«Söz yaşıllığı» təqdim olundu

Tanınmış şair Barat Vüsal Qazaxda yaşayıb-yaratsa da şeirlərinin sədası neçə-neçə ölkədən gəlir. Onun Tehranda Mişov Kultur Dərnəyi tərəfindən nəşr olunan «Söz yaşıllığı» kitabı da bu silsilədəndir. Bu günlərdə şairin müxtəlif illərdə yazdığı şeirlərini özündə ehva edən həmin əsərin Yasamal rayonundakı Natəvan adına kitabxanada təqdimat mərasimi keçirilmişdir.

Abşeron rayonunda məskunlaşan Laçın rayon Çıraqlı kənd məktəbinin müəllim və şagirdlərinin də qatıldığı tədbirdə kitabxananın direktoru Turanə Əmirova, İranda nəşr olunan «Mişov dağı» jurnalının redaktoru Aqşin Ağkəmərli, şairə Zərəngiz Dəmirçi, yazıçı-publisist Atababa İsmayıloğlu, şairin oğlu Cavid Aliyev Barat Vüsalın yaradıcılığından, onun şeirlərindəki milli köklərə bağlılıqdan söhbət açmışlar.

A.İsmayıloğlu

Ədəbiyyat qəzeti.- 2018.- 29 dekabr.- S.32.