Addımların izi ilə görüş

Köpəyi gəzdirirdi

Bu şəhərdə o

Ehtimal daxilində görünürdü

Bütün illərin peyğəmbərliyi

Bir tükdən daha ağır deyildi;

Addımların

Arxasınca qıvrılan

nifrət kimi

ağır izlər...

Nə zaman ki, arxamızca

Allah bizi izləyir

Fərqli şeylər haqqında

danışdıqda biz

Onlar danışmasalar da

Bizim fikirlərimizdən

Çaşıb qalarlar...

Anlaşılmaz işarətlər

Onlarda gizlidir;

Söylənməmiş sözlər

Və palçıq qoxusu...

Davamlı yuxusuzluq

Rüzgar qanadlarında,

Və suda.

Təsəlli etdilər bizi

Sübhün işıqları,

Gecənin alatoranıyla.

Nə söyləyək biz?

Bax,

Gecəyarısının quşları

Səsləri ilə doldurur çevrəmizi

Və bizi səsləyir.

Qədim çağların əfsanələri

çoxdan unudulsalar da

cana yaxındırlar.

Kəskin baxışların işığı altda

Onu tənhalığın gürültüsü oyandırar.

Daha nə söyləyə bilərik?

Ordakı gillərin arasından

Allahsa bizi izləyən;

Rahatladınızmı?

Dağılma və pozulma

Ev çökdü,

Kərpiçlər günün günorta

havasında sərxoş

kəpənəklər kimi

hərəsi bir tərəfə uçdu.

Qohumların fotoları divarlardan

səpələndi ətrafa,

Yalnız çərçivəli yararsız rəsmlər

Hələ də mismarlardan asılı...

Hər yanda dağılma və pozulma

Varfolomeya gecəsi başladı

deyə bilərsiniz buna.

Kəllə qoparmaq üçün

həyəcan siqnalları çalınır

barbarların ziyafətində.

Və

gilin üç ruhu

Xəyalımı utandırır

Yandırıcı daş ruhuyla

Bu qəribə gilli qüvvələr

Adlarını unutdurdu onların

Nə başa düşməli

Şirələr necə çəkilir

Yoxluğun varlığından?!

Gil minerallarının üç ruhu

Dinləməyə məcbur edər

Heç zaman heç kim tərəfindən

eşidilməyənləri.

Qatı səssizlikdə

Qırmızı balıq sürüsü

Göyqurşağına qədər uçmağa çalışır

Çünki bezdirib onları əski rənglər.

O ruhlar

açdı gözlərimi az da olsa.

Bilmirdim indiyədək o gecələri ki

Bıçağın iti tiyəsinin altından düşən

(Daş kədərlə itiləmişdim onu)

Şehi sevməyi öyrədəcək mənə.

Sonunda gil minerallarının ruhları

məni inandırdı ki,

Sevinc cəlladın baxışlarında gizlənib

müalicəsi bir anlıq.

Yalnız onda bildim

cəlladların müalicəsi necə olur.

O ruhlar söylədi ki,

Axırda anlayacaqsan ki,

Niyə birbaşa hərəkətlər

Qarşılıqlı əlaqəni bilməz.

Sonra gil mineralları

Yeddi kilidlə kilidli

Qapıdan keçdilər

Gizləyə bilmək üçün

Səhrada göz yaşlarını...

İon Deakonesku

Tərcümə etdi:

Məmməd İsmayıl

Ədəbiyyat qəzeti.- 2018.- 15 sentyabr.- S.11.