdən ibarət "Babalarım" şerini xatırlatmaq istəyirəm:

Biri qaçaq olub -

mərd olub;

Biri qoçaq olub -

mərd olub;

Biri kasıb olub -

mərd olub.

Bəs bu namərdlər hardandı -

Bax bu mənə dərd olub.

Yaxud gözəl musiqilər yazılmış neçə lirik şeirləri dinləyicilərimizə yaxşı məlumdur. Şəxsən mənim çox xoşladığım:

"Küsüb məndən

özgələrdən

məni soruşanım mənim…"

misralı şeri bədii sözlə musiqinin vəhdətinə ən yaxşı misaldır.

Fikrət Qoca poeziyasının bu kimi nümunələrini oxuduqca və dinlədikcə onun həqiqətən qocalmaq yox, daim yazıb-yaratmaq, ucalmaq həvəsinə şahid olursan.

Burada onu da qeyd etmək istəyirəm ki, Fikrət Qoca xüsusən ədəbiyyatımıza yeni gəlməkdə olan gənclərin qələm təcrübələrini çox zaman əlyazmasında oxuyan, onların yazıları barədə ilk ağsaqqal sözü deyən və mətbuata təqdim edən azsaylı görkəmli qələm sahiblərimizdəndir. "Ədəbiyyat qəzeti"ni ardıcıl oxuyan hər kəs bu həqiqəti təsdiq edə bilər.

Mən Fikrəti səmimi qəlbdən təbrik edir, ona daha böyük yaradıcılıq uğurları, yeni-yeni sənət sevinci arzulayıram.

Axırda hörmətli şairimiz Fikrət Qoca çıxış edərək oxucuları maraqlandıran suallara cavab verdi və məclisin təşkilində çəkdikləri zəhmətə görə bütün kollektivə dərin təşəkkürünü bildirdi.

Aygün Zamanlı

Ədəbiyyat qəzeti.- 2014.- 10 yanvar.- S.8.