Kolumbiyalı yazıçı ilə görüş

Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda kolumbiyalı yazıçı, professor Konrado Zuluaqa ilə görüş keçirilib.

Tədbiri giriş sözü ilə AMEA-nın vitse-prezidenti, akademik İsa Həbibbəyli açaraq Azərbaycanın müstəqillik qazandıqdan sonra digər ölkələrlə elmi əlaqələrinin gücləndiyini və inkişaf etdiyini söyləyib. Nizami Gəncəvi adına Ədəbiyyat İnstitutunun beynəlxalq əlaqələrinin sürətlə inkişaf etdiyini bildirən akademik İsa Həbibbəyli kolumbiyalı yazıçı ilə görüşün bu elmi müəssisənin xarici əməkdaşlığının genişləndirilməsi baxımından əhəmiyyətini qeyd edib.

İ.Həbibbəyli bu gün qurulan əməkdaşlığın uğurla davam edəcəyinə əminliyini bildirərək diqqətə çatdırıb ki, məşhur kolumbiyalı yazıçı, Nobel mükafatı laureatı Qabriel Qarsia Markesin əsərlərinin böyük qismi Azərbaycan dilinə tərcümə olunub və oxucularımız tərəfindən həvəslə mütaliə edilir. "Ölkəmizdə az adam tapılar ki, Qabriel Qarsia Markesin əsərlərini, xüsusilə onun "Yüz ilin tənhalığı" romanını oxumasın. Hesab edirəm ki, Kolumbiyada da Azərbaycan ədəbiyyatının tanıdılmasına ehtiyac var" - deyə vurğulayan akademik İsa Həbibbəyli Markesin əsasını qoyduğu "magik realizm" cərəyanına Azərbaycan ədəbiyyatında Y.V.Çəmənzəminli, Yusif Səmədoğlu, Mövlud Süleymanlı kimi yazıçıların əsərlərində rast gəlindiyini və bu oxşarlığın iki ölkə ədəbiyyatını müqayisə etməyə imkan verdiyini, Kolumbiya oxucusu tərəfindən "Əli və Nino" romanının tanındığını söyləyib, Azərbaycan ədəbiyyatının incilərinin tərcümə olunaraq bu ölkədə yayılmasına ehtiyac olduğunu diqqətə çatdırıb.

Tədbirdə kolumbiyalı yazıçı, professor Konrado Zuluaqa çıxış edərək gələcəkdə hər iki ölkə arasında elmi əlaqələrin güclənməsində Markes yaradıcılığının qırılmaz körpü olacağını bildirib. Alim Markeslə şəxsi tanışlığının tarixçəsindən, onunla keçirdiyi yaradıcılıq görüşlərindən danışıb.

Daha sonra çıxış edən Kolumbiyanın ölkəmizdəki səfirliyinin müvəqqəti işlər vəkili xanım Marta Qalindo Pena çıxış edərək tədbirin təşkilinə görə təşəkkürünü bildirib və gələcəkdə elmi əlaqələrin davam edəcəyinə inandığını ifadə edib.

Sonra institutun əməkdaşı, filologiya üzrə fəlsəfə doktoru Cavidə Məmmədova "Qabriel Qarsia Markesin əsərlərinin Azərbaycanda tərcüməsi və tədqiqi" mövzusunda məruzə ilə çıxış edib.

Sonda qonağa Ədəbiyyat İnstitutunun nəşrləri və xatirə hədiyyələri təqdim olunub.

X.Məcidova

Ədəbiyyat qəzeti.- 2017.-30 sentyabr.- S.15.