Nikbinlik zəngi

Şair Oqtay Rzanın xatirəsinə

1992-nin sonlarıydı,"Şur" nəşriyyatına

direktor təyin etmişdi məni

Mədəniyyət naziri Polad Bülbüloğlu.

Allah var adamın başının üstündə,

Özü də rüşvətsiz-filansız!

Əlində 50 min olanı yaxına qoymayıb:

- Mənə naşir lazımdı! - Demişdi!

Mən də "Yazıçı"dan gəlmişdim,

"İşıq"da işləmişdim,

Özünütərif olmasın -

cikini-bikini bilirdim nəşriyyat işinin.

Nazim İbrahimovun idarəçilik məktəbi,

Əjdər Xanbabayevin naşirlik təcrübəsi

tutmuşdu əlimdən.

Əmrimi alan günü - dar axşamçağı

üç yerə böldüm sevincimi -

Oqtay Rzaydı, Şəmistan Nəzirliydi,

bir də mən - "Neftçilər" metrosunun

çölə çıxışında durmuşduq,

üçümüz də sevinirdik.

Oqtay Rza hamımızdan çox sevinirdi.

Yerimi qızdırmamış

"Vətən, yas saxlama" kitabını

nəşr elədik ustadın,

verdik ki, satıb, xərcini ödəsin.

Onda təzə-təzə dəb olurdu

müəllifin öz kitabını satması.

Oqtay müəllim də kitabları

götürüb sevinə-sevinə getdi.

Uzaqdan-yaxından zəng eləyirdi hərdən:

- Qohum (yoldaşı kürdəmirliydi,

məni də qohum bilirdi özünə), -

balaca vətənə gəlmişəm - Salyana,

yerin məlum - rahatam.

Sənə bir nikbinlik zəngi çalacam

bu yaxınlarda, darıxma.

Həftənin başı getmişdi, ayağı qayıtdı,

qapı açıldı, danışa-danışa girdi otağa.

Yerimdən durub qabağına yeridim,

hiss elədim ki, kefi yoxdu.

- Ustad, soyuqlayıb-eləyibsən nədi?!

- Kaş elə olaydı!

- Sözlü adama oxşayırsan?!

- Adı mənə düşmədi kitabın!

Vətənə təsəlli verirdim, "yas saxlama",

indi özümə təsəlli verən gəzirəm. -

(Üzünə baxa-baxa qalmışdım.)

- İki bağlama kitabdan

birini də alan olmadı Salyanda...

Balaca bir düzəliş verdim:

- Kiçik vətəndə...

Məzəmmətlə üzümə baxdı:

- Görünür, kürü çox olanda,

Kitabdan tox olurlar, - dedi!

Qəşəm İsabəyli

Ədəbiyyat qəzeti.- 2019.- 24 avqust.- S.17.