Şair dostlarıma

"Sükut nəğmələri"silsiləsindən

Niyə suya dönüb məhəbbətiniz?

Yolunuz, iziniz səsimə gəlmir.

Bir atım barıtmış o son vədiniz,

Doğma ürəyiniz üstümə gəlmir.

Daha yuxunuz da cin olmur yəqin,

Sinəni isitmir isti salamlar.

Vaxtınız olanda bir söz göndərin,

Ətriynən yaşasın sevən adamlar.

Günlər üfürülmüş sabun köpüyü,

Axşamdan sabaha yollar bir əlçim.

Bir xəbər eləyin: "bizi qarşıla!,"

Həsrət baxışların üstündən keçim.

Bu ömür, bu tale dəvə boynudu,

Yolnuz, düşəndə bir dəyin bizə.

Bu günki, günümüz lal oyunudu,

Bir bayram sabahı göndərin bizə!

Bərdədən Bakıya yollar nə uzun,

Yolları çırpıram, toz eləyirəm,

Ötən günümüzün şirin qoxusun,

Hər gecə yuxumda təzələyirəm.

Ölüm - adamın boş vaxtı

Hamı yolun ortasında....

Bir adam qırağa cıxmaz.

İçimizin qaranlığı

Bir işim çırağa çıxmaz.

Baş deyil, candı, əridi,

Yaş keçir, ürək diridi.

Bu eşqin yönü bəridi,

Həsrətdən uzağa çıxmaz.

Göydən gələn sözdü, səsdi,

İçimi bir haray kəsdi.

Xəyalımda bir əl gəzdi.

İstisi varağa çıxmaz.

Göylər səsimin üstüdü,

Qəlb arzulu, can istidi,

Hər gün bir dözüm dərsidi,

Gün ayrı marağa çıxmaz.

O daş, bu dərddən yumşaqdı,

Səsini udan uşaqdı.

Ölüm- adamın boş vaxtı,

Qapıya, yolağa çıxmaz.

Hardasan...

Bir cana nə qədər duyğu yerləşir,

Sevinc öləziyir, qəm dərinləşir.

Adını çəkəndə dil şirinləşir,-

Hardasan, dilimin şirin adamı?

Heykələm, ötənlər baxıb şellənir,

Canı neyləmisən, harda küllənir.

Hardasa bir acı tale dillənir:

"Hardasan, dilimin şirin adamı?".

Qonur tərəziyə yaxşı da, pis də,

Dərdin qəlpəsi var, hər güllən üzdə.

Bir şirin söz çatmir təsəllimizdə,

Hardasan, dilimin şirin adamı,

Daşa da doğmayam, qərib quşa da

Üzümü görməyən, görüb oxşada...

Məni çatmadığım sevgi yaşadar,

Hardasan, dilimin şirin adamı?

Gözümdən nə düşdü, nə keçdi başa

Yol uçruma çıxdı, həvəsim daşa,

Özümü tapmadım, girəm savaşa,

Hardasan, dilimin çirin adamı.

Bu yuva mənimki, o ev səninki,

Bu ağrı mənimki, o kef səninki,

Bu ömür qənd kimi qəm yeyəndi ki...

Hardasan, dilimin şirini adamı.

Səsimi gizlədim,çoxu lal bilib

Yazımı, pozumu bir xəyal bilib,

Dün gecə yuxuma bir sual girib:

"Hardasan, dilimin şirin adamı?"

Rizvan Nəsiboğlu

Ədəbiyyat qəzeti.- 2018.- 12 may.- S.32.