Yurd yerim - dərd yerim

"Ədəbiyyat qəzeti" "1 şeir/2 rakurs" layihəsini davam etdirir. Bu həftə təhlilə cəlb olunan şeir Adil Cəmilin "Yurd yerim-dərd yerim" şeiridir.

İlahi, yurd yerim dərd yerim oldu,

Torpaqla sınağa çəkilməyəydim.

Dağlara baxıram dağlanır sinəm -

Bu dağla sınağa çəkilməyəydim.

Gəzir xəyalımda gəzdiyim yaylaq,

Saralmış yarpağam, qurumuş budaq.

Ürəyim deyəni demir ha dodaq,

Dodaqla sınağa çəkilməyəydim.

Bilmirəm qorxduqmu bir qaşıq qandan -

O torpaq uğrunda keçmədik candan.

Kişilik çıxmadı bu imtahandan,

Papaqla sınağa çəkilməyəydim.

Adiləm, özümdən bəzən küsdüm də,

Yansam "Vətən" deyər göydə tüstüm də…

Döyüşdə öləydim ayaq üstündə,

Yataqla sınağa çəkilməyəydim.

Adil Cəmil

Ədəbiyyat qəzeti.- 2017.- 4 noyabr.- S.23.