Ramiz Əsgər - 60

Hörmətli Ramiz müəllim!

Sizi - tanınmış şair, ədəbiyyatşünas, tərcüməçi və publisisti anadan olmanızın 60 illiyi münasibətilə ürəkdən təbrik edirik.

Siz orta məktəbi qızıl medalla bitirərək indiki Bakı Dövlət Universitetinin jurnalistika fakültəsinə daxil olmuş, daha sonra əlaçı tələbə kimi təhsilinizi Moskva Dövlət Universitetinin jurnalistika fakültəsində davam etdirmisiniz. Əmək fəaliyyətinizə Azərbaycan radiosunda başlamış, türkcə verilişlər redaksiyasında çalışmısınız. Daha sonra Azərbaycan, türk, ərəb, fars, ingilis, fransız və alman dillərində çıxan “Azərbaycan bu gün” jurnalının baş redaktoru olmusunuz.

Siz eyni zamanda tanınmış ədəbiyyatşünassınız. Türkologiyanın təməl əsərlərindən olan Yusif Balasaqunlunun “Qutadqu bilik” poeması üzrə namizədlik, Mahmud Kaşğarinin “Divani lüğat-it-türk” əsəri üzrə doktorluq dissertasiyası yazmısınız. Siz 10 monoqrafiya və 200-ə yaxın elmi əsərin müəllifisiniz. Türkologiyanın ən böyük, ən qədim və ən zəngin məxəzi olan “Divani-lüğat-it-türk” haqqında sanballı monoqrafiya yazmış, bu əsər üzrə biblioqrafik və qrammatik göstəricilər hazırlamısınız. Sizin qələminizdən çıxan “Orxon abidələri”, “Qutadqu bilik” və “Türk xalqları ədəbiyyatı oçerkləri” kitabları da elmi ictimaiyyət tərəfindən dərin maraqla qarşılanmışdır.

Siz son dövrlərdə Bakı Dövlət Universitetində elmi-pedaqoji işlə məşğul olursunuz. 2002-2006-cı illərdə türkologiya kafedrasında müəllim kimi çalışmış, 2007-2011-ci illərdə BDU-nun Azərbaycan mühacirət ədəbiyyatı və bədii tərcümə elmi-tədqiqat laboratoriyasının baş elmi işçisi və müdiri olmuş, 2012-ci ildə Türk xalqları ədəbiyyatı kafedrasının müdiri seçilmisiniz.

Sizin fəaliyyətinizdə tərcüməçilik xüsusi yer tutur. Siz indiyədək rus, alman, türk, özbək, uyğur, türkmən, tatar, qaqauz dillərindən 40 kitab tərcümə etmisiniz. Bunların arasında M.Kaşğarinin “Divani lüğat-it-türk” (4 cild) əsərini, Y.Balasaqunlunun “Qutadqu bilik” poemasını, F.Sümərin “Oğuzlar”, B.Ögelin “Türk mifologiyası”, Z.Baburun “Baburnamə” kitablarını, H.Bayqara, Babur və Mehri Xatunun divanlarını, Azadinin, Ənbəlibin, Məhdumqulunun, Molla Nəfəsin, A.Tukayın və başqalarının seçilmiş əsərlərini göstərmək olar. Sizin tərcümənizdə “Monqolların gizli tarixi”, “Türk ədəbiyyatı tarixi” (2 cild), özbək və türkmən poeziyası antologiyaları da oxucular tərəfindən rəğbətlə qarşılanmışdır.

Siz indiyədək Türkiyənin “Türk dünyasına xidmət”, Özbəkistanın beynəlxalq “Babur”, Ukraynanın beynəlxalq “Bəkir Çobanzadə”, Türkmənistanın beynəlxalq “Altın əsr”, Avrasiya Yazarlar Birliyinin və TürkSOY-un mükafatlarına layiq görülmüsünüz. Qasım Amanjolovla bağlı tədqiqat və tərcümələrinizə görə Qazaxıstanın “Qasım Amanjolov” yubiley medalı ilə, Abdulla Tukayın əsərlərinin tərcüməsinə görə Tatarıstanın “Mədəniyyət sahəsində uğurlar” medalı ilə təltif edilmiş, 2011-ci ildə Avrasiya Tərcüməçilər Birliyinin (Ankara) sədri seçilmisiniz.

Hörmətli Ramiz Əsgər!

Sizi yubileyiniz münasibətilə bir daha təbrik edir, uzun ömür, cansağlığı və yeni-yeni uğurlar arzu edirik!

Azərbaycan Yazıçılar Birliyi

Ədəbiyyat qəzeti.- 2014.- 10 yanvar.- S.5.