Gülxani Pənah və Tural Məzahiroğlunun

“Azərbaycan ədəbiyyatında detektiv janr”

(Çingiz Abdullayevin yaradıcılığı əsasında)

kitabının təqdimat mərasimi

Yanvarın 15-də Azərbaycan Yazıçılar Birliyinin Natəvan klubunda Gülxani Pənah və Tural Məzahiroğlunun həmmüəllifliyi ilə “MSA” nəşriyyatında çap olunmuş “Azərbaycan ədəbiyyatında detektiv janr” (Çingiz Abdullayevin yaradıcılığı əsasında) kitabının təqdimat mərasimi keçirildi.

Kitabda Azərbaycan və dünya ədəbi prosesində detektiv əsərlər müəllifi kimi tanınan Çingiz Abdullayevin xüsusilə siyasi detektiv janrın inkişafında rolu tədqiqata cəlb edilir. Dünya şöhrətli Azərbaycan yazıçısının müasir ədəbi prosesdə rolu, qlobal dünyada baş verən proseslərin Azərbaycan ədədbiyyatında əksi, dünya oxucularının bu əsərlərə marağı, yazıçının detektiv əsərlər müəllifi kimi dünya detektiv yanrının inkişafında tutduğu yer müəyyənləşdirilir. Kitabın elmi redaktorları Cəlal Abdullayev, İfrat Əliyeva, Qəzənfər Paşayevdir.

Tədbiri giriş sözü ilə açan Çingiz Abdullayev yaradıcılığı əsasında kitab qələmə alan müəlliflərə öz təşəkkürünü bildirdi, əsərlərinin geniş oxucu kütləsi tərəfindən oxunmasını yazıçının xöşbəxtliyi kimi dəyərləndirdi.

Gülxani Pənah çıxışında kitabın Azərbaycan ədəbi prosesində detektiv janrın araşdırılması cəhətdən Azərbaycan ədəbiyyatşünaslığına dəyərli töhfə olduğunu dedi: “Kitabda Azərbaycan ədəbi prosesində detektiv janr, onun inkişafı yolları araşdırılır, dünya ədəbi prosesində mövcud olan detektiv janrla müqayisəli şəkildə tədqiqata cəlb edilir, detektiv əsərlər müəllifi Çingiz Abdullayevin yaradıcılıq yolu, onun sənətkarlıq keyfiyyətləri təhlil və tədqiqini tapır”.

Tədbirdə “Mərhəmət elçisi” jurnalının baş redaktoru Şakir Əhmədli yazıçı Çingiz Abdullayevə “Fəxri diplom” təqdim etdi.

Təqdimat mərasimində Tural Məzahiroğlu çıxış edərək kitabın araya-ərsəyə gəlməsində yardımçı olan Gülxani Pənaha, Çingiz Abdullayevə təşəkkürünü bildirdi.

Mərasimdə Natəvan Dəmirçioğlu, İlqar Fəhmi, Fariz Çobanoğlu, Zəminə Xınalı, Oqtay Rza, Maarif Soltan, Xəyal Rza çıxış edərək detektiv əsərlər müəllifi Çingiz Abdullayevin yaradıcılığından, təqdim olunan kitabın məziyyətlərindən söz açdılar, müəlliflərə yaradıcılıq uğurları arzuladılar.

Tədbirin sonunda çıxış edən Gülxani Pənah təqdimat mərasiminin keçirilməsinə yaratdıqları şəraitə görə Azərbaycan Yazıçılar Birliyinin rəhbərliyinə, iştirakçılara təşəkkürünü bildirdi.

M.Qənbərova

Ədəbiyyat qəzeti.- 2014.- 17 yanvar.- S.8.